ການຈັດຕັ້ງປະຕິບັດພົວພັນຮ່ວມມືວຽກງານປ້ອງກັນຊາຍແດນລາວຫວຽດນາມ ມູນເຊື້ອແບບພິເສດການຮ່ວມມືຮອບດ້ານລະຫວ່າງສອງຊາດ, ສອງພັກ, ສອງກອງທັບປະຊາຊົນລາວ-ຫວຽດນາມ ໄດ້ຮັບການຖະນຸຖະໜອມ ປົກປັກຮັກສາ ແລະ ເສີມຂະຫຍາຍ ຢ່າງກ້ວາງຂວາງ ໃນທົ່ວກອງທັບປະຊາຊົນລາວ. ຫຼາຍສັດຕະວັດທີ່ສາຍພົວພັນຮ່ວມມືລາວ-ຫວຽດນາມ ໄດ້ສາມັກຄີກັນຕີສັດຕູຜູ້ຮຸກຮານ, ນັກຮົບປະຕິວັດຂອງສອງຊາດ ສອງກອງທັບ ໄດ້ສາມັກຄີຊ່ວຍເຫຼືອເຊິ່ງກັນ ແລະ ກັນ ແລະ ທຸ້ມເທເຫື່ອແຮງສະຕິປັນຍາຕໍ່ສູ້ຢ່າງດຸເດືອດຂ້ຽວຂາດໃນຂຸມຄອງສູ້ຮົບອັນດຽວກັນ ເພື່ອໃຫ້ໄດ້ຄວາມເປັນເອກະລາດແຫ່ງຊາດ, ສິດເສລີພາບ ແລະ ຄວາມຜາສຸກຂອງປະຊາຊົນລາວ-ຫວຽດນາມ.
ສະຫາຍ ພັນເອກ ຄຳພອນ ແສນສີວົງສາ ຫົວໜ້າການທະຫານກອງບັນຊາການທະຫານແຂວງຜົ້ງສາລີ ໄດ້ໃຫ້ສຳພາດໃນໂອກາດທີ່ນັກຂ່າວວິທະຍຸກະຈາຍສຽງແຫ່ງຊາດລາວ ແລະ ວິທະຍຸກະຈາຍສຽງຫວຽດນາມ ຫຼື ( VOV ) ເຄື່ອນໄຫວເກັບກຳຂ່າວໃນໂອກາດສະເຫຼີມສະຫຼອງສອງວັນປະຫວັດສາດລາວ-ຫວຽດນາມ ໃນຫົວຂໍ້ : ການປົກປັກຮັກສາຊາຍແດນສີຂຽວ ວ່າງບໍ່ດົນມານີ້ວ່າ : ແຂວງຜົ້ງສາລີມີຊາຍແດນຕິດກັບ ສສ ຫວຽດນາມ 350 ກວ່າກິໂລແມັດ, ມີ 119 ຫຼັກໝາຍ ແລະ ມີ 5 ກອງຮ້ອຍ ທະຫານຊາຍແດນທີ່ເຄື່ອນໄຫວຮັບຜິດຊອບແຕ່ຫຼັກໝາຍ 0 ຫາຫຼັກໝາຍ 120, ມີບ້ານລຽບຕາມຊາຍແດນຈຳນວນ 30 ບ້ານ ແລະ ມີດ່ານສາກົນ 1 ດ່ານ, ດ່ານປະເພນີ 2 ດ່ານ ແລະ ດ່ານເຂົ້າອອກເມືອງຊົ່ວຄາວ 1 ດ່ານຢູ່ຫຼັກໝາຍ 65.
ຕະຫຼອດໄລຍະຜ່ານມາກອງບັນຊາການທະຫານແຂວງຜົ້ງສາລີ ໄດ້ຈັດຕັ້ງປະຕິບັດແນວທາງປ້ອງກັນຊາດປ້ອງກັນຄວາມສະຫງົບຕິດພັນກັບສອງໜ້າທີ່ຍຸດທະສາດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ເປັນຕົ້ນແມ່ນການຄຸ້ມຄອງປ້ອງການຊາຍແດນ, ຫຼັກໝາຍຊາຍແດນແຫ່ງຊາດ.
ການຮ່ວມມືວຽກງານປ້ອງກັນຊາຍແດນໃນໄລຍະຜ່ານມາ ກອງບັນຊາການທະຫານແຂວງຜົ້ງສາລີ ແມ່ນປະຕິບັດຕາມແນວທາງການຕ່າງປະເທດຂອງພັກ ເວົ້າສະເພາະແມ່ນປະຕິບັດຕາມບົດບັນທຶກການພົວພັນຮ່ວມມືກັບກອງບັນຊາການທະຫານປ້ອງກັນຊາຍແດນແຂວງເຊິນລາ ແລະ ກອງບັນຊາການທະຫານຊາຍແດນແຂວງດຽນບຽນຂອງ ສສ ຫວຽດນາມ ເປັນກົມກອງແຮກສ່ຽວ ແລະ ພັດປ່ຽນກັນເປັນເຈົ້າພາບຈັດກອງປະຊຸມພົບປະແລກປ່ຽນສະພາບວຽກງານຊາຍແດນຮ່ວມກັນເປັນປົກກະຕິປີລະຄັ້ງ, ຈັດຕັ້ງຝຶກອົບຮົມວຽກງານຄຸ້ມຄອງຊາຍແດນຮ່ວມກັບກອງບັນຊາການທະຫານແຂວງດຽນບຽນ ເນື່ອງໃນໂອກາດວັນບຸນສຳຄັນຂອງຊາດ ຂອງພັກ ຂອງກອງທັບຝ່າຍໃດກໍ່ໄດ້ສົ່ງຈົດໝາຍອວຍພອນເຊິ່ງກັນ ແລະ ກັນໃນລະດັບຂັ້ນທ້ອງຖິ່ນຂອງຕົນ. ພ້ອມດຽວກັນນັ້ນກໍ່ໄດ້ຈັດຕັ້ງກົມກອງແຮກສ່ຽວກັບກອງຮ້ອຍທະຫານຊາຍແດນຝ່າຍລາວກັບກອງຮ້ອຍປ້ອງກັນຊາຍແດນຂອງ ສສ ຫວຽດນາມຈຳນວນ 13 ກອງຮ້ອຍ ພ້ອມທັງຈັດຕັ້ງກອງປະຊຸມພົບປະຂັ້ນກອງຮ້ອຍແບບສອງຝ່າຍ, ພ້ອມທັງໄດ້ສົມທົບກັບອຳນາດການປົກຄອງບ້ານ, ກຸ່ມບ້ານ, ປະຊາຊົນບັນດາບ້ານລຽບຕາມຊາຍແດນທີ່ມີມູນເຊື້ອສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ໄປມາຫາສູ່ຢ້ຽມຢາມຖາມຂ່າວຖາມພີ່ນ້ອງບ້ານໃກ້ເຮືອນຄຽງທັງສອງຝ່າຍເປັນປົກກະຕິ ເພື່ອເສີມສ້າງຄວາມສາມັກຄີປອງດອງຂອງປະຊາຊົນບັນດາເຜົ່າລຽບຕາມຊາຍແດນ.
ສະຫາຍ ພັນເອກ ຄຳພອນ ແສນສີວົງສາ ຫົວໜ້າການທະຫານກອງບັນຊາການທະຫານແຂວງຜົ້ງສາລີ ຍັງໃຫ້ຮູ້ຕື່ມວ່າ : ການຮ່ວມມືວຽກງານປ້ອງກັນຊາຍແດນໃນຕໍ່ໜ້າ ໂດຍສືບຕໍ່ປະຕິບັດແນວທາງການຕ່າງປະເທດຂອງພັກວາງອອກ ເພີ່ມທະວີການຮ່ວມມືກັບປະເທດເພື່ອນມິດຍຸດທະສາດ ແລະ ເພື່ອນມິດສາກົນ ເປັນຕົ້ນແມ່ນ ສສ ຫວຽດນາມ, ບົນພື້ນຖານປະຕິບັດຕາມຫຼັກການຂອງການພົວພັນສາຮ່ວມມື, ຈະເພີ່ມທະວີການຮ່ວມມືຮອບດ້ານໃນການຄຸ້ມຄອງ ແລະ ປົກປັກຮັກສາເສັ້ນຊາຍແດນຮ່ວມກັນ ເພື່ອສ້າງໃຫ້ຂອບເຂດບໍລິເວນຊາຍແດນມີຄວາມສະຫງົບປອດໄພ, ເອົາໃຈໃສ່ພົວພັນຮ່ວມມືໃນການລາດຕະເວນຮ່ວມສອງຝ່າຍໃຫ້ເປັນປົກກະຕິ ເພື່ອແລກປ່ຽນສະພາບຮ່ວມກັນ ແລະ ພ້ອມກັນແກ້ໄຂສະພາບການທີ່ຈະເກີດຂຶ້ນໃຫ້ທັນເວລາ. ສືບຕໍ່ປະຕິບັດຕາມອະນຸສັນຍາທີ່ສອງຝ່າຍໄດ້ລົງນາມຮ່ວມກັນ ເພື່ອເສີມສ້າງຮັດແໜ້ນຄວາມສາມັກຄີພິເສດລະຫວ່າງສອງຊາດລາວ-ຫວຽດນາມໃຫ້ໝັ້ນຄົງທະນົງແກ່ນຂຶ້ນເລື້ອຍໆ.
