ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການຊີ້ນຳ – ນຳພາຂອງຄະນະພັກ ກັບວຽກງານການທ່ອງທ່ຽວ ສິລະປະ ແລະ ສູນຝືກອົບຮົມ ພະແນກ ຖວທແຂວງອຸດົມໄຊ

ຕະຫຼອດໄລຍະການຊີ້ນຳ-ນຳພາ ຂອງຄະນະພັກຮາກຖານພະແນກ ຖວທ ແຂວງອຸດົມໄຊ ໄລຍະ 5 ປີຜ່ານມາ ມີຫຼາຍດ້ານທີ່ພົ້ນເດັ່ນ ແລະ ໜ່ວຍພັກ​ທ່ອງ​ທ່ຽວ, ສີລະປະ ແລະ ສູນຝຶກອົບຮົມ, ກໍ່ແມ່່ນໜ່ວຍພັກໜຶ່ງທີ່ຂຶ້ນກັບຮາກຖານພັກພະແນກ ຖວທ  ແລະ ຕະຫຼອດໄລຍະຜ່ານມາແມ່ນໄດ້ ເອົາ​ໃຈ​ໃສ່​ຄຸ້ມ​ຄອງ​ໂຄງ​ການ​ລົງ​ທຶນ​ຂອງ​ລັດ ແລະ ທຸລະກິດ,  ເກັບ​ກຳ​ຄວາມ​ຕ້ອງ​ການຂອງນັກ​ທ່ອງ​ທ່ຽວ​, ​​ວາງ​ແຜນ​ພັດ​ທະ​ນາ​ທ່ອງ​ທ່ຽວ​ແບບ​ປະ​ຊາ​ຊົນ​ມີ​ສ່ວນ​ຮ່ວມ​. ​ທົ່ວ​ແຂວງ​ມີ​ໂຮງ​ແຮມ 21 ແຫ່ງ, ເຮືອນ​ພັກ 65 ແຫ່ງ, ຮ້ານ​ອາ​ຫານ-ເຄື່ອງ​ດື່ມ 165 ຮ້ານ. ໄດ້​ນຳ​ເອົາ​ກົດ​ໝາຍ, ນິ​ຕິ​ກຳ​ເຜີຍ​ແຜ່​ໃຫ້​ຜູ້​ປະ​ກອບ​ການຢູ່ຂັ້ນແຂວງ ແລະ 7 ເມືອງ,  ​ຈັດ​ກິດ​ຈະ​ກຳ​ປີ​ທ່ອງ​ທ່ຽວ​ລາວ 2018 ແລະ ປີ​ທ່ອງ​ທ່ຽວ​ຮ່ວມ​ມື​ລາວ-ຈີນ 2019. ​ໄກ່​ເກ່ຍ​ ຮ້ານ​ບັນ​ເທີງ, ຄາ​ລາ​ໂອ​ເກະ​ທີ່ສ້າງ​ປະກົດການຫຍໍ້ທໍ້ໃນ​ສັງ​ຄົມ, ​​ປັບ​ປຸງ​ແຜນ​ຍຸດ​ທະ​ສາດ​ພັດ​ທະ​ນາ​ການ​ທ່ອງ​ທ່ຽວ 8 ແຂວງ​ພາກ​ເໜືອ, ສຳຫຼວດ​ຂໍ້​ມູ​ນ​ປະ​ເມີນ​ສິ່ງ​ແວດ​ລ້ອມ​ອະ​ນຸ​ຍາດ​ພາກ​ທຸ​ລະ​ກິດ​ສ້າງ​ຕັ້ງ ແລະ ເປີດ​ບໍ​ລິ​ການ​ທ່ອງ​ທ່ຽວ 5 ບໍ​ລິ​ສັດ, ພາຍ​ໃນ 2 ບໍລິສັດ, ຕ່າງປະ​ເທດ 3 ບໍລິສັດ; ໄດ້​ຮັບ​ໜັງ​ສື​ສະ​ເໜີເຈດ​ຈຳ​ນົງ ແລະ ຄົ້ນ​ຄ້​ວາ​ບົດ​ວິ​ພາກ​ເສດ​ຖະ​ກິດ ​ນັກ​ລົງ​ທືນ​ພາຍ​ໃນ ແລະ​ ຕ່າງ​ປະ​ເທດຂໍ​ສຳ​ປະ​ທານ​ສະ​ຖານ​ທີ່​ທ່ອງ​ທ່ຽວ​ 11 ບໍ​ລິ​ສັດ; ​ຄົ້ນ​ຄ້​ວາ​ອະ​ນຸ​ມັດ​ແລ້ວ 1 ບໍ​ລິ​ສັດ ກຽມ​ເອ​ກະ​ສານ​ອະ​ນຸ​ມັດ​ 1 ບໍ​ລິ​ສັດ​, ປັບ​ປຸງ​ສື່ໂຄສະນາ, ເຂົ້າ​ມາ​ຮ່​ວມ​ວາງ​ສະ​ແດງ​ຜະ​ລິດ​ຕະ​ພັນ​ທ່ອງ​ທ່ຽວ​ພາຍ​ໃນ ແລະ ຕ່າງ​ປະ​ເທດ​. 5 ປີມີນັກທ່ອງທ່ຽວ 806.356 ຄົນ, ສ້າງລາຍ​ຮັບ ​49.476.291 ໂດ​ລາ​ສະ​ຫະ​ລັດ.   ເອົາໃຈໃສ່ສົ່ງເສີມສີລະປະວັນນະຄະດີມວນຊົນໃຫ້ມີການເຄື່ອນໄຫວ, ຄົ້ນຄວ້າ, ປະດິດຄິດແຕ່ງ, ສ້າງລາຍການໃໝ່ໄດ້ດັ່ງນີ້:ປະດິດບົດຟ້ອນ 20 ບົດ, ຂັບລໍາ 8 ບົດ, ບົດເພງ 32 ບົດ, ສະແດງຮັບໃຊ້ແຂກພາຍໃນ, ແຂກຕ່າງປະເທດ ແລະ ງານຕ່າງໆໄດ້ 50 ກວ່າຄັ້ງ, ທົ່ວແຂວງມີໜ່ວຍວັນນະຄະດີສະໝັກຫລິ້ນ 120 ໜ່ວຍ, ໄດ້ລົງຝຶກແອບໜ່ວຍວັນນະຄະດີ ໂຮງຮຽນ, ບ້ານສາມາດເຄື່ອນໄຫວສະແດງໄດ້ 20 ກ່ວາໜ່ວຍ. ປະຈຸບັນມີໝໍຂັບໝໍລໍາສະໝັກຫລີ້ນ 150 ກວ່າຄົນ, ນັກດົນຕີພື້ນເມືອງມີ 50 ກວ່າຄົນ, ມີນັກແຕ່ງເພງສະໝັກຫລິ້ນ 30 ກວ່າຄົນ, ນັກວິຈິດສິນ 20 ຄົນ.    ສໍາເລັດການຂຽນບົດສະເຫນີໂຄງການຝຶກອົບຮົມ ພັດທະນາບຸກຄະລາກອນ ໃນຂົງເຂດ ຖວທ ທົ່ວແຂວງ 11 ໂຄງການ; ສຳເລັດການຈັດຕັ້ງປະຕິບັດການເຝິກອົບຮົມໃຫ້ກັບຫົວໜ່ວຍທຸລະກິດຜູ້ປະກອບການ 5 ຄັ້ງ ມີຜູ້ເຂົ້າຮ່ວມ 301 ເທື່ອຄົນ; ສຳເລັດການເຝິກອົບຮົມ ຄູເຝິກທັງໝົດ 67 ຄົນ ຍິງ 59 ຄົນ; ຈັດສົ່ງບຸກຄະລາກອນທັງພາກລັດ ແລະ ເອກະຊົນເຂົ້້າຮ່ວມເຝິກອົບຮົມກ່ຽວກັບວຽກງານ ຖວທ ທັງພາຍໃນ ແລະ ຕ່າງປະເທດ 299 ເທື່ອຄົນ.

ເພື່ອພັດທະນາການທ່ອງທ່ຽວໃຫ້ຍືນຍົງ, ສົ່ງເສີມການທ່ອງທ່ຽວທໍາມະຊາດ, ການທ່ອງທ່ຽວວັດທະນະທຳ ແລະ ປະຫວັດສາດ ສ້າງໃຫ້ແຂວງ ອຸດົມໄຊ ກາຍເປັນຈຸດໝາຍປາຍທາງການທ່ອງທ່ຽວຂອງນັກທ່ອງທ່ຽວ, ເຊື່ອມໂຍງເຂົ້າກັບການທ່ອງທ່ຽວລະດັບພາກພື້ນ ແລະ ສາກົນ, ພັດທະນາ ແລະ ສົ່ງເສີມການທ່ອງທ່ຽວໃຫ້ກາຍເປັນຂະແໜງເສດຖະກິດ ຊ່ວຍໃຫ້ປະຊາຊົນຫລຸດພົ້ນອອກຈາກຄວາມທຸກຍາກ ແລະ ເຮັດໃຫ້ການບໍລິການການທ່ອງທ່ຽວເປັນໜຶ່ງໃນ 4 ໃຈກາງການພັດທະນາແຂວງ ອຸດົມໄຊ. ຕ້ອງສຸມໃສ່ຫນ້າວຽກຈຸດສຸມດັ່ງນີ້, ພັດທະນາການທ່ອງທ່ຽວແບບອະນຸລັກປະຊາຊົນມີສ່ວນຮ່ວມຢ່າງມີຈຸດສຸມ. ພັດທະນາຜະລິດຕະພັນການທ່ອງ ທ່ຽວໃຫ້ມີຄຸນນະພາບ, ມີຄວາມຫຼາກຫຼາຍ, ປັບປຸງການບໍລິການໃຫ້ມີຄຸນນະພາບ, ປັບປຸງສິ່ງອຳນວຍຄວາມສະດວກດ້ານຕ່າງໆ,  ດຶງດູດການລົງທຶນທັງພາຍໃນ ແລະ ຕ່າງປະເທດເພື່ອພັດທະນາສະຖານທີ່ທ່ອງທ່ຽວ ຮອງຮັບນັກທ່ອງທ່ຽວ.  ຄົ້ນຄວ້າ, ສຳຫລວດ ແລະ ວາງແຜນພັດທະນາກິດຈະກຳການທ່ອງທ່ຽວຢູ່ຕາມແຫຼງທ່ອງທ່ຽວຕ່າງໆ. ສໍາຫຼວດປັກຫຼັກຫມາຍ, ອອກໃບຕາດິນຄຸ້ມຄອງແຫຼ່ງທ່ອງທ່ຽວ ບ່ອນທີ່ມີເງື່ອນໄຂໃຫ້ໄດ້ 15 ແຫ່ງ.   ສືບຕໍ່ເປີດກວ້າງຮ່ວມມືທ່ອງທ່ຽວກັບແຂວງໃກ້ຄຽງ ພາຍໃນ ແລະ ຕ່າງປະເທດ ຈັດກອງປະຊຸມແລກປ່ຽນ, ທັດສະນະສຶກສາ, ວາງແຜນຮ່ວມກັນພັດທະນາວົງຈອນເຊື່ອມໂຍງການທ່ອງທ່ຽວ, ຝຶກອົບຮົມຍົກລະດັບດ້ານບຸກຄະລະກອນພາກ​ລັດພາກທຸ​ລະ​ກິດ, ເຂົ້າຮ່ວມງານວາງສະແດງແລກປ່ຽນຂໍ້ມມູນຂ່າວສານ, ຮ່ວມມືພາກທຸລະກິດຫຼາຍ​ຝ່າຍທີ່ໄດ້ມີບົດບັນທຶກຊ່ວຍຈໍາຮ່ວມ​ກັນ​.  ຄຸ້ມຄອງ, ຕິດຕາມ ກວດກາ, ປັບປຸງ ແລະ ຈັດລະດັບມາດຕະຖານ ຜະລິດຕະພັນການທ່ອງທ່ຽວ ແລະ ການບໍລິການຂອງທຸລະກິດການທ່ອງທ່ຽວທົ່ວແຂວງ ອຸດົມໄຊ ເຊັ່ນ: ໂຮງແຮມ, ເຮືອນພັກ, ພັດຕະຄານ, ຮ້ານອາຫານ, ຮ້ານກິນດື່ມ, ສະຖານທີ່ບັນເທີງ, ສະຖານທີ່ທ່ອງທ່ຽວແລະອື່ນໆ.   ຈັດກິດຈະກຳສົ່ງເສີມການທ່ອງທ່ຽວຕິດພັນກັບການໂຄສະນາການທ່ອງທ່ຽວທາງດ້ານທຳມະຊາດ, ປະຫວັດສາດ ແລະ ວັດທະນະທຳ ຂອງແຂວງ ອຸດົມໄຊ ໃຫ້ເຂົ້າເຖິງກຸ່ມນັກທ່ອງທ່ຽວທີ່ເປັນເປົ້າມາຍທັງຢູ່ພາຍໃນແລະຕ່າງປະເທດ, ສົ່ງເສີມການອະນຸລັກ, ນຳໃຊ້ ແລະ ພັດທະນາຊັບພະຍາກອນການທ່ອງທ່ຽວຢ່າງມີປະສິດທິພາບ ແລະ ເປັນມິດກັບສິ່ງແວດລ້ອມ.  ຍົກລະດັບຂີດຄວາມສາມາດ, ສ້າງຄວາມເຂັ້ມແຂງຂອງບຸກຄະລາກອນໃນຂະແໜງການທ່ອງທ່ຽວ ໃຫ້ມີປະສິດທິພາບ ແລະ ສາມາດເຊື່ອມໂຍງກັບສາກົນເທື່ອລະກ້າວ.  ເອົາ​ໃຈ​ໃສ່​ຊຸກຍູ້​ຂະ​ບວນສີ​ລະ​ປະ-ວັນນະຄະດີ​ ທັງ​ອາຊີບ​ ແລະ ສະມັກ​ຫຼີ້ນ​ໃຫ້​ໄດ້​ເຄື່ອນ​ໄຫວ​ສະ​ແດງ, ສົ່ງ​ເສີມ​ການ​ປະດິດ​ຄິດ​ແຕ່ງ​ບົດ​ເພງ, ບົດ​ຟອ້ນ, ບົດ​ຮ້ອງ ແລະ ລາຍ​ການ​ອື່ນໆ​ໃຫ້​ມີ​ຫຼາຍ​ສີສັນ.    ພັດທະນາ ແລະ ປັບປຸງຫຼັກສູດການຝຶກອົບຮົມວຽກງານ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໃຫ້ມີປະສິດທິພາບ.

ຂ່າວຈາກ: ແສງອາທິດ