ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະພາບອາກາດຮ້ອນອົບເອົາຫລາຍ ບາງມື້ອຸນຫະພຸມສູງເຖິງ 40 ກວ່າອົງສາ ໃນໄລຍະຜ່ານມານີ້ເຮັດໃຫ້ຄົວເຮືອນຕ່າງໆ ຊົມໃຊ້ໄຟຟ້າເກີນຂອບເຂດ ປະກອບກັບການເພີ່ມຂຶ້ນຂອງລົດໄຟຟ້າ ເຮັດໃຫ້ການຊົມໃຊ້ໄຟຟ້າເພີ່ມຂຶ້ນ 53% ທຽບໃສ່ໄລຍະດຽວກັນຂອງປີຜ່ານມາ. ສະນັ້ນ, ສົ່ງຜົນໃຫ້ເກີດບັນຫາໄຟຟ້າບໍ່ພຽງພໍ, ໄຟດັບ ແລະ ໝໍ້ແປງມີບັນຫາ.
ທ່ານ ສົມຊາຍ ລາດສະວົງ ຮອງຫົວໜ້າສາຂານະຄອນຫລວງ 1 ລັດວິສາຫະກິດໄຟຟ້າລາວ ໄດ້ໃຫ້ສຳພາດໃນວັນທີ 16 ພຶດສະພາ 2024 ວ່າ: ເພື່ອແກ້ໄຂບັນຫາດັ່ງກ່າວ, ໄຟຟ້າລາວ ສາຂານະຄອນຫລວງ 1 ໄດ້ເອົາໃຈໃສ່ເລັ່ງແກ້ໄຂບັນຫາດັ່ງກ່າວ ເປັນຕົ້ນ ໄດ້ມີການຍົກກຳລັງໝໍ້ແປງ ແລະ ເສີມກຳລັງໝໍແປງໃໝ່ ເພື່ອໃຫ້ມີກຳລັງການຊົມໃຊ້ໄຟຟ້າສູງຂຶ້ນ ເຊິ່ງນັບແຕ່ເດືອນມັງກອນ ຫາ ເດືອນມີນາ 2024 ໄຟຟ້າລາວ ສາຂານະຄອນຫລວງ 1 ສາມາດຍົກກຳລັງໝໍ້ແປງ ແລະ ເສີມກຳລັງໝໍແປງໃໝ່ 64 ໜ່ວຍ, ສະເພາະເດືອນເມສາ ຮອດປັດຈຸບັນ ສາມາດຈັດຕັ້ງປະຕິບັດໄດ້ 48 ໜ່ວຍ, ໃນ 4 ເມືອງທີ່ເປັນຄວາມຮັບຜູ້ຊອບຄື: ເມືອງຈັນທະບູລີ, ເມືອງສີໂຄດສະບອງ, ເມືອງສີີສັດຕະນາກ ແລະ ເມືອງໄຊເສດຖາ.
ພ້ອມນີ້, ຍັງໄດ້ແຕ່ງຕັ້ງທີມງານລະດູຮ້ອນຂຶ້ນ 7 ທີມ ເພື່ອແກ້ໄຂບັນຫາສຸກເສີນ ເປັນຕົ້ນ ເສົາໄຟຟ້າລົ້ມ, ໝໍ້ມີບັນຫາ, ໄຟໄໝ້ສາຍໄຟຟ້າ ແລະ ບັນຫາອື່ນໆ ເພື່ອແກ້ໄຂບັນຫາໃຫ້ທັນການ.
ສຳລັບຄົວເຮືອນໃດ ທີ່ໃຊ້ລົດໄຟຟ້າ ຈະຕ້ອງແຈ້ງເຖິງໄຟຟ້າລາວ ເພື່ອລົງໄປຕິດຕາ, ກວດກາ ແລະ ວັດແທກເບິ່ງກຳລັງການຊົມໃຊ້ໄຟຟ້າ ຂອງລົດໄຟຟ້າມີຫລາຍ-ໜ້ອຍປານໃດ, ວັດແທກກຳລັງໝໍ້ແປງ ວ່າຈະສາມາດຮັບຮ້ອງໄດ້ບໍ່ ໃນກໍລະນີ້ບ້ານນັ້ນໆ ມີຈຳນວນການໃຊ້ລົດໄຟຟ້າຫລາຍຂຶ້ນ, ຖ້າຫາກວັດແທກກຳລັງໝໍ້ແປງດັ່ງກ່າວແລ້ວ ບໍ່ສາມາດຮັບຮ້ອງການສົ່ງກະໄຟຟ້າໄດ້ ກໍຈະໄດ້ປ່ຽນຖ່າຍໝໍ້ແປງແຕ່ຫົວທີ. ເຖິງຢ່າງໃດກໍຕາມ, ປັດຈຸບັນຍັງບໍ່ສາມາດເກັບກຳສະຖິຕິ ການໃຊ້ລົດໄຟຟ້າ ຂອງບ້ານໄດ້ເທື່ອ.
ໃນໂອກາດນີ້, ທ່ານ ສົມຊາຍ ລາດສະວົງ ຍັງຝາກເຖິງ ພໍ່-ແມ່ ປະຊາຊົນ ໃນຂອບເຂດທົ່ວປະເທດ ຈົ່ງຊ່ວຍກັນປະຢັດພະລັງງານໄຟຟ້າ ເປັນຕົ້ນຫລີກລ່ຽງການໃຊ້ໝໍແດງ, ຕົ້ມນໍ້າຮ້ອນຝົດແລ້ວ ຄວນຖອດປັກທັນທີ, ຄວນປີດຕູ້ເຢັນເວລາໃຊ້ງານແລ້ວ, ເປີດແອໜ່ວຍດຽວໃນເວລາ 18-20 ໂມງແລ້ວເອີ້ນສະມາຊິກຄອບຄົວມາຢູ່ນຳກັນ ຫລີກລ້ຽງເປີດແອຫ້ອງໃຜຫ້ອງລາວ. ປັດຈຸບັນ, ເປັນໄລຍະລະດູຮ້ອນ ກ້າວເຂົ້າສູ່ລະດູຝົນ ແຈ້ງເຕືອນໃຫ້ຜູ້ຊົມໃຊ້ໄຟຟ້າ ນຳໃຊ້ໄຟຟ້າຢ່າງລະມັດລະວັງ ແລະ ມີສະຕິ ຫາກພົບເຫັນອຸບັດເຫດ ທີ່ເກີດຈາກໄຟຟ້າ ສາມາດແຈ້ງສາຍດ່ວນ 1199 ຕະຫລອດ 24 ຊົ່ວໂມງ.