ການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 9 ໃນຕອນເຊົ້າ 22 ມິຖຸນາ 2022 ຢູ່ຫໍປະຊຸມສະພາແຫ່ງຊາດ ນະຄອນຫຼວງວຽງຈັນ, ພາຍໃຕ້ການເປັນປະທານຂອງ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ສືບຕໍ່ປະກອບຄຳເຫັນໃສ່ບົດລາຍງານຂອງອົງການໄອຍະການປະຊາຊົນສູງສຸດ, ຮັບຟັງການອະທິບາຍຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດທີ່ຕິດພັນກັບບົດລາຍງານຂອງລັດຖະບານກ່ຽວກັບຄວາມຄືບໜ້າການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຈາກຫົວໜ້າອົງການໄອຍະການປະຊາຊົນສູງສຸດ, ລັດຖະມົນຕີກະຊວງປ້ອງກັນຄວາມສະຫງົບ ແລະ ລັດຖະມົນຕີກະຊວງຍຸຕິທຳ.
ທ່ານ ນາງ ມະໄລສີ ທຳມະໂຄດ ສະມາຊິກສະພາແຫ່ງຊາດເຂດເລືອກຕັ້ງທີ 10 ແຂວງວຽງຈັນ ໄດ້ປະກອບຄຳເຫັນສະເໜີໃຫ້ລັດຖະບານກໍ່ຄືພາກສ່ວນກ່ຽວຂ້ອງສຸມໃສ່ໂຄສະນາເຊື່ອມຊືມກ່ຽວກັບລະບຽບກົດໝາຍຕ່າງໆທີ່ຕິດພັນກັບການແກ້ໄຂບັນຫາຢາເສບຕິດ ລວມທັງຜົນຮ້າຍ ແລະ ໄພອັນຕະລາຍຂອງຢາເສບຕິດໃຫ້ທົ່ວເຖິງ ນັບແຕ່ສູນກາງລົງຮອດທ້ອງຖິ່ນໃຫ້ຫຼາຍຂຶ້ນກວ່າເກົ່າ ເນື່ອງຈາກວ່າໄລຍະຜ່ານມາການຈັດຕັ້ງປະຕິບັດວຽກງານນີ້ຍັງເຮັດບໍ່ໄດ້ດີເທົ່າທີ່ຄວນ.
ພົນຈັດຕະວາ ມາລາ ວິລະຈິດ ສະມາຊິກສະພາແຫ່ງຊາດເຂດເລືອກຕັ້ງທີ 13 ແຂວງສະຫວັນນະເຂດ ປະກອບຄຳເຫັນສະແດງຄວາມຍ້ອງຍໍຊົມເຊີຍລັດຖະບານກໍ່ຄື ຂະແໜງການໄອຍະການທີ່ເອົາໃຈໃສ່ຕັ້ງໜ້າຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃຫ້ເປັນແຜນງານລະອຽດ ເຫັນວ່າຫຼາຍໜ້າວຽກໄດ້ຮັບການຈັດຕັ້ງປະຕິບັດຢ່າງມີຜົນສຳເລັດໂດຍພື້ນຖານ ແຕ່ຢາກສະເໜີໃຫ້ລັດຖະບານທົບທວນຄືນໃຫ້ລະອຽດກ່ຽວກັບບາງເນື້ອໃນທີ່ຕິດພັນກັບວຽກງານແກ້ໄຂບັນຫາຢາເສບຕິດວ່າ ຜ່ານການຈັດຕັ້ງປະຕິບັດມາມີອັນໃດແດ່ຍັງເປັນຂໍ້ຄົງຄ້າງ ຕິດພັນກັບການຍົກລະດັບວຽກງານນີ້ໃຫ້ເປັນໜ້າທີ່ຄວາມຮັບຜິດຊອບຂອງທຸກຄົນໃນສັງຄົມ.
ພາຍຫຼັງສະມາຊິກສະພາແຫ່ງຊາດແຕ່ລະເຂດເລືອກຕັ້ງໄດ້ປະກອບຄຳເຫັນໃສ່ບົດລາຍງານຂອງອົງການໄອຍະການປະຊາຊົນສູງສຸດກ່ຽວກັບຄວາມຄືບໜ້າການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດແລ້ວ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ໄດ້ຂຶ້ນຊີ້ແຈງອະທິບາຍເພີ່ມຕື່ມໃນຫຼາຍບັນຫາທີ່ສະມາຊິກສະພາແຫ່ງຊາດໃຫ້ຄວາມສົນໃຈໂດຍສະເພາະກ່ຽວກັບການຈັດຕັ້ງຜັນຂະຫຍາຍວາລະແຫ່ງຂອງອົງການໄອຍະການປະຊາຊົນສູງສຸດໃນໄລຍະຜ່ານມາ, ການປັບປຸງກົງຈັກການຈັດຕັ້ງຂອງອົງການໄອຍະການປະຊາຊົນ ແລະ ການຕິດຕາມກວດກາສະຖານທີ່ຄຸມຂັງດັດສ້າງ ແລະ ສະຖານທີ່ກັກຕົວ.
ຈາກນັ້ນລັດຖະມົນຕີກະຊວງປ້ອງກັນຄວາມສະຫງົບ ແລະ ລັດຖະມົນຕີກະຊວງຍຸຕິທຳໄດ້ຊີ້ແຈງອະທິບາຍເພີ່ມຕື່ມຕໍ່ຄຳຊັກຖາມຂອງສະມາຊິກສະພາແຫ່ງຊາດກ່ຽວກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ.
ສຳລັບການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 9 ໃນຕອນບ່າຍມື້ນີ້ຕາມວາລະແລ້ວສະມາຊິກສະພາແຫ່ງຊາດແຕ່ລະເຂດເລືອກຕັ້ງຈະພ້ອມກັນພິຈາລະນາບົດລາຍງານຂອງລັດຖະບານກ່ຽວກັບທິດທາງການປະຕິຮູບລັດວິສາຫະກິດລວມທັງການປັບປຸງໂຄງສ້າງຂອງທະນາຄານທຸລະກິດລັດ.
ຂ່າວ: ເດດອາລຸນ
ພາບ: ຕາລີເຊ້ຍ