ການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 9 ໃນຕອນເຊົ້າມື້ນີ້ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ສະມາຊິກສະພາແຫ່ງຊາດຈາກແຕ່ລະເຂດເລືອກຕັ້ງໄດ້ຮັບຟັງການຂຶ້ນອະທິບາຍຊີ້ແຈງເພື່ອໃຫ້ຄວາມກະຈ່າງແຈ້ງຕໍ່ຄຳຊັກຖາມຂອງສະມາຊິກສະພາແຫ່ງຊາດ ຈາກບັນດາຜູ້ຕາງໜ້າກະຊວງທີ່ກ່ຽວຂ້ອງໂດຍເລີ່ມຈາກ ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ໄດ້ຂຶ້ນອະທິບາຍຊີ້ແຈງ 4 ຄຳຖາມທີ່ກ່ຽວຂ້ອງກັບການຈັດຕັ້ງປະຕິບັດເປົ້າໝາຍທີ 1 ຕິດພັນກັບເປົ້າໝາຍທີ 3 ຂອງແຜນພັດທະນາເສດຖະກິດ-ສັງຄົມແຫ່ງລັດ, ຊີ້ແຈງກ່ຽວກັບຫຼັກການ ແລະ ເງື່ອນໄຂໃນການກຳນົດໂຄງປະກອບການຈັດສັນງົບປະມານການລົງທຶນຂອງລັດປີ 2023, ຊີ້ແຈງກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການລົງທຶນ ມາດຕາທີ 18 ແລະ 19 ແລະ ຊີແຈງກ່ຽວກັບການຈັດຕັ້ງປະຕິບັດການຈັດສັນງົບປະມານສຳລັບຂະແໜງຕ່າງໆ.
ໃນນີ້ ສະເພາະຄຳຖາມກ່ຽວກັບຫຼັກການ ແລະ ເງື່ອນໄຂໃນການກຳນົດໂຄງປະກອບການຈັດສັນງົບປະມານການລົງທຶນຂອງລັດປີ 2023 ທ່ານໄດ້ຊີ້ແຈງ ແລະ ສະເໜີໃຫ້ແຕ່ລະພາກສ່ວນສືບຕໍ່ຈັດຕັ້ງປະຕິບັດຕາມທີ່ກະຊວງແຜນການ ແລະ ການລົງທຶນໄດ້ກຳນົດໄວ້ສະເພາະໄດ້ສົ່ງໃຫ້ຄະນະປະຈຳສະພາແຫ່ງຊາດຮຽບຮ້ອຍແລ້ວ.
ຕໍ່ມາ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ຂຶ້ນອະທິບາຍຊີ້ແຈງຫຼາຍຄຳຖາມ, ໃນນີ້ ສະເພາະຄໍາຖາມທີ່ກ່ຽວຂ້ອງກັບເງິນເດືອນຂອງພະນັກງານ ທ່ານໄດ້ອະທິບາຍຊີ້ແຈງວ່າ ກະຊວງການເງິນ ກຳລັງຮ່ວມກັບຂະແໜງການກ່ຽວຂ້ອງຄົ້ນຄວ້າເພື່ອເພີ່ມດັດຊະນີເງິນເດືອນຂອງພະນັກງານຄືນໃໝ່ເພື່ອໃຫ້ເໝາະສົມກວ່າເກົ່າ.
ຫຼັງຈາກນັ້ນ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ຂຶ້ນອະທິບາຍຊີ້ແຈງຫຼາຍຄຳຊັກຖາມເຊັ່ນດຽວກັນ ໃນນີ້ ສະເພາະຄຳຖາມກ່ຽວກັບສະພາບການເງິນເຟີ້ຢູ່ລາວ ທ່ານໄດ້ອະທິບາຍຊີ້ແຈງວ່າ ເງິນເຟີ້ຢູ່ລາວເກີດຂຶ້ນຈາກສອງປັດໃຈສຳຄັນຄື ເງິນກີບອ່ອນຄ່າ ແລະ ລາຄານ້ຳມັນ ເພື່ອແກ້ໄຂບັນຫານີ້ໃນປີໜ້າລັດຖະບານຕ້ອງຄຸ້ມຄອງອັດຕາແລກປ່ຽນລວມເຖິງພະຍາຍາມເຮັດໃຫ້ເງິນກີບແຂງຄ່າຂຶ້ນກວ່າເກົ່າ.
ຕໍ່ມາ ກອງປະຊຸມໄດ້ຮັບຟັງການຂຶ້ນອະທິບາຍຊີ້ແຈງຈາກຜູ້ຕາງໜ້າ 2 ກະຊວງຄື: ກະຊວງອຸດສາຫະກຳການຄ້າ ແລະ ກະຊວງກະສິກຳ ແລະ ປ່າໄມ້.
ສຳລັບການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 9 ໃນຕອນບ່າຍມື້ນີ້ ຕາມວາລະແລ້ວ ສະມາຊິກສະພາແຫ່ງຊາດຈະໄດ້ຮັບຟັງການຂຶ້ນອະທິບາຍຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດຈາກຜູ້ຕາງໜ້າ 4 ກະຊວງຄື: ກະຊວງພະລັງງານ ແລະ ບໍ່ແຮ່, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງແຮງງານ ແລະ ສະຫວັດດີການສັງຄົມ ແລະ ກະຊວງສຶກສາທິການ ແລະ ກິລາ.