ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ການທູດລາວ ສືບຕໍ່ໄດ້ຮັບການຍົກລະດັບຂຶ້ນຢ່າງສະເໝີຕົ້ນສະເໝີປາຍ (ເນື່ອງໃນໂອກາດ ຄົບຮອບ 74 ປີ ວັນການທູດລາວ: 12 ຕຸລາ 1945-12 ຕຸລາ 2019)

ໃນທ່າມກາງບັນຍາກາດ ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ພ້ອມກັນອອກແຮງແຂ່ງຂັນ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກ, ສືບຕໍ່ປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 8 ຢ່າງຟົດຟື້ນ ແລະ ມີໝາກຜົນອັນຈົບງາມນີ້, ເນື່ອງໃນໂອກາດວັນການທູດລາວ ຄົບຮອບ 74 ປີ ວຽກງານການຕ່າງປະເທດ ສືບຕໍ່ໄດ້ຮັບການຍົກລະດັບ ແລະ ມີໝາກຜົນສຳເລັດອັນໃໝ່ໃນເວທີສາກົນ ຢ່າງສະເໝີຕົ້ນສະເໝີປາຍ, ແລະ ປະເທດຊາດ ສືບຕໍ່ໄດ້ຮັບການພັດທະນາຢ່າງມີບາດກ້າວ ແລະ ເຂັ້ມແຂງ, ສັງຄົມມີຄວາມສະຫງົບ, ການເມືອງມີຄວາມເຂັ້ມແຂງ, ເສດຖະກິດ ໄດ້ຮັບການພັດທະນາຂຶ້ນເປັນກ້າວໆ ແລະ ທີ່ຕັ້ງບົດບາດຂອງປະເທດຊາດ ກໍ່ນັບມື້ນັບໄດ້ຮັບການຍົກສູງຂຶ້ນເລື້ອຍໆໃນເວທີພາກພື້ນ ແລະ ສາກົນ.

ວັນທີ 12 ຕຸລາ 1945 ແມ່ນວັນທີ່ມີຄວາມໝາຍສຳຄັນ​ທາງປະຫວັດສາດຂອງຊາດລາວ, ເປັນວັນແຫ່ງການປະກາດເອກະລາດຂອງຊາດລາວ​ເຮົາ​ຕໍ່​ໂລກ ເພື່ອເຮັດ​ໃຫ້​ໂລກ​ໄດ້ຮັບ​ຮູ້​ວ່າ ​ໃນ​ແຜ່ນ​ດິນ​ແຫ່ງ​ນີ້ມີ​ປະ​ເທດ​ລາວ ​ແມ່ນ​ຄົນ​ລາວ​ເປັນ​ເຈົ້າ​ຂອງ​ປະ​ເທດ​ຊາດ ອຳນາດ​ອະທິປະ​ໄຕ ​ແລະ ຜືນ​ແຜ່ນດິນອັນ​ຄົບ​ຖ້ວນ​ຂອງ​ຕົນ, ຊຶ່ງເປັນໝາກຜົນຂອງການຕໍ່ສູ້ອັນຍືດເຍື້ອຍາວນານຂອງປະຊາຊົນລາວທົ່ວທັງຊາດຜ່ານຫຼາຍສະໄໝຕ້ານຈັກກະພັດຜູ້ຮຸກຮານ. ລັດຖະບານ​ລາວອິດສະຫຼະ ​ໄດ້​ຮັບ​ການ​ສ້າງ​ຕັ້ງ​ຂຶ້ນ ​ແລະ ​ໄດ້​ປະກາດ​ນະ​ໂຍບາຍ 12 ຂໍ້ ​ໃນ​ນັ້ນ ໄດ້ປະກາດ​ນະ​ໂຍບາຍ​ການ​ຕ່າງປະ​ເທດ ​ອອກ​ຢ່າງ​ເປັນ​ທາງ​ການ, ນັບແຕ່ນັ້ນມາ ວັນ​ທີ 12 ຕຸລາ 1945 ຈຶ່ງໄດ້​ກາຍ​ມາເປັນ​ວັນ​ການ​ທູດ​ລາວ. ຕະຫລອດໄລຍະ 74 ປີ ຂອງການເຄື່ອນໄຫວວຽກງານການຕ່າງປະເທດ, ພາຍ​ໃຕ້​ການຊີ້ນຳ-ນຳພາ​ອັນສະຫຼາດ​ສ່ອງ​ໄສ ​ແລະ ຄວາມປີ​ຊາ​ສາມາດ​ຂອງຜູ້ນຳພັກ-ລັດ ເຮົາ, ວຽກ​ງານ​ຕ່າງປະ​ເທດ​ ໄດ້​ປະກອບສ່ວນ​ຢ່າງຕັ້ງ ໜ້າ ແລະ ຫ້າວຫັນເຂົ້າ​ໃນ​ພາລະກິດ​ຕໍ່ສູ້​ກູ້​ຊາດ ທີ່​ສາມາດ​ຍາດ​ໄດ້​ຈາກ​ໄຊຊະນະ​ນີ້ ​ໄປ​ສູ່​ໄຊຊະນະ​ອື່ນ​ຢ່າງເນື່ອງນິດລຽນຕິດ, ຈົນໃນ​ທີ່​ສຸດ​ການ​ປະຕິວັດ​ຊາດ ປະຊາທິປະ​ໄຕ ຢູ່​ປະ​ເທດ​ເຮົາ ​ໄດ້​ສຳ​ເລັດ​ລົງ​ດ້ວຍ​ການ​ປະກາດ​ສະຖາປະນາ ສປປ ລາວ ​ໃນ​ວັນ​ທີ 2 ທັນວາ 1975. ນັບແຕ່ນັ້ນມາ, ການເຄື່ອນໄຫວຕ່າງປະເທດຂອງ ສປປ ລາວ ໄດ້ເຕີບໃຫຍ່ຂະຫຍາຍຕົວເທື່ອລະກ້າວ ແລະ ມີຜົນສໍາເລັດເປັນທີ່ໜ້າພາກພູມໃຈ, ຖັນແຖວຂອງນັກຮົບການເມືອງການຕ່າງປະເທດນັບມື້ເຂັ້ມແຂງ, ຊື່ສຽງ ບົດບາດຂອງ ສປປ ລາວ ກໍນັບມື້ສູງເດັ່ນຂຶ້ນຢູ່ໃນເວທີພາກພື້ນ ແລະ ສາກົນ. ສປປ ລາວ ພວກເຮົາສືບຕໍ່ປະຕິບັດແນວທາງການຕ່າງປະເທດທີ່ຖືກຕ້ອງເປັນທຳ ໂດຍຍຶດໝັ້ນແນວທາງສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ, ສືບຕໍ່ລົງເລິກປະຕິບັດຄຳຂັວນການຕ່າງປະເທດທີ່ວ່າ: ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ ຢ່າງໄດ້ຮັບຜົນດີ; ອັນສະແດງອອກໃນການເສີມຂະຫຍາຍຮັດແໜ້ນການພົວພັນມິດຕະພາບ ແລະ ການຮ່ວມມືຮອບດ້ານ ທີ່ມີໝາກຜົນຕົວຈິງຢ່າງເລິກເຊິ່ງ ກັບບັນດາປະເທດເພື່ອນມິດຍຸດທະສາດ ແລະ ເພື່ອນມິດຕ່າງໆໃນທົ່ວໂລກ; ວຽກງານການທູດສອງຝ່າຍ, ຫຼາຍຝ່າຍ ແລະ ການພົວພັນກັບອົງການຈັດຕັ້ງສາກົນຕ່າງໆ ກໍ່ໄດ້ສືບຕໍ່ມີໝາກຜົນທີ່ພົ້ນເດັ່ນ. ວຽກງານການຕ່າງປະເທດ ໄດ້ປະກອບສ່ວນອັນສຳຄັນເຂົ້າ​ໃນ​ວຽກງານ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ, ​ໄດ້​ສ້າງ​ເງື່ອນ​ໄຂ​ເອື້ອອຳນວຍ​ໃຫ້​ແກ່​ການ​ພັດທະນາ​ເສດຖະກິດ-ສັງ​ຄົມ ນັບ​ທັງ​ການ​ຂົນຂວາຍຍາດ​ແຍ່ງ​ການ​ຊ່ວຍ​ເຫຼືອ ​ແລະ ການລົງທຶນ​ຂອງ​ຕ່າງປະ​ເທດ, ​ຊຶ່ງ​ເປັນ​ການ​ປະກອບສ່ວນ​ເຂົ້າໃນຜົນສຳເລັດລວມຂອງຊາດ ເໝືອນດັ່ງຂະແໜງການອື່ນໆ ທີ່ປະກອບເຂົ້າເປັນກຳລັງແຮງສັງລວມຂອງຊາດເຮົາໃຫ້ເຂັ້ມແຂງ ແລະ ຂະຫຍາຍຕົວດ້ວຍບາດກ້າວໜັກແໜ້ນຕໍ່ເນື່ອງ, ເຊິ່ງພັກເຮົາໄດ້ຕີລາຄາ ແລະ ມີຄວາມເອກອ້າງທະນົງໃຈວ່າ: ໃນປະຫວັດສາດຂອງຊາດລາວ ບໍ່ມີຍຸກໃດ ແລະ ສະໄຫມໃດ ທີ່ປະເທດຊາດອັນແສນຮັກຂອງພວກເຮົາ ຈະໄດ້ມີຄວາມຮົ່ມເຢັນເປັນສຸກ, ໄດ້ຮັບການພັດທະນາຈະເລີນກ້າວຫນ້າ ຄືກັນກັບໃນທຸກມື້ນີ້ ​ແລະ ບໍ່​ມີ​ຍຸກ​ໃດ​ສະ​ໄໝ​ໃດ ທີ່​ບົດ​ບາດ​ອິດ​ທິພົນ​ຂອງ​ປະ​ເທດ​ເຮົາ ຈະ​ໄດ້​ຮັບ​ການ​ຍ້ອງຍໍສັນລະເສີນ ແລະ ໄດ້ຮັບການຍົກ​ສູງ​ຢ່າງໂດດ​ເດັ່ນໃນເວທີການພົວພັນການທູດກັບສາກົນ ດັ່ງເທົ່າທຸກມື້​ນີ້.

ໃນທ່າມກາງທີ່ສະພາບການພາກພື້ນ ແລະ ສາກົນ ທີ່ມີການຜັນແປໄປຢ່າງເລິກເຊິ່ງ, ສັບສົນ ແລະ ໄວວານີ້ ການປະຕິບັດແນວທາງການຕ່າງປະເທດ, ການເຄື່ອນໄຫວວຽກງານການທູດທີ່ຖືກຕ້ອງ ແລະ ສອດຄ່ອງຍິ່ງມີຄວາມຈໍາເປັນ ແລະ ຕ້ອງການກວ່າເວລາໃດໝົດ ເພື່ອສ້າງເງື່ອນໄຂສະພາບແວດລ້ອມພາຍນອກ ທີ່ເອື້ອອໍານວຍໃຫ້ແກ່ການປົກປັກ ຮັກສາ ແລະ ສ້າງສາພັດທະນາປະເທດຊາດໃຫ້ນັບມື້ນັບເຂັ້ມແຂງ ກ້າວໄປສູ່ຄວາມສໍາເລັດໃນເປົ້າໝາຍ ນໍາເອົາປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາ ແລະ ສ້າງປະເທດໃຫ້ເປັນປະເທດທີ່ໝັ້ນຄົງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ. ມະຕິກອງປະຊຸມໃຫຍ່ຄັ້ງທີ X ຂອງພັກ ໄດ້ສືບຕໍ່ຢັ້ງຢືນວ່າ: ພວກເຮົາຕ້ອງສືບຕໍ່ຮັກສາມູນເຊື້ອອັນດີງາມໃນການປະຕິບັດບົດບາດໜ້າທີ່ການຕ່າງປະເທດ ພາຍໃຕ້ຄໍາຂວັນ ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ພັັດທະນາປະເທດຊາດ”, ໂດຍຍຶດໝັ້ນແນວທາງການຕ່າງປະເທດຂອງພັກ: ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປັນເຈົ້າການໃນການເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມອາຊຽນ, ຕາມທິດທາງດ້ານວຽກງານການຕ່າງປະເທດ ທີ່ກອງປະຊຸມໃຫຍ່ຄັ້ງທີ X ຂອງພັກໄດ້ວາງອອກ.

ວຽກງານການທູດລາວ ໄດ້ມີການເຄື່ອນໄຫວຢ່າງເອົາຈິງເອົາຈັງ ທັງໃນດ້ານການທູດສອງຝ່າຍ ແລະ ຫຼາຍຝ່າຍ, ເປັນເຈົ້າການໃນການປົກປ້ອງສິດ ແລະ ຍາດຜົນປະໂຫຍດອັນຊອບທຳຈາກສາກົນ ມາສູ່ປະເທດຊາດ, ເຄື່ອນໄຫວຢ່າງເປັນເຈົ້າການຢູ່ເວທີພາກພື້ນ ແລະ ສາກົນ, ໄດ້ເຂົ້າເປັນສະມາຊິກຂອງອົງການຈັດຕັ້ງສາກົນຕ່າງໆ, ປະຕິບັດພັນທະສາກົນທາງດ້ານກົດໝາຍຢ່າງຕັ້ງໜ້າ, ປະກອບສ່ວນຕາມພັນທະສາກົນ ໃນຂອບການຮ່ວມມືຂອງບັນດາອົງການຕ່າງໆໃນພາກພື້ນ ແລະ ສາກົນ, ເປັນຕົ້ນແມ່ນ ໃນເວທີອົງການສະຫະປະຊາຊາດ, ອາຊຽນ, ອາເຊັມ, ອົງການການຄ້າໂລກ, ອົງການຝຣັງໂກໂຟນີ, ການເຄື່ອນໄຫວຂອງກຸ່ມ 77, ຂະບວນການບໍ່ຮ່ວມກຸ່ມ, ກຸ່ມບັນດາປະເທດດ້ອຍພັດທະນາ, ກຸ່ມບັນດາປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ ແລະ ອົງການຈັດຕັ້ງສາກົນຕ່າງໆ, ເຂົ້າຮ່ວມແກ້ໄຂບັນຫາລວມຂອງໂລກ, ໄກ່ເກຍບັນຫາສຳຄັນຂອງພາກພື້ນ ແລະ ສາກົນ, ສະໜັບສະໜູນການຕໍ່ສູ້ເພື່ອສັນຕິພາບ, ຕ້ານໄພອັນຕະລາຍຂອງສົງຄາມ, ການຊ່ວງເສັງກຳລັງປະກອບອາວຸດ, ການກໍ່ການຮ້າຍ, ການແກ້ໄຂບັນຫາສະພາບດິນຟ້າອາກາດ ແລະ ອື່ນໆ.

ຍ້ອນການປະກອບສ່ວນຢ່າງຕັ້ງໜ້າ ແລະ ຕໍ່ເນື່ອງ, ດ້ວຍຄວາມຮັບຜິດຊອບສູງ ແລະ ມີໝາກຜົນດີເປັນກ້າວໆມາ ຈຶ່ງເຮັດໃຫ້ ສປປ ລາວ ໄດ້ຮັບຄວາມເຊື່ອໝັ້ນຈາກບັນດາປະເທດເພື່ອນມິດ ແລະ ສືບຕໍ່ໄດ້ຮັບກຽດເປັນເຈົ້າພາບຈັດກອງປະຊຸມສຳຄັນໃນລະດັບພາກພື້ນ ແລະ ສາກົນ ຫຼາຍຄັ້ງຢ່າງມີຜົນສຳເລັດ, ໄດ້ເປັນກຽດຕ້ອນຮັບການເດີນທາງມາຢ້ຽມຢາມ ສປປ ລາວ ຂອງຄະນະຜູ້ແທນຂັ້ນສູງປະເທດເພື່ອນມິດທີ່ສຳຄັນ ເປັນຕົ້ນແມ່ນ ສສ.ຫວຽດນາມ, ສປ ຈີນ, ສ.ກູບາ, ສະຫະພັນ ຣັດເຊຍ, ສະຫະລັດ ອາເມລິກາ, ສ.ເກົາຫຼີ, ຍີ່ປຸ່ນ, ອົງການ ສປຊ ແລະ ປະເທດອື່ນໆ. ທັງຫມົດນີ້ ໄດ້ຢັ້ງຢືນເຖິງຄວາມເຊື່ອໝັ້ນຂອງສາກົນຕໍ່ຖານະບົດບາດຂອງ ສປປ ລາວ ໃນເວທີພາກພື້ນ ແລະ ສາກົນ ກໍຄືຕໍ່ການນໍາພາຂອງພັກ-ລັດເຮົາ, ທັງເປັນການຢັ້ງຢືນເຖິງໝາກຜົນຂອງການເຄື່ອນໄຫວການທູດທີ່ຕັ້ງໜ້າ, ບໍ່ຮູ້ອິດຮູ້ເມື່ອຍຂອງການນໍາພັກ-ລັດ ກໍຄືທຸກຂະແໜງການ. ການເຄື່ອນໄຫວທີ່ມີໝາກຜົນອັນພົ້ນເດັ່ນ, ຕັ້ງໜ້າ ແລະ ມີລັກສະນະບຸກທະລຸຄືແນວນີ້ໄດ້ ກໍ່ຍ້ອນຄວາມຖືກຕ້ອງເປັນທໍາຂອງແນວທາງນະໂຍບາຍການຕ່າງປະເທດຂອງພັກ ແລະ ການເຕີບໃຫຍ່ເຂັ້ມແຂງຂອງຂະແໜງການຕ່າງປະເທດແຫ່ງ ສປປ ລາວ.

ໃນ 74 ປີ ທີ່ຜ່ານມາ, ການເຄື່ອນໄຫວວຽກງານການທູດລາວ ໄດ້ຮັບຜົນສໍາເລັດອັນໃຫຍ່ຫຼວງ. ສປປ ລາວ ມີຖານະບົດບາດສູງຂຶ້ນ, ເປັນທີ່ຮູ້ຈັກໃນວົງສາຄະນະຍາດ ໃນເວທີພາກພື້ນ ແລະ ສາກົນ ທີ່ມີເພື່ອນມິດສາກົນຢ່າງກວ້າງຂວາງ. ມາຮອດປັດຈຸບັນ, ສປປ ລາວ ໄດ້ສ້າງຕັ້ງສາຍພົວພັນທາງການທູດກັບ 143 ປະເທດ, ມີສໍານັກງານຕາງໜ້າການທູດຢູ່ຕ່າງປະເທດ 40 ແຫ່ງ, ໃນນີ້ ມີສະຖານເອກອັກຄະລັດຖະທູດ 27 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫຍ່ 11 ແຫ່ງ, ກົງສຸນກິຕິມະສັກຂອງ ສປປ ລາວ ຢູ່ຕ່າງປະເທດ 12 ແຫ່ງ, ກົງສຸນກິຕິມະສັກຂອງຕ່າງປະເທດຢູ່ ສປປ ລາວ 18 ແຫ່ງ; ມີ​ດ່ານ​ສາກົນ 27​ ແຫ່ງ; ໄດ້​ເພີ່ມ​ທະວີ​ການ​​ພົວພັນກັບ​ພັກການ​ເມືອງຕ່າງໆໃນ​ໂລກເກືອບ​ 140 ພັກ​, ໄດ້​​ສ້າງ​ຕັ້ງສະມາຄົມ​ມິດຕະພາບ​ກັບ 18 ປະ​ເທດ, ເຊິ່ງສົມທຽບໃສ່ປີ 1975 ປະເທດເຮົາມີສາຍພົວພັນການທູດພຽງແຕ່ 44 ປະເທດເທົ່ານັ້ນ.

ນອກຈາກນີ້, ສປປ ລາວ ກໍ່ໄດ້​ມີ​ຜົນ​ສໍາ​ເລັດ​​ໃນ​ວຽກ​ງານປັກ​ຫລັກ​ໝາຍຖີ່ ແລະ ບູລະນະລະບົບຫລັກຫມາຍ​ຊາຍ​ແດນກັບ ສສ ຫວຽດນາມ, ສປ ຈີນ ແລະ ສສ ມຽນມາ, ສືບຕໍ່​ສໍາຫລວດປັກ​ຫລັກ​ໝາຍ​ຊາຍ​ແດນ​ທີ່​ຍັງ​ຄົງ​ຄ້າງ​ຈຳນວນໜຶ່ງ ກັບ ຣາຊະ​ອານາຈັກ​​ໄທ ​ແລະ ຣາຊະ​ອານາຈັກກໍາປູ​ເຈຍ, ພ້ອມທັງ ໄດ້ສືບຕໍ່ຄຸ້ມຄອງ ແລະ ແກ້ໄຂບັນຫາ, ສະພາບປະກົດການຫຍໍ້ທໍ້ຕ່າງໆຢູ່ບໍເວນຊາຍແດນ ຢ່າງເປັນປົກກະຕິ. ປະຈຸບັນ ສປປ ລາວ ໄດ້ເຊັນສັນຍາຍົກເວັ້ນວີຊາກັບ 36 ປະເທດ ສຳລັບຜູ້ຖືໜັງສືຜ່ານແດນການທູດ ແລະ ລັດຖະການ, ຍົກເວັ້ນວີຊາສອງຝ່າຍສໍາລັບຜູ້ຖືຫນັງສືຜ່ານແດນທໍາມະດາກັບ 11 ປະເທດ (9 ປະເທດສະມາຊິກອາຊຽນ, ລັດເຊຍ ແລະ ມົງໂກລີ) ແລະ ຍົກເວັ້ນວີຊາຝ່າຍດຽວ ສໍາລັບຜູ້ຖືຫນັງສືຜ່ານແດນທໍາມະດາໃຫ້ກັບ 4 ປະເທດ (ສ.ເກົາຫລີ, ຍີ່ປຸ່ນ, ສະຫະພັນທະລັດສະວິດ ແລະ ລຸກຊໍາບວກ), ໄດ້ດຳເນີນການນຳໃຊ້ E-Visa ຢ່າງເປັນທາງການ ໃນວັນທີ 09 ກໍລະກົດ ປີ 2019 ທີ່ຜ່ານມາ.

ເວົ້າລວມແລ້ວ ຕະຫຼອດໄລຍະເວລາ 74 ປີ ຜ່ານມາກັບຜົນງານ ​ແລະ ຄວາມ​ສຳ​ເລັດ​ອັນ​ໃຫ່ຍຫລວງ​ຂອງ​ວຽກ​ງານ​ການ​ຕ່າງປະ​ເທດ ​ແລະ ການ​ທູດ ຂອງ​ພັກ ​ແລະ ລັດ​ເຮົາ ຍາດ​ມາ​ໄດ້​ນັ້ນ ​ແມ່ນ​ຍ້ອນ​ແນວທາງ​ອັນ​ຖືກຕ້ອງ​ສອດຄ່ອງ​ຂອງ​ພັກ​ເຮົາ, ຍ້ອນ​ການ​ຊີ້​ນຳ​ນໍາພາ​ທີ່​ໃກ້ຊິດ​ຕິດແທດ, ໂດຍກົງ ແລະ ຮອບດ້ານ ຂອງ​ກົມ​ການ​ເມືອງ​ ໃນ​ແຕ່​ລະ​ຍຸກ, ​ແຕ່​ລະສະ​ໄໝ ​ແລະ ການ​ຮ່ວມ​ແຮງ​ຮ່ວມ​ໃຈ​ກັນ​ຈັດ​ຕັ້ງ​ປະຕິບັດ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ, ລັດຖະບານ ພ້ອມ​ຄວາມ​ຮັບຜິດຊອບ ​ແລະ ການ​ຮ່ວມ​ແຮງ​ຮ່ວມ​ໃຈ​ຂອງ​ພະນັກງານ, ທະຫານ, ຕຳຫລວດ, ​ແຕ່​ສູນ​ກາງ​ຮອດ​ທ້ອງ​ຖິ່ນ, ຍ້ອນ​ການ​ເຂົ້າ​ຮ່ວມ​ຢ່າງ​ຕັ້ງໜ້າ​ຂອງ​ນັກ​ທຸລະ​ກິດ, ຜູ້​ປະກອບ​ການ ຕະຫລອດ​ເຖິງ​ປະຊາຊົນ​ລາວ​ບັນດາ​ເຜົ່າ​ໃນ​ທົ່ວປະ​ເທດ​ເຮົາ ລວມທັງ​ຄົນ​ລາວ​ຢູ່​ຕ່າງປະ​ເທດ ຊຶ່ງ​ໄດ້​ປະກອບສ່ວນ​ສຳຄັນ​ເຂົ້າ​ໃນ​ຜົນສຳ​ເລັດ​ຂອງ​ວຽກງານ​ການ​ຕ່າງປະ​ເທດ ​ແລະ ​ເປັນ​ການ​ປຸກລະດົມ​ກຳລັງ​ໃຈ​ຢ່າງ​ແຂງ​ແຮງ​ໃຫ້​ພະນັກງານ​ລັດຖະກອນ​ຂອງ​ຂະ​ແໜງ​ການ​ຕ່າງປະ​ເທດ ຊຶ່ງ​ເປັນ​ຜູ້​ປະຕິບັດ​ງານ​ຕົວ​ຈິງ​ໃນ​ແນວ​ຮົບ​ຕ່າງປະ​ເທດ ​ແລະ ການ​ທູດ​ສາມາດ​ປະຕິບັດ​ໜ້າ​ທີ່​ຂອງ​ຕົນ​ຢ່າງ​ຕັ້ງໜ້າ ​ແລະ ມີ​ຜົນສຳ​ເລັດ​ຕະຫລອດ​ໄລຍະ​ທີ່​ຜ່ານ​ມາ.

ບົດຈາກ: ກົມການຂ່າວກະຊວງການຕ່າງປະເທດ