ວັນທີ 12 ຕຸລາ 2023 ນີ້ ທີ່ຫ້ອງວ່າການນະຄອນ ຫຼວງພະບາງ ໄດ້ຈັດກອງປະຊຸມ ປຶກສາຫາລືວຽກງານຄຸ້ມຄອງການຂາຍເຄື່ອງໃສ່ບາດ ຕາມຮີດຄອງປະເພນີຂອງຫຼວງພະບາງ, ໂດຍເປັນປະທານຂອງ ທ່ານ ສົມດີ ພອນສະຫວັດ ຮອງເລຂາພັກນະຄອນ, ມີຫົວໜ້າ-ຮອງຫົວໜ້າຫ້ອງ ການ ພ້ອມດ້ວຍວິຊາການຫ້ອງການຖະ ແຫຼງຂ່າວ, ວັດທະນະທຳ ແລະ ທ່ອງ ທ່ຽວ, ກຳມະການຄຸ້ມຄອງການໃສ່ບາດ ຂັ້ນນະຄອນ ແລະຂັ້ນບ້ານ ເຂົ້າຮ່ວມ.
ທ່ານ ຄຳຜຸຍ ສີຫານາດ ຫົວໜ້າຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງ ທ່ຽວ ນະຄອນ ຫຼວງພະບາງ ໄດ້ລາຍງານໂດຍຫຍໍ້ວ່າ: ການປະຕິບັດວຽກງານການຄຸ້ມຄອງການຂາຍເຄື່ອງໃສ່ບາດ ໄລຍະຜ່ານມາໄດ້ປະຕິບັດຕາມກົດລະບຽບຂອງເຈົ້ານະຄອນ ຫຼວງພະບາງ ແນ່ໃສ່ຊຸກຍູ້, ສົ່ງເສີມການປົກປັກຮັກສາ ຮີດຄອງປະ ເພນີອັນດີງາມຂອງຊາວຫຼວງພະບາງ ທີ່ເຄີຍສືບທອດກັນມາແຕ່ດົນນານ, ໂດຍໄດ້ແຕ່ງຕັ້ງຄະນະຮັບຜິດຊອບປະຈຳແຕ່ ລະຈຸດ, ກຳນົດເຂດຢ່າງລະອຽດລວມມີ 3 ຈຸດໃຫຍ່ ໃນກຸ່ມຊຽງທອງ ຄື: ຢູ່ບ້ານວັດແສນ, ບ້ານວັດໜອງ, ບ້ານຫົວຊຽງ ແລະພວມກະກຽມຂຶ້ນບັນຊີຄຸ້ມຄອງຢູ່ເຂດ ກຸ່ມມະໂນອີກ 1 ຈຸດ, ໄດ້ຂຶ້ນບັນຊີຄຸ້ມຄອງມີທັງໝົດ 85 ຄົນ ແລະໄດ້ອອກບັດໃຫ້ເພື່ອເປັນລາຍລັກອັກສອນ, ຜ່ານການຈັດຕັ້ງປະຕິບັດເລີ່ມແຕ່ຕົ້ນປີ 2022 ຄະນະກຳມະການ ໄດ້ເອົາໃຈໃສ່ຄຸ້ມຄອງ ແລະແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນບາງໄລຍະ ໂດຍໄດ້ເຮັດບົດບັນ ທຶກສຶກສາອົບຮົມກ່າວເຕື່ອນ ແມ່ຄ້າຂາຍເຂົ້າໃສ່ບາດທີ່ບໍ່ເປັນລະບຽບ ຈຳນວນ 7 ກໍລະນີ, ໄດ້ເຮັດບົດບັນທຶກສຶກສາອົບຮົມກ່າວເຕືອນ ພໍ່ແມ່ຜູ້ປົກຄອງເດັກນ້ອຍທີ່ມາໂຕ່ງເຂົ້າໃສ່ບາດ ຈຳນວນ 5 ກໍລະນີ, ໄດ້ເຮັດບົດບັນທຶກສຶກສາອົບຮົມກ່າວເຕື່ອນ ແມ່ຄ້າຂາຍເຄື່ອງທີ່ເຊື່ອມຄຸນນະພາບ ພ້ອມທັງຍຶດເອົາເຄື່ອງ ຈຳນວນ 9 ກໍລະນີ.
ສັງລວມແລ້ວ ການຄຸ້ມຄອງວຽກງານການໃສ່ບາດ ຜ່ານມາສາມາດຄຸ້ມຄອງ
ໄດ້ຕາມລະບຽບການ, ຮັກສາໄດ້ຮີດຄອງປະເພນີອັນດີງາມ, ມີຄວາມສະຫງົບ, ເປັນລະບຽບຮຽບຮ້ອຍ ໂດຍພື້ນຖານ.
ໂອກາດນີ້ ທ່ານ ສົມດີ ພອນສະຫວັດ ໄດ້ເນັ້ນໃຫ້ຄະນະຮັບຜິດຊອບມີການຄົ້ນຄວ້າ ລົງເລີກລາຍລະອຽດ ໃນການຄຸ້ມຄອງການໃສ່ບາດ ທີ່ເປັນຮີດຄອງປະເພນີ ວັດທະນະທຳອັນດີງາມທີ່ມີມາແຕ່ເຫີງນານ ໃຫ້ໄດ້ຮັບການຄຸ້ມຄອງຢ່າງມີປະສິດທິພາບ ແລະຍືນຍົງ, ເພີ້ມທະວີປຶກສາຫາລື ຮ່ວມກັບບັນດາຜູ້ແທນ ສະມາຄົມເຮືອນພັກໂຮງແຮມ, ສະມາຄົມນຳທ່ຽວ ຄະນະກຳມະການແຕ່ລະຂັ້ນ ພ້ອມກັນຈັດຕັ້ງປະຕິບັດ, ນຳໃຊ້ມາດຕະການເຂັ້ມງວດ-ເດັດຂາດຕໍ່ຜູ້ລະເມີດ ເພື່ອຮັກສາໃຫ້ໄດ້ ຄວາມເປັນມໍລະດົກໂລກຂອງຫຼວງພະບາງ ໃຫ້ຍືນຍົງຕະຫຼອດໄປ.
ຂ່າວໂດຍ: ສົມພອນ ວິໄລຜົນ ນັກຂ່າວ ຫ້ອງການ ຖວທ ນະຄອນຫຼວງພະບາງ
