ໃນວັນທີ 23 ກັນຍາ 2024, ການນຳ ເມືອງຈຳພອນ ນຳໂດຍ ທ່ານ ບຸນຊູ ທຸ່ນຊົມພູ ຮອງເລຂາພັກເມືອງ ພ້ອມດ້ວຍຄະນະປະທານຕ້ານໄພພິບັດຂັ້ນເມືອງ ໄດ້ລົງຕິດຕາມການເຊາະເຈື່ອນຂອງຕະຝັ່ງເຊ ແລະ ນ້ຳຖ້ວມໂຮງຮຽນ ເຂດບ້ານທ່າມ່ວງ ເມືອງຈຳພອນ ແຂວງສະຫວັນນະເຂດ. ໃນນັ້ນການເຊາະເຈື່ອນແມ່ນມີ ລວງຍາວ 10 ແມັດ, ກວ້າງ 06 ແມັດ, ຄວາມເລິກ 1,50 ແມັດ ໂດຍການນຳເມືອງ ແນະນໍາໃຫ້ຄອບຄົວທີ່ມີຄວາມສ່ຽງ ຫລື ເຮືອນໃກ້ຝັ່ງເຊ ມີສະຕິຕື່ມ ແລະ ມ້າງເລົ້າເຂົ້າອອກ ເພື່ອຫລຸດຜ່ອນຄວາມເສຍຫາຍ ເນື່ອງຈາກວ່າຕະຝັ່ງເຊ ມີເຊາະເຈື່ອນເຂົ້າໃກ້ສິ່ງປຸກສ້າງຂອງປະຊາຊົນ. ຈາກນັ້ນ, ຍັງໄດ້ຕິດຕາມການເຊາະເຈື່ອນຂອງຕະຝັ່ງເຊ ທາງບ້ານດົງເມືອງ ທີ່ມີການເຊາະເຈື່ອນຂ້າງທາງດົງລີງ ມີຂະໜາດກວ້າງອອກໄປເລື້ອຍໆ.
ພ້ອມນັ້ນ, ການນຳເມືອງ ຍັງໄດ້ຕິດຕາມນ້ຳຖ້ວມ ໂຮງຮຽນປະຖົມສົມບູນ ບ້ານລຳພັນ ເຊິ່ງໂຮງຮຽນດັ່ງກ່າວ ປິດການຮຽນ-ການສອນມາແຕ່ວັນທີ 16 ກັນຍາ 2024 ເປັນຕົ້ນມາ, ເສັ້ນທາງພາຍໃນບ້ານແມ່ນຖືກຕັດຂາດ ເນື່ອງຈາກນ້ຳຖ້ວມທາງ.
