ໃນວັນທີ 5 ພຶດສະພາ 2021ທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ ແລະ ທ່ານ ພັດທະຈອນ ແກ້ວພຸດທະວົງ ຫົວໜ້າພະແນກກະສິກຳ ແລະ ປ່າໄມ້ແຂວງ ພ້ອມດ້ວຍຄະນະ ໄດ້ນຳເອົາເງິນສົດຈຳນວນ 5 ລ້ານກີບ ໄປມອບໃຫ້ແກ່ຄອບຄົວທ້າວ ເຢັ້ງວື່ ຢູ່ບ້ານທົ່ງນາມີ ເມືອງປາກກະດິງ ທີ່ຖືກຊ້າງປ່າທຳຮ້າຍຄອບຄົວໃນວັນທີ 30 ເມສາຜ່ານມານີ້.
ທ່ານ ເນັງ ທ່າວຢ່າງ ນາຍບ້ານທົ່ງນາມີ ໄດ້ເລົ່າກ່ຽວກັບເຫດການຊ້າງປ່າເຂົ້າມາທຳຮ້າຍຕາມຂໍ້ມູນທີ່ຄອບຄົວຜູ້ຖືກເຄາະຮ້າຍໃຫ້ຮູ້ວ່າ: ໃນຄືນເກີດເຫດເວລາປະມານ 22:00 ໂມງຂອງວັນທີ 30 ເມສາ 2021 ຄອບຄົວຜູ້ຖືກເຄາະຮ້າຍມີທັງໝົດ 9 ຄົນ ແລະ ໄດ້ນອນຢູ່ຕູບສວນມັນ ເພື່ອເຮັດການຜະລິດປູກມັນຕົ້ນ ໃກ້ກັບເຂດປ່າສະຫງວນພູງູ ແລະ ໃນເວລາທີ່ທຸກຄົນກຳລັງນອນຫຼັບຢູ່ນັ້ນ ກໍໄດ້ມີຊ້າງປ່າ 2 ໂຕ ເຂົ້າມາຊອກຫາກິນ ແລະ ເຂົ້າມາທຳຮ້າຍພວກກ່ຽວໂດຍບໍ່ຮູ້ໂຕ ເຮັດໃຫ້ຄົນໃນຄອບຄົວເສຍຊີວິດຄ່າທີ່ 2 ຄົນ, ໄດ້ຮັບບາດເຈັບສາຫັດ 3 ຄົນ, ບາດເຈັບເລັກໜ້ອຍ 1 ຄົນ ແລະ ອີກ 3 ຄົນໄດ້ເອົາໂຕລອດອອກມາໄດ້.
ຂ່າວ: ແສງທອງ
Loading...