ໃນວັນທີ 6 ມັງກອນ 2024 ການນໍາເມືອງ ຊານໄຊ ແຂວງ ອັດຕະປື ແຫ່ງ ສປປ ລາວ ນໍາໂດຍ ນາງ ແກ້ວສະໜອນ ແກ້ວນະສັກ ປະທານແນວລາວສ້າງຊາດເມືອງ ພ້ອມດ້ວຍຄະນະໄດ້ເດີນທາງອວຍພອນ ການນຳນໍາເມືອງ ດັກໄລ ແຂວງ ກອນຕູມ ແຫ່ງ ສສ ຫວຽດນາມ,ເນື່ອງໃນໂອກາດວັນບຸນປີໃໝ່ຂອງ ສສ ຫວຽດນາມ, ພິທີຕ້ອນຮັບໄດ້ຈັດຂື້ນທີ່ຫ້ອງການສະພາປະຊາຊົນເມືອງດັກໄລ, ໂດຍການຕ້ອນຮັບຂອງທ່ານ ໂດ໊ສຸມ ປະທານສະພາປະຊາຊົນ ເມືອງ ດັກໄລ ແຂວງ ກອນຕູມ ພ້ອມຄະນະນໍາຂອງເມືອງ.
ທ່ານນາງ ແກ້ວສະໜອນ ແກ້ວນະສັກ ປະທານແນວລາວສ້າງຊາດເມືອງ ຕາງໜ້າຄະນະນຳເມືອງ ຊານໄຊ ໄດ້ກ່າວສົ່ງຄວາມຢື້ຢາມຖາມຂ່າວ ແລະ ອວຍພອນໄຊອັນປະເສີດ ເຖິງບັນດາການນໍາໃນຄະນະພັກ ອຳນາດການປົກຄອງເມືອງ ພະນັກງານອະວຸໂສບຳນານ, ນັກຮົບປະຕິວັດ ແລະ ປະຊາຊົນບັນດາເຜົ່າ ຊາວເມືອງ ດັກໄລ ຈົ່ງສຸກກາຍສຸກໃຈ ມີພາລະອະນາໄມສົມບູນ ຕ້ອນຮັບປີໃໝ່ ດ້ວຍຄວາມຜາສຸກ ແລະ ເບີກບ່ານມ່ວນຊື່ນ. ພ້ອມນັ້ນ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ໄຊຊະນະ ອັນໃຫຍ່ຫຼວງ ທີ່ຄະນະພັກ ອໍານາດການປົກຄອງ ແລະ ປະຊາຊົນບັນດາເຜົ່າ ຊາວເມືອງ ດັກໄລ ຍາດມາໄດ້ໃນໄລຍະຜ່ານມາ ແລະ ເຊື່ອແນ່ວ່າ ພາຍໃຕ້ການນຳພາ-ຊີ້ນໍາຂອງພັກຄອມມູຍນິດຫວຽດນາມ ກັບ ຜົນສຳເລັດກອງປະຊຸມໃຫຍ່ຄັ້ງທີ່ 19 ຂອງອົງຄະນະພັກເມືອງ ດັກໄລ ແລະ ການຈັດຕັ້ງປະຕິບັດເນື້ອໃນ ກອງປະຊຸມຮອບວຽນ ຄັ້ງທີ 18 ລະຫວ່າງ 3 ເມືອງ ຄື: ເມືອງ ຊານໄຊ ແຂວງ ອັດຕະປື, ເມືອງ ດັກຈຶງ ແຂວງ ເຊກອງ ສປປລາວ ແລະ ເມືອງ ດັກໄລ ແຂວງ ກອນຕູມ ແຫ່ງສາທາລະນະລັດ ສັງຄົມນິຍົມຫວຽດນາມ ທີ່ເມືອງ ດັກໄລ ເປັນເຈົ້າພາບ ໃນວັນທີ 30 ພະຈິກ 2023 ທີ່ຜ່ານມາ, ພ້ອມດ່ຽວກັນນີ້ ຍັງຖືເປັນການຢ້ຽມຢາມ ອັນສຳຄັນ ປະກອບສ່ວນເຂົ້າໃນການເສີມຂະຫຍາຍສາຍພົວພັນ ມິດຕະພາບ ແລະຄວາມສາມັກຄີແບບພິເສດ ຮອບດ້ານ ລະຫວ່າງ ສອງຊາດລາວ-ຫວຽດນາມ ຫວຽດນາມ-ລາວ, ທີ່ເຄີຍມີມູນເຊື້ອມາແຕ່ດຶກດໍາບັນ ຈົນເຖີງປັດຈຸບັນ ເວົ້າລວມ, ເວົ້າສະເພາະ ລະຫວ່າງ ສອງ ເມືອງ ຊານໄຊ – ດັກໄລ ໃຫ້ມີຄວາມຍືນຍົງທະນົງແກ່ນ ນັບມື້ ກ້າວສູ່ການພັດທະນາຂື້ນໄປຢ່າງບໍ່ຍຸດຢັ້ງ.
ໂດຍ: ອັດອີສານ ຂ.ອັດຕະປື
