ຕອນເຊົ້າວັນທີ 12 ກໍລະກົດ ນີ້ ການນຳແຂວງຫຼວງພະບາງ ນຳໂດຍ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ເຂົ້າວາງກະຕ່າດອກໄມ້ ຢູ່ອານຸສາວະລີ ປະທານ ສຸພານຸວົງ ໂອກາດສະເຫຼີມສະຫຼອງ ວັນເກີດ ຂອງປະທານ ສຸພານຸວົງ ວັນທີ 13 ກໍລະກົດ ຄົບຮອບ 115 ປີ ເພື່ອເປັນການຈາລຶກເຖິງຄຸນງາມຄວາມດີ, ກະຕັນຍູຮູ້ບຸນຄຸນ, ຜົນງານອັນໃຫຍ່ຫຼວງ ທີ່ໄດ້ອຸທິດຕະຫຼອດຊີວິດເພື່ອຊາດ ແລະການປະຕິວັດຂອງປະທານ, ປະທານ ສຸພານຸວົງ ແມ່ນປັນຍາຊົນຜູ້ຍິ່ງໃຫຍ່, ເປັນເຊື້ອເຈົ້າຜູ້ໜຶ່ງທີ່ມີນໍ້າໃຈຮັກຊາດອັນດູດດື່ມ ທີ່ໄດ້ເອົາຊີວິດຕິດພັນກັບການປະຕິວັດຢ່າງສຸດກົກສຸດປາຍ ເຊິ່ງເປັນແບບຢ່າງອັນດີເລີດ ໃນການເຕົ້າໂຮມຄວາມສາມັກຄີບັນດາເຜົ່າ ປະທານກາຍເປັນຜູ້ນໍາທີ່ດີເດັ່ນ ຂອງພັກປະຊາຊົນປະຕິວັດລາວ, ທີ່ໄດ້ນໍາພາປວງຊົນລາວບັນດາເຜົ່າ ຕໍ່ສູ້ຕີສັດຕູຜູ້ຮຸກຮານຈົນໄດ້ຮັບໄຊຊະນະຢ່າງສົມບູນ ແລະສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975. ໂອກາດນີ້ ການນຳແຂວງຫຼວງພະບາງ ໄດ້ປະຕິຍານຕໍ່ໜ້າຮູບຫຼໍ່ຂອງປະທານວ່າ: ຈະເປັນສະມາຊິກພັກ-ພະນັກງານຮຸ່ນນສືບທອດທີ່ດີ ສັດຊື່ ບໍລິສຸດ ຈົງຮັກພັກດີຕໍ່ອຸດົມການຂອງພັກ ປົກປັກຮັກສາມູນເຊື້ອອັນດີງາມ ແລະ ຄວາມສາມັກຄີ ເປັນແບບຢ່າງໃນການປະຕິບັດມະຕິຄຳສັ່ງ, ກົດລະບຽບ ແລະລັດຖະທຳມະນູນວາງອອກຢ່າງເຂັ້ມງວດ ເດັດດ່ຽວຕອບຕ້ານ ແລະສະກັດກັ້ນ ທຸກກົນອຸບາຍຫັນປ່ຽນໂດຍສັນຕິຂອງສັດຕູ, ຖືເອົາຜົນປະໂຫຍດສ່ວນລວມສູງກ່ວາຜົນປະໂຫຍດສ່ວນຕົວສະເໝີ, ປົກປັກຮັກສາ ແລະສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງກ້າວໜ້າຢ່າງບໍ່ຢຸດຢັ້ງ, ຈະຕັ້ງໜ້າຮໍ່າຮຽນເອົາຄຸນສົມບັດ, ສິນທຳປະຕິວັດແບບແຜນການດຳລົງຊີວິດ, ທີ່ຖະໜອມ, ຖ່ອມຕົວ, ງ່າຍດາຍ, ປອດໃສຂາວສະອາດ, ດຸໝັ່ນ, ຊື່ສັດ, ປະຢັດ ແລະອົດທົນເຊິ່ງເປັນແບບຢ່າງອັນດີເລີດ ທີ່ປະທານໄດ້ສ້າງໄວ້ໃຫ້ຄົນຮຸ່ນຫຼັງໄດ້ສືບທອດ.
