ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການນຳແຂວງອຸດົມໄຊ ພົບປະໂອ້ລົມແຮງງານທີ່ຖືກກັກບໍລິເວນ ກ່ອນສົ່ງກັບຄືນສູ່ຄອບຄົວ

ຕອນບ່າຍວັນທີ 19 ພຶດສະພາ 2020 ທີ່ສູນກັກກັນແຮງງານທີ່ມາແຕ່ຕ່າງປະເທດ ຂອງແຂວງອຸດົມໄຊ ທ່ານ ວັນນາ ແກ້ວສັນຕິ ກຳມະການພັກແຂວງ ຮັກສາການປະທານແນວລາວສ້າງຊາດ ແຂວງອຸດົມໄຊ ທັງເປັນຫົວໜ້າຄະນະກຳມະການໂຄສະນາການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດສາຍພັນໃໝ່ ຫຼື ໂຄວິດ-19 ພ້ອມດ້ວຍຄະນະສະເພາະກິດຂອງແຂວງ ໄດ້ເຂົ້າພົບປະໂອ້ລົມກັບແຮງງານລາວທີ່ຖືກກັກກັນຄົບຕາມກຳນົດເວລາ ກ່ອນສົ່ງກັບຄືນສູ່ຄອບຄົວ ສັງຄົມ ໂດຍມີຂະແໜງການທີ່ກ່ຽວຂ້ອງ ແລະ ແຮງງານທີ່ກັກບໍລິເວນຕາມກຳນົດເວລາເຂົ້າຮ່ວມ 100 ກ່ວາຄົນ. ກ່ອນອື່ນໝົດ ທ່ານ ວັນນາ ແກ້ວສັນຕິ ພ້ອມດ້ວຍຄະນະກໍໄດ້ຮັບຟັງການລາຍງານສະພາບການຕິດຕາມແຮງງານລາວ ທີ່ມາຈາກຕ່າງປະເທດ ແລະ ຕ່າງແຂວງ ທີ່ມີຄວາມສ່ຽງ ໃນຈຳນວນ 100  ກ່ວາຄົນ ທີ່ໄດ້ກັກບໍລິເວນຄົບຕາມກຳນົດເວລາ ຜ່ານການຕິດຕາມກວດກາໃນໄລຍະກັກບໍລິເວນແມ່ນບໍ່ພົບກໍລະນີອາການສົງໄສ ແລະ ຄ້າຍຄື ອາການຂອງພະຍາດໂຄວິດ-19 ແຕ່ລະຄົນແມ່ນມີສຸຂະພາບແຂງແຮງດີ ດັ່ງນັ້ນຈຶ່ງໄດ້ສະເໜີອານຸມັດໃຫ້ກັບຄືນສູ່ຄອບຄົວ ແລະ ສັງຄົມ.  ໃນໂອກາດນີ້ທ່ານ ວັນນາ ແກ້ວສັນຕິ ຕາງໜ້າໃຫ້ແກ່ການນຳຂອງແຂວງ ກໍໄດ້ມີຄຳເຫັນໂອ້ລົມ ແລະ ອະທິບາຍໃຫ້ແຮງງານທີ່ມາເກັບຕົວຢູ່ສູນ ໄດ້ຮັບຮູ້ ແລະ ເຂົ້າໃຈເຖິງຄວາມເປັນຫ່ວງເປັນໄຍ ຂອງການນຳພັກ-ລັດ ທີ່ມີຄວາມເປັນຫ່ວງເປັນໄຍຕໍ່ກັບຊີວິດຂອງບຸກຄົນ ຄອບຄົວ ແລະ ສັງຄົມ ເພື່ອປ້ອງກັນບໍ່ໃຫ້ມີການລະບາດຂອງພະຍາດໂຄວິດ-19 ພ້ອມດຽວກັນນີ້ກໍໄດ້ຍົກໃຫ້ຮູ້ເຖິງຄວາມອັນຕະລາຍ ແລະ ມາດຕະການໃນການປ້ອງກັນພະຍາດໂຄວິດ-19 ເພື່ອມີສະຕິໃນການປ້ອງກັນ ຮັບປະກັນບໍ່ໃຫ້ມີການລະບາດອອກສູ່ສັງຄົມ. ທີ່ສຳຄັນທ່ານກໍໄດ້ເນັ້ນໃຫ້ແຮງງານທີ່ຈະກັບຄືນສູ່ຄອບຄົວ ແລະ ສັງຄົມຄັ້ງນີ້ ໃຫ້ເອົາໃຈໃສ່ສືບຕໍ່ຕິດຕາມສຸຂະພາບຂອງຕົນ ແລະ ປະຕິບັດມາດຕະການໃນການປ້ອງກັນ ໃຫ້ໄດ້ຮັບຜົນດີ ດຳລົງຊີວິດໃຫ້ເປັນປົກກະຕິ ນຳເອົາບົດຮຽນປະສົບການທີ່ໄດ້ຮັບ ຈາກການໄປອອກແຮງງານຢູ່ຕ່າງປະເທດ ມາພັດທະນາຊີວິດການເປັນຢູ່ຂອງຕົນ ກໍຄືຄອບຄົວ ໃຫ້ນັບມື້ດີຂຶ້ນ ຮູ້ຈັກເລືອກເຟັ້ນເອົາບົດຮຽນທີ່ດີ ມີຄຸນຄ່າເພື່ອໝູນໃຊ້ເຂົ້າໃນຊີວິດຕົວຈິງ ໃຫ້ຖືກຕ້ອງຕາມຮີດຄອງປະເພນີ ກໍຄືລະບຽບກົດໝາຍຂອງບ້ານເມືອງ. ນອກຈາກນີ້ທ່ານກໍຍັງໄດ້ສະແດງຄວາມເປັນຫ່ວງຕໍ່ກັບຊີວິດການເປັນຢູ່ຂອງແຮງງານທີ່ກັບມາຈາກຕ່າງປະເທດ ກໍຄືຜູ້ທີ່ມີຄວາມຄິດຈະໄປອອກແຮງງານຢູ່ຕ່າງປະເທດ ຕ້ອງມີສະຕິລະວັງຕົວສູງກ່ອນທີ່ຈະໄປອອກແຮງງານຢູ່ຕ່າງປະເທດ ກໍຕ້ອງໄດ້ປະຕິບັດຕາມລະບຽບຫຼັກການຢ່າງຖືກຕ້ອງ ເພື່ອຫຼີກລ້ຽງບັນຫາ ແລະ ສ້າງຜົນເສຍຫາຍຕາມມາ.

ຂ່າວ: ສີຈັນ ເກດວົງສາ