ການນຳແຂວງໄຊສົມບູນ ສະແດງຄວາມເສົ້າສະຫລົດໃຈ ຕໍ່ການຈາກໄປຂອງສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ, ເຊິ່ງ
ອົງຄະນະພັກ, ສະພາປະຊາຊົນແຂວງ, ອົງການປົກຄອງ, ແນວລາວສ້າງຊາດ ແລະ ປະຊາຊົນບັນດາເຜົ່າແຂວງໄຊສົມບູນ ມີຄວາມເສົ້າສະຫລົດໃຈເປັນຢ່າງຍິ່ງ ທີ່ໄດ້ຮັບຂ່າວການມໍລະນະກໍາ ຂອງສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກຄອມມູນິດຫວຽດນາມ ແຫ່ງສາທາລະນະລັດ ສັງຄົມນິຍົມຫວຽດນາມ ທີ່ໄດ້ເຖິງແກ່ມໍລະກໍາ ໃນວັນທີ 19 ກໍລະກົດ 2024 ຜ່ານມານີ້.
ສະຫາຍ ຫງວຽນ ຝູ໋ຈ້ອງ ເປັນຜູ້ນໍາປະຕິວັດຍຸກສະໄໝໃໝ່, ເປັນຜູ້ສືບທອດພາລະກິດ ຂອງປະທານ ໂຮ່ຈີ່ມິງ ທີ່ໄດ້ປະກອບສ່ວນເຂົ້າໃນການເພີ່ມພູມຄູນສ້າງສາຍພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ-ຫວຽດນາມ ມາໂດຍຕະຫລອດ. ການຈາກໄປຂອງສະຫາຍ ຫງວຽນ ຝູ໋ຈ້ອງ ເປັນການສູນເສຍເພື່ອນສະໜິດມິດສະຫາຍ ທີ່ໃກ້ຊິດສະນິດສະໜົມ ຂອງພັກ, ລັດ ແລະ ປະຊາຊົນບັນດາເຜົ່າ, ທັງເປັນການສູນເສຍ ຜູ້ນໍາປະຕິວັດຜູ້ອົງອາດກ້າແກ່ນຂອງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ, ເຊິ່ງຕະຫລອດຊີວິດແຫ່ງການເຄື່ອນໄຫວປະຕິວັດ ສະຫາຍໄດ້ອຸທິດຊີວິດເຫື່ອແຮງ ແລະ ສະຕິປັນຍາ ເຂົ້າໃນວຽກງານການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະ ວຽກງານການປັບປຸງກໍ່ສ້າງພັກໃຫ້ເຂັ້ມແຂງ, ປອດໃສ, ຕ້ານການສໍ້ລາດບັງຫລວງ ແລະ ປະກົດການຫຍໍ້ທໍ້ໃນສັງຄົມ ເຮັດໃຫ້ປະເທດຫວຽດນາມ ໄດ້ຮັບການພັດທະນາຢ່າງບໍ່ຢຸດຢັ້ງ, ເຮັດໃຫ້ບົດບາດ ຂອງ ສສ ຫວຽດນາມ ໃນເວທີພາກພື້ນ ແລະ ສາກົນ ນັບມື້ໄດ້ຮັບການຍົກສູງຢ່າງຈະແຈ້ງ.
ໃນເວລາອັນໂສກເສົ້າເສຍດາຍນີ້, ອົງຄະນະພັກ, ສະພາປະຊາຊົນແຂວງ, ອົງການປົກຄອງ, ແນວລາວສ້າງຊາດ ແລະ ປະຊາຊົນບັນດາເຜົ່າ ແຂວງໄຊສົມບູນ ຂໍສະແດງຄວາມໂສກເສົ້າເສຍດາຍ ແລະ ອາໄລອາວອນມາຍັງພັກ, ລັດ ແລະ ປະຊາຊົນຫວຽດນາມອ້າຍນ້ອງ ພ້ອມດ້ວຍຄອບຄົວ ຂອງສະຫາຍ ຫງວຽນ ຝູ໋ຈ້ອງ ດ້ວຍການ ອອກແຈ້ງການ ໃຫ້ບັນດາພະແນກການ, ກົມກອງ, ອົງການ, ບັນດາເມືອງ ທົ່ວແຂວງໄຊສົມບູນ ພ້ອມກັນໄວ້ອາໄລ ເປັນເວລາ 2 ວັນ ນັບແຕ່ວັນທີ 25-26 ກໍລະກົດ 2024 ດ້ວຍການເອົາທຸງລົງເຄິ່ງເສົາ ແລະ ງົດກິດຈະກໍາຕ່າງໆ ທີ່ເປັນ ລັກສະນະມວນຊົນທຸກຮູບແບບ.
ພ້ອມດຽວກັນນີ້, ສະຫາຍ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໆໄຊສົມບູນ ພ້ອມຄະນະນໍາ ຂອງແຂວງ ໄດ້ເດິນທາງເຂົ້າຮ່ວມ ວາງພວງມາລາໄວ້ອາໄລການເສຍຊີວິດຂອງສະຫາຍ ຫງວຽນ ຝູ໋ຈ້ອງ ທີ່ສະຖານທູດ ຫວຽດນາມ ປະຈໍາ ລາວ ນະຄອນຫລວງວຽງຈັນ ໃນວັນທີ 25 ກໍລະກົດ 2024.ນອກຈາກນີ້, ກໍໄດ້ສົ່ງສານສະແດງຄວາມເສົ້າສະຫລົດໃຈ ເຖິງສະຫາຍ ຫວູ້ ດາຍ ຖັງ ກໍາມະການສູນກາງພັກ, ເລຂາພັກແຂວງ, ຫົວໜ້າຄະນະຜູ້ແທນສະມາຊິກສະພາແຫ່ງຊາດແຂວງກວາງບິ່ງ, ສະຫາຍ ຫງວຽນ ວັນ ເກົາ ກໍາມະການສູນກາງພັກ ເລຂາພັກແຂວງ ບັ໋ກຢາງ, ສະຫາຍ ລໍ່ ມິ່ງ ຮຸ່ງ ຮອງເລຂາພັກ ແຂວງເຊີນລາ, ສະຫາຍ ຖາຍ ແທັງ ກຸຍ ກໍາມະການສູນກາງພັກ, ເລຂາພັກແຂວງ, ປະທານສະພາປະຊາຊົນ, ຫົວໜ້າຄະນະຜູ້ແທນສະມາຊິກສະພາແຫ່ງຊາດ ແຂວງເຫງະອານ ແລະ ສະຫາຍ ຄະນະພັກ, ຄະນະບັນຊາ ທະຫານເຂດ 4 ແຫ່ງສາທາລະນະລັດ ສັງຄົມນິຍົມ ຫວຽດນາມ ເພື່ອສະແດງຄວາມໂສກເສົ້າເສຍໃຈ, ອາໄລອາວອນ ຕໍ່ການຈາກໄປຢ່າງບໍ່ມີວັນຫວນກັບ ຂອງ ສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ໃນຄັ້ງນີ້.
ອົງການປົກຄອງ ແລະ ປະຊາຊົນ ແຂວງໄຊສົມບູນ ເຊື້ອໜັ້ນວ່າ ພັກ-ລັດ ແລະ ປະຊາຊົນ ສອງປະເທດລາວ-ຫວຽດນາມ ອ້າຍນ້ອງ ຈະຫັນເອົາຄວາມໂສກເສົ້າເສຍດາຍນີ້ ກາຍເປັນເຫງົ້າພະລັງແຫ່ງຄວາມສາມັກຄີ ພ້ອມກັນສ້າງສາພັດທະນາ ສອງປະເທດລາວ-ຫວຽດນາມ ອ້າຍນ້ອງ ໃຫ້ມີຄວາມຜາສຸກ ແລະ ສີວິໄລຂຶ້ນເລື້ອຍໆ.
ຂ່າວ: ຂປລ
