ທ່ານ ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ອູເວ້ເລີນ (Mr. WU Weiran) ຫົວໜ້າອອກແບບໂຄງການສໍາຫຼວດດວງຈັນ, ໂຄງການສໍາຫຼວດດວງຈັນ ຂອງ ອົງການອະວະກາດ ສປ ຈີນ ພ້ອມດ້ວຍຄະນະເມື່ອວັນທີ 04 ມິຖຸນາ 2024 ເນື່ອງໃນໂອກາດທີ່ເດີນທາງມາເຮັດວຽກຢູ່ ສປປ ລາວ.
ໃນໂອກາດນີ້, ທ່ານ ອູເວ້ເລິນ ໄດ້ລາຍງານ ແລະ ປຶກສາຫາລືກ່ຽວກັບວຽກງານໂຄງການສໍາຫຼວດດວງຈັນ ຂອງອົງການອາວະກາດທີ່ ສປ ຈີນ ທີ່ໄດ້ລິເລີ່ມສ້າງຕັ້ງຂຶ້ນ, ພ້ອມທັງ ໄດ້ລາຍງານຄວາມຄືບໜ້າ ແລະ ແລກປ່ຽນຂໍ້ມູນຂ່າວສານ ທາງດ້ານເຕັກໂນໂລຊີ ແລະ ວິທະຍາສາດກ່ຽວກັບໂຄງການດັ່ງກ່າວ, ພ້ອມຮັບຊົມວີດີໂອແນະນໍາການສໍາຫຼວດອາວະກາດ, ວີດີໂອແນະນໍາຫ້ອງທົດລອງການສໍາຫຼວດດວງຈັນ ຈາກຄະນະດັ່ງກ່າວ. ທັງນີ້, ເພື່ອເປັນການເສີມຂະຫຍາຍການຮ່ວມມືລະຫວ່າງສອງປະເທດ ລາວ-ຈີນ.ໃນນັ້ນສປ ຈີນ ໄດ້ເຊີນການນຳສປປ ລາວ ກໍຄື ກຕສ ເຂົ້າຮ່ວມເຮັດວຽກ ແລະ ສຶກສາທ່າແຮງ, ຄວາມເປັນໄປໄດ້ດ້ວຍຫຼາຍຮູບແບບ ບໍ່ວ່າຈະເປັນການກໍ່ສ້າງ, ການຜະລິດ, ບຸກຄະລາກອນ ແລະ ການສ້າງຂໍ້ມູນຂ່າວສານກ່ຽວກັບໂຄງການດັ່ງກ່າວ.
ໂອກາດດັ່ງກ່າວນີ້, ທ່ານສັນຕິສຸກ ສິມມາລາວົງ ໄດ້ສະແດງຄວາມຕ້ອນຮັບ ແລະ ຊົມເຊີຍ ທ່ານ ອູເວ້ເລິນ ພ້ອມດ້ວຍຄະນະ ທີ່ໄດ້ເດີນທາງມາເຮັດວຽກໃນຄັ້ງນີ້. ພ້ອມທັງ ຈະນໍາເອົາວຽກງານດັ່ງກ່າວນີ້ໄປປຶກສາຫາລືຮ່ວມກັບຄະນະ ເພື່ອສຶກສາຄວາມເປັນໄປໄດ້ກ່ຽວກັບໂຄງການດັ່ງກ່າວ ແລະ ເພື່ອສືບຕໍ່ຮ່ວມມືສອງຝ່າຍ ລາວ-ຈີນ ໃຫ້ມີຜົນສໍາເລັດຍິ່ງໆຂຶ້ນ.
ຂ່າວ: ຂ່າວສານເຕັກໂນໂລຊີ ແລະ ການສື່ສານ
