ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງກວາງບິ່ງ ສສ ຫວຽດນາມ ໃນວັນທີ 29 ມິຖຸນາ ຜ່ານມາ, ຄະນະຜູ້ແທນແຂວງຄໍາມ່ວນ ນໍາໂດຍ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມອານຸສອນສະຖານຂອງ ທ່ານພົນເອກ ຫວໍ ຫງວຽນ ຢາບ ທີ່ບ້ານ ອານສາ ຕາແສງ ລົກຖຸ໋ຍ ເມືອງ ເລຖຸ໋ຍ ຫ່າງຈາກນະຄອນດົງເຫີຍໄປທາງທິດໃຕ້ ປະມານ 40 ກິໂລແມັດ, ໂດຍທ່ານ ເຈົ້າແຂວງຄໍາມ່ວນ ແລະ ຄະນະໄດ້ຮ່ວມ ວາງກະຕ່າດອກໄມ້ ສະແດງຄວາມ ຮູ້ບຸນຄຸນ ແລະ ຄຸນງາມຄວາມດີອັນປະເສີດ ຂອງ ທ່ານພົນເອກ ຫວໍ ຫງວຽນ ຢາບ, ຜູ້ນໍາທີ່ມີຄວາມອົງອາດກ້າຫານ ແມ່ນໜຶ່ງໃນວິລະຊົນ ທີ່ໄດ້ອຸທິດຕົນເຂົ້າໃນການປະຕິບັດພາລະກິດການປະຕິວັດ ຕໍ່ສູ່ປົດປ່ອຍຊາດໃນເມື່ອກ່ອນ ແລະ ເປັນແບບຢ່າງຂອງນັກຮົບ, ຊີວິດການເຄື່ອນໄຫວຕໍ່ສູ້ປະຕິວັດຂອງເພິ່ນ ທັງໝົດໄດ້ສ່ອງແສງໃຫ້ເຫັນຢ່າງຈະແຈ້ງເຖິງທາດແທ້ຂອງນັກຕໍ່ສູ້ ຜູ້ຮັກຊາດຢ່າງດູດດື່ມ ແລະ ກາຍເປັນມູນເຊື້ອ ແລະ ອຸດົມການອັນປະເສີດທີ່ລໍ້າເລີດໃຫ້ແກ່ຄົນຮຸ່ນໃໝ່.
ນອກນັ້ນທ່ານ ແລະ ຄະນະຍັງໄດ້ຢ້ຽມຢາມ ຊຸມຊົນຕົວແບບ ໃນການພັດທະນາ ເຂດຊົນນະບົດ ຕາແສງ ຊົນລາຍ, ຂອງເມືອງ ເລຖຸ໋ຍ, ເພື່ອສຶກສາຂໍ້ມູນ ກ່ຽວກັບຮູບແບບ,ຂັ້ນຕອນ ແລະ ວິທີການຈັດຕັ້ງປະຕິບັດ ບັນດາກິດຈະກໍາຕ່າງໆ ທີ່ຕິດພັນກັບການພັດທະນາຊົນນະບົດ ຂອງເຂດດັ່ງກ່າວ ຈາກບັນດາອົງການຈັດຕັ້ງ ທຸກຂັ້ນຂອງບ້ານ ແລະ ຂະແໜງການ ທີ່ກ່ຽວຂ້ອງ ໂດຍທ່ານເຈົ້າແຂວງຄຳມ່ວນ ໄດ້ໃຫ້ຄວາມສົນໃຈ ໃນຫຼາຍບັນຫາເປັນຕົ້ນດ້ານ ການສ້າງຜະລິດຕະພັນສິນຄ້າ ໂອດ໋ອບຂອງຊຸມຊົນ ທີ່ມີຄວາມຍືນຍົງ, ການພັດທະນາພື້ນຖານຊີວິດການເປັນຢູ່ທີ່ຕິດພັນກັບການປູກ-ການລ້ຽງ ແລະ ການສ້າງອາຊີບທີ່ໝັ້ນຄົງ.
ຂ່າວ: ແຂວງຄຳມ່ວນ
