ໃນຕອນບ່າຍ ວັນທີ 16 ມັງກອນ 2024 ທ່ານ ທອງສະລິດ ມັງໜໍ່ເມກ, ຫົວໜ້າຫ້ອງວ່າການສູນກາງພັກ, ທ່ານ ອາລຸນໄຊ ສູນນະລາດ, ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ທ່ານ ພົນຕີ ສາຍໃຈ ກົມມະສິດ, ຫົວໜ້າຫ້ອງວ່າການກະຊວງປ້ອງກັນປະເທດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມ ຢາມ ແລະ ພົບປະໂອ້ລົມ ຕໍ່ນາຍ ແລະ ພົນທະຫານ ກອງພັນໃຫຍ່ລົດຕັງ-ຍານເກາະ 661 ທີ່ເມືອງໄຊທານີ, ນະຄອນ ຫຼວງວຽງຈັນ ໂດຍມີທ່ານ ພັນເອກ ຄຳປານ ແພງພັນ, ຫົວໜ້າການເມືອງ ກອງພັນໃຫຍ່ລົດຕັງ-ຍານເກາະ 661 ພ້ອມດ້ວຍນາຍ ແລະ ພົນທະຫານ ກອງພັນໃຫຍ່ດັ່ງກ່າວ ໃຫ້ການຕ້ອນຮັບ ແລະ ເຂົ້າຮ່ວມຮັບຟັງການພົບປະໂອ້ລົມ.
ໃນໂອກາດນີ້, ທ່ານ ພັນເອກ ຄຳປານ ແພງພັນ ໄດ້ລາຍງານໃຫ້ຊາບ ກ່ຽວກັບໜ້າທີ່, ຄວາມຮັບຜິດຊອບ ແລະ ຜົນສຳເລັດອັນພົ້ນເດັ່ນ ໃນການຈັດຕັ້ງປະຕິບັດວຽກງານ ໃນໄລຍະຜ່ານມາຂອງກົມກອງ ເຫັນວ່າ: ກອງພັນໃຫຍ່ 661 ໄດ້ຮັບການສ້າງຕັ້ງຂຶ້ນຢ່າງເປັນທາງການ ໃນວັນທີ 28 ຕຸລາ 2016 ໂດຍສືບທອດມູນເຊື້ອຈາກກອງພັນນ້ອຍ 616, 615, 174, 161 ແລະ 162 ເຊິ່ງແມ່ນກົມກອງໜຶ່ງ ນອນຢູ່ໃນໂຄງປະກອບການຈັດຕັ້ງ ຂອງກອງທັບປະຊາຊົນລາວ, ເປັນກອງພັນໃຫຍ່ເອກະລາດ ທີ່ຂຶ້ນກັບກະຊວງປ້ອງກັນປະເທດໂດຍກົງ, ເປັນກົມກອງສູ້ຮົບ ແລະ ຮັບປະກັນສູ້ຮົບ, ມີພາລະບົດບາດເປັນກຳລັງສູ້ຮົບປະຈັນບານ ແລະ ເຄື່ອນທີ່ໄວຂອງກອງທັບ, ສູ້ຮົບໃນຮູບແຖວປະສານເຫຼົ່າ ຫຼື ສູ້ຮົບເອກະລາດຊ່ວຍໜູນກຳລັງໄຟໂດຍກົງ ໃຫ້ກົມກອງທະຫານຮາບ ແລະ ກຳລັງອື່ນໆ ເຊິ່ງຕະຫຼອດໄລຍະ 7 ປີກວ່າທີ່ຜ່ານມາ ກົມກອງສາມາດເຮັດສຳເລັດໜ້າທີ່ ທີ່ພັກ-ລັດ ແລະ ປະຊາຊົນມອບໝາຍໃຫ້ເປັນຢ່າງດີ. ນອກນັ້ນ ຍັງມີຜົນສຳເລັດ ໃນການປັບປຸງກໍ່ສ້າງກົມກອງຫຼາຍດ້ານ ເຊັ່ນ: ການສຶກສາອົບຮົມນຳພາແນວຄິດ, ການປັບປຸງລະບຽບແບບແຜນ, ການປັບປຸງລະບົບປະຈຳການກຽມພ້ອມສູ້ຮົບ, ວຽກງານອົບຮົມຫັດແອບ, ວຽກງານພະລາທິການ ແລະ ເຕັກນິກ, ວຽກງານສິລະປະວັນນະຄະດີ, ກິລາກາຍະກໍາ ແລະ ອື່ນໆ.
ໃນໂອກາດດຽວກັນ, ທ່ານ ຫົວໜ້າຫ້ອງວ່າການສູນກາງພັກ ກໍ່ໄດ້ໃຫ້ກຽດມີຄຳເຫັນໂອ້ລົມ ຕໍ່ນາຍ ແລະ ພົນທະຫານ ກອງພັນໃຫຍ່ດັ່ງກ່າວ ໂດຍໄດ້ຍ້ອງຍໍຊົມເຊີຍ ຕໍ່ຜົນງານ ກໍ່ຄືຜົນສຳເລັດ ໃນການປະຕິບັດໜ້າທີ່ຂອງກົມກອງ ໃນໄລຍະຜ່ານມາ, ພ້ອມທັງ ຍົກໃຫ້ເຫັນ ສະພາບພົ້ນເດັ່ນ ທີ່ເກີດຂຶ້ນ ຢູ່ພາຍໃນ ແລະ ຕ່າງປະເທດ, ລວມທັງ ຄວາມພະຍາຍາມ ຂອງສູນກາງພັກ ແລະ ລັດຖະບານ ໃນການແກ້ໄຂບັນຫາເຄັ່ງຮ້ອນ ແລະ ຄວາມຫຍຸ້ງຍາກຕ່າງໆ ທີ່ປະເທດເຮົົາໄດ້ປະເຊີນ ໃນໄລຍະຜ່ານມາ ກໍ່ຄື ປະຈຸບັນ. ນອກນັ້ນ, ຍັງໄດ້ຍົກໃຫ້ເຫັນປະຫວັດການກຳເນີດ, ເຕີບໃຫຍ່ຂະຫຍາຍຕົວ, ທາດແທ້ ແລະ ມູນເຊື້້ອອັນດີງາມຂອງກອງທັບປະຊາຊົນລາວ ຕະຫຼອດໄລຍະ 75 ປີຜ່ານມາ. ອັນສຳຄັນ ທ່ານໄດ້ມີຄຳເຫັນເນັ້ນໜັກ ໃຫ້ເອົາໃຈໃສ່ຕື່ມບາງດ້ານ ເປັນຕົ້ນ ເອົາໃຈໃສ່ສຶກສາອົບຮົມການເມືອງແນວຄິດ, ເພີ່ມທະວີຄວາມສາມັກຄີເປັນອັນໜຶ່ງອັນດຽວ, ຕ້ານ ແລະ ສະກັດກັ້ນ ການມ້າງເພທຳລາຍຂອງອິດທິກຳລັງປໍລະປັກ ໂດຍຍົກສູງສະຕິລະວັງຕົວ, ຕິດຕາມຂໍ້ມູນຂ່າວສານ ຢ່າງມີການເລືອກເຟັ້ນ, ມີການວິເຄາະໄຈ້ແຍກຢ່າງຄັກແນ່; ສືບຕໍ່ສຸມໃສ່ກໍ່ສ້າງກົມກອງ ໃຫ້ປອດໃສ, ເຂັ້ມແຂງ, ໜັກແໜ້ນທາງດ້ານການເມືອງ, ແນວຄິດ, ການຈັດຕັ້ງ, ຍົກສູງຄວາມສາ ມາດນໍາພາຮອບດ້ານ ແລະ ຄວາມສາມາດສູ້ຮົບ ມີໄຊ ໃນທຸກສະພາບການ ແລະ ທຸກກໍລະນີ ເພື່ອເປັນການກະກຽມໃຫ້ແກ່ກອງປະຊຸມໃຫຍ່ 3 ຂັ້ນຂອງພັກ; ເອົາໃຈໃສ່ທະນຸບຳລຸງ, ກໍ່ສ້າງກັນແຖວພະນັກງານສືບທອດ ໂດຍສະເພາະ ພະນັກ ງານຂັ້ນຍຸດທະສາດ ແລະ ນັກຮົບໃຫ້ເປັນປົກກະຕິ ໂດຍເອົາຄຸນທາດການເມືອງເປັນຫຼັກການ ແລະ ກໍ່ສ້າງກົມກອງເປັນພື້ນຖານ ເຮັດໃຫ້ກົມກອງເປັນກຳລັງການເມືອງ ທີ່ເຂັ້ມແຂງຂອງພັກ, ເປັນກຳລັງສູ້ຮົບທີ່ຊື່ສັດບໍລິສຸດ, ໄດ້ຮັບຄວາມເຊື່ອໝັ້ນໄວ້ວາງໃຈຈາກພັກ, ລັດ ແລະ ປະຊາຊົນ, ມີມານະຈິດຜ່ານຜ່າ ທຸກອຸປະສັກຫຍຸ້ງຍາກ, ມີຄວາມເສຍສະຫຼະ, ເຮັດສຳເລັດທຸກໜ້າທີ່; ເອົາໃຈໃສ່ວຽກງານຝຶກອົບຮົມຫັດແອບສິລະປະຍຸດ, ຍຸດທະວີທີສູ້ຮົບ ກໍ່ຄືວຽກງານວິຊາສະ ເພາະ, ການບັງຄັບບັນຊາ ແລະ ນໍາໃຊ້ພາຫະນະເຕັກນິກ ໃຫ້ມີຄວາມຄ່ອງແຄ້ວ, ວ່ອງໄວ ແລະ ກຽມພ້ອມສູ້ຮົບກັບທຸກກໍລະນີ ແລະ ສະພາບການ ສາມາດເປັນກຳລັງ ທີ່ພ້ອມປົກປ້ອງປະເທດຊາດ ແລະ ປະຊາຊົນ ໄດ້ຢ່າງແທ້ຈິງ; ພັດທະນາກອງທັບໃຫ້ເຂັ້ມແຂງ, ທັນສະໄໝເທື່ອລະກ້າວ. ໃນນັ້ນ, ໃຫ້ເອົາໃຈວຽກງານພະລາທິການກັບທີ່, ພື້ນຖານອຸດສາຫະ ກຳປ້ອງກັນຊາດ ຕາມທິດ “ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ” ຕອບສະໜອງໄດ້ຄວາມຕ້ອງການ ໃນການກໍ່ສ້າງກົມກອງ ແລະ ກອງທັບ, ຮັບປະ ກັນພື້ນຖານວັດຖຸເຕັກນິກ, ພື້ນຖານອຸດສາຫະກຳປ້ອງກັນຊາດ, ບູລະນະຮັກສາຄຸ້ມຄອງພາຫະນະ, ອາວຸດຍຸດໂທປະກອນ ໃຫ້ສາມາດກຽມພ້ອມໃຊ້ໄດ້ທຸກເວລາ; ເອົາໃຈໃສ່ປະຕິບັດລະບອບປະຈຳການກຽມພ້ອມປະຕິບັດໜ້າທີ່ວິຊາສະເພາະ ເປັນຕົ້ນ: ດ້ານຈຳນວນພົນ, ພາຫະນະ ແລະ ອາວຸດ ເພື່ອກຽມພ້ອມຮັບໃຊ້ປ້ອງກັນງານສຳຄັນຂອງພັກ, ຂອງຊາດ; ປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ຮ່ວມມືກັບປະເທດຕ່າງໆ, ປັບປຸງ ແລະ ເພີ່ມທະວີການຮ່ວມມືຮອບດ້ານ ກັບກອງທັບເພື່ອນມິດຍຸດທະສາດ ກໍ່ຄືເພື່ອນມິດທີ່ກ້າວໜ້າໃຫ້ດີ, ຍາດແຍ່ງການຊ່ວຍເຫຼືອຈາກສາກົນ ເພື່ອປັບປຸງກໍ່ສ້າງກອງທັບພວກເຮົາ ໃຫ້ກ້າວໜ້າສູ່ຄຸນນະພາບໃໝ່ ຢ່າງບໍ່ຢຸດຢັ້ງ.
ຂ່າວ ແລະ ພາບ: ກົມປະຊາສຳພັນ ຫສນຍ.
