ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການນຸ່ງຖືແບບລາວແນວໃດຈຶ່ງຖືກຕາມຮີດຄອງປະເພນີລາວ

ເວທີເສວະນາພາຍໃຕ້ຫົວຂໍ້ ການນຸ່ງຖືແບບລາວແນວໃດຈຶ່ງຖືກຕາມຮີດຄອງປະເພນີລາວ ໃນງານຕະຫລາດນັດຫັດຖະກໍາລາວທີ່ຈັດຂຶ້ນລະຫວ່າງວັນທີ 12 ຫາ ວັນທີ 18 ຕຸລານີ້ ທີ່ສູນການຄ້າລາວ-ໄອເຕັກ ໂດຍການໃຫ້ກຽດເຂົ້າຮ່ວມຂອງທ່ານ ນາງ ວຽງເງິນ ໄຂຄໍາພິທູນ ທີ່ປຶກສາສະມາຄົມຫັດຖະກໍາລາວ ພ້ອມທັງຜູ້ຕາງໜ້າຈາກ 5 ພາກສ່ວນອ້ອມຂ້າງສູນກາງເປັນຕົ້ນ: ກະຊວງການຕ່າງປະເທດ, ສະມາຄົມຫັດຖະກໍາລາວ, ສູນກາງສະຫະພັນແມ່ຍິງລາວ, ກະຊວງ ຖວທ ແລະ ສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍແຂກຮັບເຊີນ
ທ່ານ ນາງ ວຽງເງິນ ໄຂຄໍາພິທູນ ອະດິດຮອງຫົວໜ້າສະຖາບັນການຕ່າງປະເທດ, ທີ່ປຶກສາສະມາຄົມຫັດຖະກໍາລາວມີຄໍາເຫັນວ່າ: ໃນເວທີເສວະນາຄັ້ງນີ້ ແຂກຮັບເຊີນມາຈາກພາກສ່ວນຕ່າງໆໄດ້ຍົກເອົາແຕ່ລະບັນຫາທີ່ກ່ຽວຂ້ອງກັບເອື້ອຍນ້ອງແມ່ຍິງເປັນຕົ້ນ: ວຽກງານທາງການທູດຂອງກະຊວງການຕ່າງປະເທດ, ມູນເຊື້ອການນຸ່ງຖືຂອງເອື້ອຍນ້ອງແມ່ຍິງລາວ ແລະ ສຶກສາອົບຮົມແມ່ຍິງລາວໃນການອະນຸລັກຮັກສາຮີດຄອງປະເພນີລາວ, ການອອກນິຕິກໍາຄຸ້ມຄອງການນຸ່ງຖືທີ່ເປັນເອກະລັກທີ່ບໍ່ຂັດກັບແນວທາງນະໂຍບາຍຂອງພັກ ແລະ ລັດ ການປຸກລະດົມຊຸກຍູ້ສົ່ງເສີມຊາວໜຸ່ມ-ເຍົາວະຊົນລາວຫັນມາຮັກສາຮີດຄອງປະເພນີຂອງລາວໃນການນຸ່ງຖືໃຫ້ຫລາຍຂຶ້ນ ແລະ ບັນຫາອື່ນໆ
ທ່ານ ນາງ ວຽງເງິນ ໄຂຄໍາພິທູນມີຄໍາເຫັນຕື່ມວ່າ: ສໍາລັບງານເສວະນາຄັ້ງນີ້ ຜູ້ເຂົ້າຮ່ວມງານທຸກຄົນໄດ້ພ້ອມກັນຍົກເອົາບັນຫາຕົວຈິງທີ່ເກີດຂຶ້ນໃນສັງຄົມປັດຈຸບັນ ເພື່ອພ້ອມກັນມີຄໍາເຫັນແລກປ່ຽນບົດຮຽນນໍາກັນ; ພາຍໃຕ້ຫົວຂໍ້ກ່ຽວກັບການນຸ່ງຖືແບບລາວ, ແຕ່ງກາຍແບບລາວ ເຫັນວ່າບັນດາຜູ້ເຂົ້າຮ່ວມກໍ່ຄືຜູ້ໄປທ່ຽວຊົມງານໃຫ້ຄວາມສົນໃຈ ແລະ ມີຜົນປະໂຫຍດຕໍ່ສັງຄົມ ກໍ່ຄືປະເທດຊາດຫລາຍຂຶ້ນ ເຮັດໃຫ້ຊາວຊ່າງຫັດຖະກໍາລາວມີຄວາມພາກພູມໃຈຕໍ່ສີໄມ້ລາຍມືໃນການຄວັດ, ການແຕ້ມດອກດວງ ລວດລາຍອັນສວຍສົດງົດງາມທີ່ໂດດເດັ່ນຂອງຜະລິດຕະພັນເຂົາເຈົ້າ; ນອກນີ້ ຍັງເປັນສິ່ງພາກພູມໃຈຂອງຄົນລາວບັນດາເຜົ່າໃນທົ່ວປະເທດ ທີ່ມີໂອກາດນໍາເອົາຜະລິດຕະພັນຫັດຖະກໍາຂອງລາວເຂົ້າຮ່ວມແຂ່ງຂັນຢູ່ພາກພື້ນ ແລະ ສາກົນສາມາດໄດ້ຮັບລາງວັນຈາກອົງການຢູແນັດສະໂກຕື່ມອີກ.
ໂດຍ: ບຸນຍັງ ພຸດສະຫວັດ