ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ການນໍາຂັ້ນສູງພັກ-ລັດເຂົ້າຮ່ວມພິທີວາງພວງມາລາຢູ່ອານຸສາວະລີນັກຮົບນິລະນາມດາວແດງ ແລະ ພິທີ ວາງກະຕ່າດອກໄມ້ຢູ່ອະນຸສອນສະຖານປະທານໄກສອນ ພົມວິຫານ

ການນໍາຂັ້ນສູງພັກ-ລັດ ເຂົ້າຮ່ວມພິທີວາງພວງມາລາ ຢູ່ອານຸສາວະລີນັກຮົບນິລະນາມດາວແດງ ແລະ ພິທີ ວາງກະຕ່າດອກໄມ້ຢູ່ອະນຸສອນສະຖານປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງ ຊົນລາວທັງຊາດ ຢູ່ນະຄອນຫລວງວຽງຈັນໃນຕອນເຊົ້າມື້ວານນີ້ ເນື່ອງໃນໂອກາດວັນຊາດ ທີ 2 ທັນວາ ຄົບຮອບ 44 ປີ ເພື່ອສະແດງຄວາມກະຕັນຍູຮູ້ບຸນຄຸນ ແລະ ຈາລຶກຄຸນງາມຄວາມດີຕໍ່ວິລະຊົນແຫ່ງຊາດ, ນັກຮົບແຂ່ງຂັນ, ນາຍ ແລະ ພົນທະຫານ ແລະປະຊາຊົນລາວບັນດາເຜົ່າ ທີ່ເສຍສະຫລະເລືອດເນື້ອ ແລະ ຊີວິດ ໃນພາລະກິດຕໍ່ສູ້ກູ້ຊາດ ຕ້ານກັບຈັກກະພັດຜູ້ຮຸກຮານທັງເກົ່າ ແລະໃຫມ່ ໃນເມື່ອກ່ອນ ເພື່ອຍາດເອົາເອກະລາດມາໃຫ້ປະເທດຊາດ, ເພຶ່ອສະແດງຄວາມຮູ້ບຸນຄຸນ ແລະ ຈົ່ງຮັກພັກດີຕໍ່ຜູ້ນໍາການ ປະຕິວັດທີ່ເສຍສະຫລະເຫື່ອແຮງ, ສະຕິປັນຍາ ແລະ ເວລາອັນມີຄ່າເພື່ອພາລະກິດປົດປ່ອຍຊາດອອກ ຈາກແອກຄອບຄອງຂອງຈັກກະພັດຕ່າງດ້າວ.

ພິທີເລີ່ມຂຶ້ນຢ່າງເປັນທາງການໃນເວລາ 6 ໂມງເຄິ່ງ ຢູ່ອະນຸສາວະລີນັກຮົບນິລະນາມລວມມີ 5 ຄະນະ ທໍາອິດ ແມ່ນຄະນະບໍລິຫານງານສູນກາງພັກນໍາໂດຍທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານ ສູນກາງພັກ ປະທານປະເທດ, ຕໍ່ມາຄະນະສູນກາງແນວລາວສ້າງຊາດ-ອົງການຈັດຕັ້ງມະຫາຊົນ ນໍາໂດຍ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບແລະອົງການປົກ ຄອງນະຄອນຫລວງວຽງຈັນ. ຕໍ່ມາ ເວລາປະມານ 7 ໂມງ ທຸກຄະນະໄດ້ໄປວາງກະຕ່າດອກໄມ້ ຢູ່ອະນຸສອນສະຖານ ປະທານໄກສອນ ພົມວິຫານ ຜູ້ນໍາທີ່ເເສນເຄົາລົບຮັກຂອງປວງ ຊົນລາວທັງຊາດ ເພື່ອສະແດງຄວາມຮູ້ບຸນຄຸນຈົ່ງຮັກພັກດີ, ທີ່ທ່ານໄດ້ອຸທິດເຫື່ອແຮງ ສະຕິປັນຍາ ຕະຫລອດຊີວິດ  ເຂົ້າໃນພາລະກິດປະຕິວັດນໍາພາປະຊາຊົນລາວ ຕໍ່ສູ້ຕ້ານກັບຈັກກະພັດຜູ້ຮຸກຮານຈົນສາມາດຍາດໄດ້ໄຊຊະນະ, ລຶບລ້າງລະບອບລາຊາທິປະໄຕ ແລະ ສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.

ຂ່າວ: ເດດອາລຸນ ແກ້ວວິໄລ