ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການນໍາຂັ້ນສູງພັກ-ລັດເຂົ້າຮ່ວມພິທີວາງພວງມາລາຢູ່ອານຸສາວະລີນັກຮົບນິລະນາມດາວແດງ ແລະ ພິທີວາງກະຕ່າດອກໄມ້ຢູ່ອະນຸສອນສະຖານປະທານໄກສອນ ພົມວິຫານ:

ໃນຕອນເຊົ້າມື້ນີ້ ວັນທີ 22 ມິນາ 2020 ທີ່ນະຄອນຫຼວງວຽງຈັນ, ການນໍາຂັ້ນສູງພັກ-ລັດເຮົາ ໄດ້ເຂົ້າຮ່ວມພິທີວາງພວງມາລາຢູ່ອານຸສາວະລີນັກຮົບນິລະນາມດາວແດງ ແລະ ພິທີວາງກະຕ່າດອກໄມ້ຢູ່ອະນຸສອນສະຖານປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ, ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວຄົບ ຮອບ 65 ປີ ແລະ ເພື່ອສະແດງຄວາມກະຕັນຍູຮູ້ບຸນຄຸນ ແລະ ຈາລຶກຄຸນງາມຄວາມດີຂອງວິລະຊົນແຫ່ງຊາດ, ນັກຮົບແຂ່ງຂັນ, ນາຍ ແລະ ພົນທະຫານ ແລະ ປະຊາຊົນລາວບັນດາເຜົ່າທີ່ໄດ້ເສຍສະຫຼະເລືອດເນື້ອ ແລະ ຊີວິດ ໃນພາລະກິດຕໍ່ສູ້ກູ້ຊາດ ຕ້ານຈັກ ກະພັດຜູ້ຮຸກຮານທັງເກົ່າ ແລະໃຫມ່ ໃນເມື່ອກ່ອນ ເພື່ອຍາດເອົາເອກະລາດມາໃຫ້ປະເທດຊາດ ແລະ ທັງເພຶ່ອສະແດງຄວາມຮູ້ບຸນຄຸນ ແລະ ຈົ່ງຮັກພັກດີຕໍ່ຜູ້ນໍາການປະຕິວັດທີ່ໄດ້ເສຍສະຫຼະເຫື່ອແຮງ, ສະຕິປັນຍາ ແລະ ຊີວິດອັນມີຄ່າເພື່ອພາລະກິດປົດປ່ອຍຊາດອອກຈາກແອກຄອບຄອງຂອງຈັກກະພັດຕ່າງດ້າວ.

ພິທີເລີ່ມຂື້ນຢ່າງເປັນທາງການໃນເວລາ 6:30 ໂມງ ຢູ່ອະນຸສາວະລີນັກຮົບນິລະນາມ, ຊຶ່ງ ລວມມີ 4 ຄະນະ, ໂດຍຄະນະທໍາອິດ ແມ່ນຄະນະບໍລິຫານງານສູນກາງພັກ, ສະພາແຫ່ງຊາດ ແລະ ລັດຖະບານ ນໍາໂດຍສະຫາຍບຸນຍັງ ວໍລະຈິດ, ເລຂາທິການໃຫຍ່ຄະນະບໍລິ ຫານງານສູນກາງພັກ, ປະທານປະເທດ, ພ້ອມດ້ວຍສະຫາຍນາງປານີ ຢ່າທໍ່ຕູ້, ກໍາມະ ການກົມການເມືອງສູນກາງພັກ, ປະທານສະພາແຫ່ງຊາດ, ທ່ານທອງລຸນ ສີສຸລິດ, ກຳມະ ການກົມການເມືອງສູນກາງພັກ, ນາຍົກລັດຖະມົນຕີ, ຖັດມາແມ່ນຄະນະຂອງການນໍາກະ ຊວງປ້ອງກັນປະເທດ-ກະຊວງປ້ອງກັນຄວາມສະຫງົບ, ຕິດຕາມດ້ວຍຄະນະຂອງການນໍາຈາກສູນກາງແນວລາວສ້າງຊາດ, ສາມອົງການຈັດຕັ້ງມະຫາຊົນ, ສະຫະພັນນັກຮົບເກົ່າ ແລະ ຄະນະຂອງການນໍາຈາກອົງການປົກຄອງນະຄອນຫລວງວຽງຈັນຕາມລໍາດັບ.

ຕໍ່ມາ ເວລາປະມານ 7 ໂມງ, ທຸກຄະນະໄດ້ໄປວາງກະຕ່າດອກໄມ້ ຢູ່ອະນຸສອນສະຖານປະທານໄກສອນ ພົມວິຫານຜູ້ນໍາທີ່ເເສນເຄົາລົບຮັກຂອງປວງຊົນລາວທັງຊາດ ເພື່ອສະ ແດງຄວາມຮູ້ບຸນຄຸນ ແລະ ຄວາມຈົ່ງຮັກພັກດີ ທີ່ທ່ານໄດ້ອຸທິດເຫື່ອແຮງ ແລະ ສະຕິປັນ ຍາຕະຫລອດຊີວິດເຂົ້າໃນພາລະກິດປະຕິວັດນໍາພາປະຊາຊົນລາວຕໍ່ສູ້ຕ້ານຈັກກະພັດຜູ້ຮຸກຮານ ຈົນສາມາດຍາດໄດ້ໄຊຊະນະ, ລົບລ້າງລະບອບລາຊາທິປະໄຕ ແລະ ສະຖາປະນາ ສາທາລະນະລັດປະຊາທິປະໄຕປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.

ຂ່າວ;ພາບ: ເດດອາລຸນ ແກ້ວວິໄລວົງ