ໃນວັນທີ 25 ກໍລະກົດ 2024 ທີ່ສໍານັກງານກົງສູນໃຫຍ່ ສສ ຫວຽດນາມ ປະຈໍາ ແຂວງສະຫວັນນະເຂດ (ພາກກາງ), ການນໍາຂັ້ນສູງແຂວງຄໍາມ່ວນ ນໍາໂດຍສະຫາຍ ວັນໄຊ ພອງສະຫວັນ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຄໍາມ່ວນ ພ້ອມດ້ວຍຄະນະ ໄດ້ເຂົ້າຮ່ວມໄວ້ອາໄລຕໍ່ການຈາກໄປຂອງ ສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ ໂດຍມີສະຫາຍ ນາງ ດັ້ງ ທິ ຮາຍ ເຕີມ ກົງສູນໃຫຍ່ຫວຽດນາມ ປະຈໍາແຂວງສະຫວັນນະເຂດ ພ້ອມດ້ວຍຄະນະໄດ້ໃຫ້ການຕ້ອນຮັບ.
ໃນໂອກາດນີ້, ສະຫາຍ ວັນໄຊ ພອງສະຫວັນ ຕາງໜ້າໃຫ້ຄະນະບໍລິຫານງານພັກແຂວງ, ອົງການປົກຄອງແຂວງ, ແນວລາວສ້າງຊາດແຂວງຄໍາມ່ວນ ໄດ້ລົງນາມເພື່ອສະແດງຄວາມໂສກເສົ້າ ແລະ ອາໄລອາວອນຢ່າງສຸດຊຶ້ງ ຕໍ່ການຈາກໄປ ທີ່ບໍ່ມີວັນຫວນຄືນມາ ຂອງສະຫາຍ ຫງວຽນ ຝູ໋ຈ້ອງ, ເຊິ່ງເປັນການສູນເສຍການນໍາຂັ້ນສູງສຸດ ແລະ ແສນເຄົາລົບຮັກຂອງປະຊາຊົນ ຫວຽດນາມ.
ຂ່າວ-ພາບ: ແດງສະຫວັດ ແສນພານິດ
