ການນໍາຂັ້ນສູງ ປະເທດເພື່ອນມິດ ສົ່ງຄໍາອວຍພອນວັນເກີດເຖິງປະທານ ຄຳໄຕ ສີພັນດອນ

ໂດຍປະຕິບັດຕາມການມອບໝາຍ ຂອງກົມການເມືອງສູນກາງພັກ, ຄະນະເລຂາທິການສູນກາງພັກ ໃນຕອນແລງ ວັນທີ 7ກຸມພາ 2024 ທີ່ສໍານັກງານນາຍົກລັດຖະມົນຕີ, ສະຫາຍ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ຕາງໜ້າໃຫ້ພັກ, ລັດຖະບານ ແລະ ໃນນາມຄອບຄົວ ສີພັນດອນ ໄດ້ໃຫ້ກຽດຕ້ອນຮັບສະຫາຍ ຫງວຽນ ບາຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳລາວ ແລະ ສະຫາຍ ຫວາງ ຊາງ, ອຸປະທູດ ສປ ຈີນ ປະຈຳລາວ ພ້ອມດ້ວຍຄະນະ ທີ່ໄດ້ນຳເອົາສານອວຍພອນອັນປະເສີດ ຈາກສູນກາງພັກ ແລະ ລັດຖະບານ ກໍ່ຄື ພາກສ່ວນກ່ຽວຂ້ອງຂອງຕົນ ມາຍັງປະທານ ຄຳໄຕ ສີພັນດອນ ເນື່ອງໃນວັນເກີດຄົບຮອບ 100 ປີ (8 ກຸມພາ 1924 – 8 ກຸມພາ 2024).

ກ່ອນອື່ນ ສະຫາຍ ຫງວຽນ ບາຮຸ່ງ ໄດ້ລາຍງານໃຫ້ຊາບວ່າ ພັກ-ລັດຖະບານຫວຽດນາມ ເຫັນໄດ້ເຖິງຄວາມໝາຍຄວາມສຳຄັນຂອງການຈັດຕັ້ງສະເຫຼີມສະຫຼອງວັນເກີດ ປະທານ ຄໍາໄຕ ສີພັນດອນ ຄົບຮອບ 100 ປີ ໂດຍໄດ້ຍົກເນື້ອໃນທີ່ສຳຄັນໃນສານອວຍພອນວັນເກີດຂອງ ສະຫາຍ ຫງວຽນ ຟູ ຈ້ອງ ແລະ ສະຫາຍ ຫວໍ ວັນ ເຖືອງ, ຄະນະປະສານງານທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວ ວ່າ: “ພັກ, ລັດຖະບານ ແລະ ປະຊາຊົນຫວຽດນາມ ຕີລາຄາສູງຕໍ່ບັນດາການອຸທິດດ້ານເຫື່ອແຮງ, ສະຕິປັນຍາ ແລະ ບົດບາດສຳຄັນຂອງປະທານ ຄໍາໄຕ ສີພັນດອນ ທີ່ມີຕໍ່ພາລະກິດປະຕິວັດລາວ ກໍຄືໃນການປັບປຸງ ແລະ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ. ອວຍພອນປະທານ ຄໍາໄຕ ສີພັນດອນ ແລະ ພັນລະຍາ ມີສຸຂະພາບແຂງແຮງ, ມີຄວາມສຸກ, ມີອາຍຸຍືນຍາວ ແລະ ປະກອບສ່ວນຮ່ວມກັບບັນດາສະຫາຍການນໍາພັກ, ລັດຖະບານລາວ ໃນການນໍາພາປະຊາຊົນລາວ ສືບຕໍ່ຍາດໄດ້ຫຼາຍຜົນງານໃໝ່, ໃຫຍ່ຫຼວງກວ່າເກົ່າໃນຂະບວນການປ່ຽນແປງໃໝ່, ປົກປັກຮັກສາ ແລະ ສ້າງສາປະເທດຊາດ, ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີXI ຂອງພັກປະຊາຊົນ ປະຕິວັດລາວ, ສຳເລັດການກໍ່ສ້າງ ປະເທດລາວ ມີສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ ຕາມເປົ້າໝາຍສັງຄົມນິຍົມ. ພັກ, ລັດຖະບານ ແລະ ປະຊາຊົນຫວຽດນາມ ຈະຮ່ວມກັບພັກ, ລັດຖະບານ ແລະ ປະຊາຊົນລາວ ປົກປ້ອງ, ຮັກສາ ແລະ ເພີ່ມພູນຄູນສ້າງສາຍພົວພັນສາມັກຄີພິເສດ ຫວຽດນາມ-ລາວ ນັບມື້ພັດທະນາເຂົ້າສູ່ລວງເລິກ, ແທດເໝາະກັບສະພາບຕົວຈິງ ແລະ ມີປະສິດທິຜົນ ໃນບັນດາຂົງເຂດ, ນໍາມາຊຶ່ງຜົນປະໂຫຍດໃຫ້ແກ່ປະຊາຊົນສອງປະເທດ, ປະກອບສ່ວນເຂົ້າໃນການຮັກສາສັນຕິພາບໃນພາກພື້ນ ແລະ ໃນໂລກ”.

ໃນໂອກາດນີ້, ສະຫາຍ ສອນໄຊ ສີພັນດອນ ກໍໄດ້ກ່າວສະແດງຄວາມຂອບໃຈ ແລະ ຝາກຄວາມຂອບໃຈອັນສຸດຊຶ້ງ ໄປຍັງສະຫາຍການນໍາຂັ້ນສູງຂອງພັກ-ລັດຖະບານ ແລະ ພາກສ່ວນທີ່ກ່ຽວຂ້ອງຫວຽດນາມ ທີ່ໄດ້ມີຄວາມສາມັກຄີຮັກແພງ ແລະ ຄຳອວຍພອນໄຊອັນປະເສີດແລະ ອວຍພອນວັນເກີດຄົບຮອບ 100 ປີ ມາຍັງ ປະທານ ຄໍາໄຕ ສີພັນດອນ ພ້ອມທັງ ໄດ້ສົ່ງສານອວຍພອນວັນເກີດເນື່ອງໃນໂອກາດດັ່ງກ່າວ ຊຶ່ງໃນນາມທີ່ເປັນການນໍາຂັ້ນສູງຂອງພັກ-ລັດຖະບານລາວ ແລະ ໃນນາມຄອບຄົວ ສີພັນດອນຂໍສະແດງຄວາມຂອບໃຈຕໍ່ສະຫາຍ ຫງວຽນ ບາ ຮຸ່ງ ທີ່ໄດ້ນໍາສົ່ງສານອວຍພອນອັນປະເສີດ ແລະ ຂອງຂວັນຈາກການນໍາຂັ້ນສູງສຸດຂອງພັກ, ລັດຖະບານ ແລະ ພາກສ່ວນກ່ຽວຂ້ອງຫວຽດນາມ ມາຍັງປະທານ ຄໍາໄຕ ສີພັນດອນ ໂດຍສະເພາະສານອວຍພອນ ແມ່ນມີຄວາມໝາຍປະຫວັດສາດທີ່ສຳຄັນທີ່ສຸດ ຊຶ່ງໄດ້ສະແດງເຖິງຄວາມຮູ້ສຶກຂອງສະຫາຍ, ອ້າຍ, ນ້ອງ ເປັນການນໍາເອົາໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງອັນສະໜິດສະໜົມຖານສະຫາຍອ້າຍນ້ອງເພື່ອນມິດ ທີ່ມີມູນເຊື້ອການພົວພັນຮ່ວມມື, ຄວາມເປັນຈິດໜຶ່ງໃຈດຽວທີ່ເລິກເຊິ່ງ ລະຫວ່າງ ສອງຊາດ ລາວ-ຫວຽດນາມ ມາແຕ່ດົນນານແລ້ວນັ້ນ.

ໃນມື້ດຽວກັນ,ສະຫາຍ ສອນໄຊ ສີພັນດອນ ກໍ່ໄດ້ໃຫ້ກຽດຕ້ອນຮັບ ສະຫາຍ ຫວາງຊາງ ອຸປະທູດ ສປ ຈີນ ປະຈຳລາວ ພ້ອມດ້ວຍຄະນະທີ່ໄດ້ເຂົ້າຢ້ຽມ ເພື່ອນຳເອົາສານອວຍພອນເນື່ອງໃນວັນເກີດ ຄົບຮອບ 100 ປີຈາກສະຫາຍ ສີ ຈິ້ນຜິງ, ເລຂາທິການໃຫຍ່, ປະທານປະເທດ ແຫ່ງ ສປ ຈີນ ມາຍັງປະທານ ຄຳໄຕ ສີພັນດອນ, ອະດີດປະທານພັກ, ອະດີດປະທານປະເທດ ແຫ່ງ ສປປ ລາວ.ສະຫາຍ ຫວາງຊາງ ອຸປະທູດ ສປ ຈີນ ປະຈໍາລາວໄດ້ລາຍງານໃຫ້ສະຫາຍ ນາຍົກລັດຖະມົນຕີຊາບວ່າ ສູນກາງພັກກອມມູນິດຈີນ ຕີລາຄາສູງ ຕໍ່ການອຸທິດຕົນທາງດ້ານຕ່າງໆ ຂອງສະຫາຍ ຄຳໄຕ ສີພັນດອນ ທີ່ໄດ້ປະກອບສ່ວນເຂົ້າໃນການພົວພັນຮ່ວມມື ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ເຊິ່ງສະແດງໃຫ້ເຫັນເຖິງນໍ້າໃຈມິດຕະພາບອັນທີ່ເປັນມູນເຊື້ອ ທີ່ມີມາແຕ່ສະໄໝຕໍ່ສູ້ປົດປ່ອຍຊາດ ກໍ່ຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ. ສໍາລັບສານອວຍພອນວັນເກີດການນຳຂັ້ນສູງສຸດຂອງ ສປ ຈີນ ເຖິງປະທານ ຄຳໄຕ ສີພັນດອນ ທີ່ລົງນາມໂດຍ ສະຫາຍ ສີ ຈິ້ນຜິງ ເລຂາທິການໃຫຍ່, ປະທານປະເທດ ແຫ່ງ ສປ ຈີນໃນຄັ້ງນີ້ ຖືວ່າເປັນສານອວຍພອນວັນເກີດ ທີ່ສູນກາງພັກກອມມູນິດຈີນສົ່ງເຖິງອະດີດການນຳຂັ້ນສູງຂອງຕ່າງປະເທດ ສະບັບທຳອິດ (ຄັ້ງປະຫວັດສາດ) ເນື່ອງຈາກໄລຍະຜ່ານມາ ພັກ-ລັດ, ການນຳສູງສຸດຂອງ ສປ ຈີນ ແມ່ນບໍ່ເຄີຍສົ່ງສານອວຍພອນວັນເກີດ ເຖິງອະດີດການນຳຕ່າງປະເທດ. ການສົ່ງສານດັ່ງກ່າວ ເປັນການສະແດງເຖິງຄວາມເອົາໃຈໃສ່ ຂອງພັກ-ລັດຈີນ ກໍ່ຄື ສະຫາຍ ເລຂາທິການໃຫຍ່, ປະທານປະເທດ ສີ ຈິ້ນ ຜິງ ແລະ ເປັນການຖືສຳຄັນໃນລະດັບສູງ ຕໍ່ຄຸນງາມຄວາມດີ ແລະ ການປະກອບສ່ວນຂອງປະທານຄຳໄຕ ສີພັນດອນ ເຂົ້າໃນການເສີມສ້າງຂະຫຍາຍສາຍພົວພັນຮ່ວມມື ລາວ-ຈີນ ໃນໄລຍະຜ່ານມາ.

ໃນໂອກາດນີ້, ສະຫາຍ ນາຍົກລັດຖະມົນຕີ ໄດ້ສະແດງຄວາມຂອບໃຈຢ່າງຈິງໃຈ ຜ່ານສະຫາຍອຸປະທູດ ສປ ຈີນ ປະຈຳລາວໄປຍັງສະຫາຍ ສີ ຈີ້ນຜິງ ເລຂາທິການໃຫຍ່, ປະທານປະເທດຈີນທີ່ໄດ້ມີຄວາມເປັນຫ່ວງເປັນໄຍແລະ ສົ່ງສານອວຍພອນວັນເກີດ ເຖິງປະທານ ຄຳໄຕ ສີພັນດອນ ໃນຄັ້ງນີ້ ເຊິ່ງສະແດງໃຫ້ເຫັນເຖິງນ້ຳໃຈມິດຕະພາບອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ທີ່ມີມາແຕ່ສະໄໝຕໍ່ສູ້ປົດປ່ອຍຊາດ ກໍ່ຄືຄວາມເອົາໃຈໃສ່ຂອງສະຫາຍເລຂາທິການໃຫຍ່, ປະທານປະເທດ ສີ ຈິ້ນ ຜິງ ຕໍ່ສາຍພົວພັນລາວ-ຈີນ ແລະ ເປັນການຖືສຳຄັນໃນລະດັບສູງ ຕໍ່ຄຸນງາມຄວາມດີ ແລະ ການປະກອບສ່ວນຂອງປະທານ ຄຳໄຕ ສີພັນດອນ ເຂົ້າໃນການເສີມຂະຫຍາຍການພົວພັນຮ່ວມມືລາວ-ຈີນ ໃນໄລຍະຜ່ານມາ; ໄດ້ຕີລາຄາສູງ ຕໍ່ສາຍພົວພັນ ແລະ ການຮ່ວມມື ລາວ-ຈີນ ໃນໄລຍະຜ່ານມາ ກໍ່ຄືປະຈຸບັນ.

ໃນໂອກາດຕ້ອນຮັບສະຫາຍ ເອກອັກຄະລັດຖະທູດ ແລະ ອຸປະທູດປະເທດເພື່ອນມິດໃນຄັ້ງນີ້, ສະຫາຍ ນາຍົກລັດຖະມົນຕີ ຍັງໄດ້ກ່າວຄຳອວຍພອນອັນປະເສີດ ເນື່ອງໃນໂອກາດປີໃໝ່ຫວຽດນາມ ແລະ ປີໃໝ່ຈີນ ທີ່ຈະມາເຖິງນີ້ ໄປຍັງການນຳພັກ, ລັດ ແລະ ປະຊາຊົນ ຫວຽດນາມ ແລະ ຈີນ ຈົ່ງມີສຸຂະພາບແຂງແຮງ, ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ອັນແສນຮັກຂອງຕົນ ໃຫ້ສືບຕໍ່ມີຄວາມເຂັ້ມແຂງ, ຮັ່ງມີ ແລະ ຈະເລີນສີວິໄລບໍ່ຢຸດຢັ້ງ; ອວຍພອນໃຫ້ສາຍພົວພັນ ລາວ-ຫວຽດນາມ ແລະ ລາວ-ຈີນ ຈົ່ງໝັ້ນຄົງທະນົງແກ່ນ ແລະ ສວຍສົດງົດງາມ ຕະຫຼອດໄປ.