ວັນທີ 30 ສິງຫາ 2022 ນີ້, ທ່ານ ເລ ຈີ້ ທັນ, ປະທານຄະນະກຳມະການປະຊາຊົນ ແຂວງກວາງນາມ ສສ ຫວຽດນາມ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອັດຕະປື ໂດຍການຕ້ອນຮັບຢ່າງອົບອຸ່ນຂອງ ທ່ານ ເລັດ ໄຊຍະພອນ, ເຈົ້າແຂວງອັດຕະປື ພ້ອມດ້ວຍຄະນະ ທີ່ຫ້ອງປະຊຸມຫ້ອງວ່າການປົກຄອງແຂວງ. ໃນພິທີ ເຈົ້າແຂວງ ອັດຕະປື ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ຜູ້ແທນແຂວງກວາງນາມ ທີ່ໄດ້ນຳພາຄະນະເດີນທາງມາຢ້ຽມຍາມ ແລະ ເຮັດວຽກໃນຄັ້ງນີ້, ທັງເປັນການເພີ່ມທະວີຮັດແໜ້ນຄວາມສາມັກຄີການພົວພັນ, ຮ່ວມມືຮອບດ້ານໄປສູ່ລະດັບໃໝ່ ເຊິ່ງມີຫຼາຍ ຂົງເຂດວຽກງານ, ຫລາຍຂະແໜງການເຊັ່ນ: ຂົງເຂດການສຶກສາ, ກະສິກໍາ, ການຄ້າ, ການລົງທຶນ ແລະ ການທ່ອງທ່ຽວ. ຖືວ່າເປັນໂອກາດທີ່ດີທີ່ສອງແຂວງຈະໄດ້ປຶກສາຫາລືບາງບັນຫາທີ່ຈະຮ່ວມມືໃນຕໍ່ໜ້າ ໂອກາດດຽວກັນ ນັກທຸລະກິດຂອງແຂວງກວາງນາມຈະໄດ້ສຶກສາເບິ່ງຄວາມອາດສາມາດໃນບັນດາຂະແໜງການ, ໂຄງການດຶງດູດການລົງທຶນຢູ່ພາຍໃນແຂວງອັດຕະປື.
ພ້ອມດຽວກັນນີ້ຄະນະນໍາທັງສອງຝ່າຍ ຍັງໄດ້ແລກປ່ຽນຄໍາຄິດຄໍາເຫັນດ້ວຍຄວາມຈິງໃຈ ແລະ ຕີລາຄາສູງຕໍ່ກັບຜົນສໍາເລັດທີ່ທັງສອງພັກ, ສອງລັດ ກໍຄືປະຊາຊົນສອງຊາດ ລາວ-ຫວຽດນາມ ສາມາດຍາດມາໄດ້, ໄລຍະຜ່ານມາ ນັກທຸລະກິດຂອງ ສສ ຫວຽດນາມ ທີ່ເຂົ້າມາລົງທຶນ ໃນໂຄງການທຸລະກິດສ່ວນບຸກຄົນ ແມ່ນຢູ່ໃນອັນດັບໜຶ່ງຂອງແຂວງ.
ຂ່າວ: ມະນີວອນ
Loading...