ວັນທີ 30 ກໍລະກົດ 2024 ນີ້, ທ່ານ ບຸນເລື່ອມ ມະນີວົງ ຮອງເຈົ້າແຂວງຫລວງພະບາງ ພ້ອມດ້ວຍ ຄະນະກໍາມະການຄຸ້ມຄອງ ໄພພິບັດຂັ້ນແຂວງ ສົມທົບກັບ ອົງການປົກຄອງເມືອງວຽງຄໍາ ໄດ້ເຄື່ອນໄຫວຢ້ຽມຢາມ ແລະມອບເຄື່ອງຊ່ວຍເຫຼືອໃຫ້ກັບປະຊາຊົນ ບ້ານເມືອງໝ້ວຍ, ບ້ານວັງຄໍາ ກຸ່ມເມືອງຫມ້ວຍ, ບ້ານຕຸ່ມມິ່ງ, ບ້ານວຽງທອງ ແລະບ້ານສົບເຮືອງ ກຸ່ມສົບເຮືອງ ເມືອງວຽງຄຳ, ທີ່ໄດ້ຮັບຜົນກະທົບຈາກໄພພິພັດນ້ຳຖ້ວມ ໃນລະຫວ່າງວັນທີ 24-25 ກໍລະກົດ ຜ່ານມາ.
ໂອກາດນີ້ ທ່ານ ບຸນເລື່ອມ ມະນີວົງ ໄດ້ຕາງໜ້າໃຫ້ກັບການນຳແຂວງ ສະແດງຄວາມເປັນຫ່ວງຕໍ່ກັບຊີວິດການເປັນຢູ່, ການດຳລົງຊີວິດຂອງປະຊາຊົນ, ທັງໄດ້ຮຽກຮ້ອງໃຫ້ອົງການປົກຄອງບ້ານ ແລະທຸກພາກສ່ວນ ຕ້ອງເພີ່ມທະວີຄວາມສາມັກຄີ, ຊ່ວຍເຫຼືອເຊິ່ງກັນ ແລະກັນ ພ້ອມກັນສູ້ຊົນຜ່ານຜົ້ນວິກິດໃນຄັ້ງໄປດ້ວຍດີ, ປັບປຸງຊີວິດການເປັນຢູ່ ໃຫ້ກັບຄືນສະພາບປົກກະຕິໂດຍໄວ ຕິດພັນກັບການປ້ອງກັນພະຍາດລະບາດທີ່ອາດຈະເກີດຂຶ້ນ.
ຈາກນັ້ນ ໄດ້ມອບເງິນສົດ ຈຳນວນ 70 ລ້ານກີບ, ລວມທັງນໍ້າດື່ມ, ເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິໂພກ ອີກຈຳນວນໜຶ່ງ ລວມມູນຄ່າທັງໝົດ 106.500.000 ກີບ ໃຫ້ກັບການນຳເມືອງວຽງຄໍາ ພ້ອມທັງລົງແຈກຢ້າຍໃຫ້ກັບປະຊາຊົນທີ່ໄດ້ຖືກຜົນກະທົບ, ເພື່ອແກ້ໄຂບັນເທົາທຸກໃນເບື້ອງຕົ້ນ ຕື່ມອີກ.
ສຳລັບເຫດການນ້ຳຖ້ວມຄັ້ງນີ້ ເຮັດໃຫ້ການເຂົ້າຫາບາງບ້ານ ທີ່ຖືກຜົນກະທົບ ຍັງພົບຄວາມຫຍຸ້ງຍາກ, ເນື່ອງຈາກເສັ້ນທາງຖືກຕັດຂາດ, ບາງບ້ານໄດ້ຂ້າມນໍ້າ ເຊິ່ງໄດ້ລໍຖ້າລະດັບນໍ້າຫຼຸດລົງ ຈຶ່ງສາມາດເຂົ້າໄປຫາພື້ນທີ່ໄດ້, ປັດຈຸບັນພາກສ່ວນທີ່ກ່ຽວຂ້ອງ ກຳລັງເລັ່ງແກ້ໄຂເສັ້ນທາງຫຼວງແຫ່ງຊາດເລກທີ 1C ແຕ່ບ້ານເມືອງໝ້ວຍ ຫາ ບ້ານໜອງຄໍາ ເຂດແດນເມືອງຮ້ຽມ ແຂວງຫົວພັນ ຄາດວ່າຈະແກ້ໄຂຂັ້ນພື້ນຖານສໍາເລັດໃນໄວໆນີ້.
ສະເພາະບ້ານເມືອງໝ້ວຍ ມີຄອບຄົວທີ່ຖືກຜົນກະທົບມີ 89 ຄອບຄົວ, ໃນນັ້ນ ຄອບຄົວທີ່ບໍ່ສາມາດເອົາເຄື່ອງຂອງ ອອກຈາກເຮືອນໄດ້ ແລະມີຄວາມຈໍາເປັນຕ້ອງໃຫ້ການຊ່ວຍເຫຼືອທີ່ສຸດ 28 ຄອບຄົວ, ເນື້ອທີ່ນາເສຍຫາຍເກືອບ 9 ເຮັດຕາ, ລົດຈັກ 15 ຄັນ, ລົດໄຖນາ 4 ຄັນ, ຈັກປັ່ນເຂົ້າ 1 ເຄື່ອງ, ລວມທັງສັດລ້ຽງຂອງປະຊາຊົນຈຳນວນໜຶ່ງ, ຄາດຄະເນຄວາມເສຍຫາຍເບື້ອງຕົ້ນ 2 ຕື້ 9 ຮ້ອຍກວ່າລ້ານກີບ.
ພາບ+ຂ່າວ: ທະນູສິນ ອິດທິພົນ
