ທ່ານ ບຸນເລື່ອມ ມະນີວົງ ຮອງເຈົ້າແຂວງໆຫລວງພະບາງ ພ້ອມດ້ວຍຄະນະກໍາມະການ ຄຸ້ມຄອງໄພພິບັດຂັ້ນແຂວງ ແລະ ອົງການປົກຄອງເມືອງວຽງຄໍາ ໄດ້ເຄື່ອນໄຫວຢ້ຽມຢາມ ແລະ ມອບເຄື່ອງຊ່ວຍເຫລືອ ໃຫ້ປະຊາຊົນ ບ້ານເມືອງໝ້ວຍ, ບ້ານວັງຄໍາ ກຸ່ມເມືອງໝ້ວຍ, ບ້ານຕຸ່ມມິ່ງ, ບ້ານວຽງທອງ ແລະ ບ້ານສົບເຮືອງ ກຸ່ມສົບເຮືອງ ເມືອງວຽງຄຳ ໃນວັນທີ 30 ກໍລະກົດ 2024 ທີ່ໄດ້ຮັບຜົນກະທົບຈາກໄພພິພັດນ້ຳຖ້ວມ ໃນລະຫວ່າງວັນທີ 24-25 ກໍລະກົດ 2024 ຜ່ານມາ.
ເຄື່ອງທີ່ນຳມາມອບໃນຄັ້ງນີ້ ປະກອບມີ ເງິນສົດ 70 ລ້ານກີບ, ນໍ້າດື່ມ, ເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິໂພກ ອີກຈຳນວນໜຶ່ງ ລວມມູນຄ່າທັງໝົດ 106.500.000 ກີບ ໃຫ້ການນຳເມືອງວຽງຄໍາ ເພື່ອແຈກຢາຍໃຫ້ປະຊາຊົນ ທີ່ໄດ້ຖືກຜົນກະທົບຈາກນ້ຳຖ້ວມ ເພື່ອແກ້ໄຂບັນເທົາທຸກໃນເບື້ອງຕົ້ນ.
ໂອກາດນີ້, ທ່ານ ບຸນເລື່ອມ ມະນີວົງ ໄດ້ຕາງໜ້າໃຫ້ກັບການນຳແຂວງ ສະແດງຄວາມເປັນຫ່ວງຕໍ່ຊີວິດການເປັນຢູ່, ການດຳລົງຊີວິດຂອງປະຊາຊົນ ທັງໄດ້ຮຽກຮ້ອງໃຫ້ອົງການປົກຄອງບ້ານ ແລະ ທຸກພາກສ່ວນ ຕ້ອງເພີ່ມທະວີຄວາມສາມັກຄີ, ຊ່ວຍເຫລືອເຊິ່ງກັນ ແລະ ກັນ ພ້ອມກັນສູ້ຊົນຜ່ານພົ້ນວິກິດໃນຄັ້ງໄປດ້ວຍດີ, ປັບປຸງຊີວິດການເປັນຢູ່ ໃຫ້ກັບຄືນສູ່ສະພາບປົກກະຕິໂດຍໄວ ຕິດພັນກັບການປ້ອງກັນພະຍາດລະບາດທີ່ອາດຈະເກີດຂຶ້ນ.
ສຳລັບເຫດການນ້ຳຖ້ວມຄັ້ງນີ້ ເຮັດໃຫ້ການເດີນທາງເຂົ້າຫາບາງບ້ານ ທີ່ຖືກຜົນກະທົບ ຍັງພົບຄວາມຫຍຸ້ງຍາກ ເນື່ອງຈາກເສັ້ນທາງຖືກຕັດຂາດ, ບາງບ້ານໄດ້ຂ້າມນໍ້າ ເຊິ່ງໄດ້ລໍຖ້າລະດັບນໍ້າຫລຸດລົງ ຈຶ່ງສາມາດເຂົ້າໄປຫາພື້ນທີ່ດັ່ງກ່າວໄດ້. ປັດຈຸບັນພາກສ່ວນທີ່ກ່ຽວຂ້ອງ ພວມເລັ່ງແກ້ໄຂເສັ້ນທາງຫລວງແຫ່ງຊາດເລກທີ 1C ແຕ່ບ້ານເມືອງໝ້ວຍ ຫາບ້ານໜອງຄໍາ ເຂດແດນເມືອງຮ້ຽມ ແຂວງຫົວພັນ ຄາດວ່າຈະແກ້ໄຂຂັ້ນພື້ນຖານສໍາເລັດໃນໄວໆນີ້. ສະເພາະບ້ານເມືອງໝ້ວຍ ມີຄອບຄົວທີ່ຖືກຜົນກະທົບມີ 89 ຄອບຄົວ ໃນນີ້, ຄອບຄົວທີ່ບໍ່ສາມາດເອົາເຄື່ອງຂອງອອກຈາກເຮືອນໄດ້ ແລະ ມີຄວາມຈໍາເປັນຕ້ອງໃຫ້ການຊ່ວຍເຫລືອທີ່ສຸດ 28 ຄອບຄົວ, ເນື້ອທີ່ນາເສຍຫາຍເກືອບ 9 ເຮັກຕາ, ລົດຈັກ 15 ຄັນ, ລົດໄຖນາ 4 ຄັນ, ຈັກປັ່ນເຂົ້າ 1 ເຄື່ອງ ລວມທັງສັດລ້ຽງຂອງປະຊາຊົນຈຳນວນໜຶ່ງ ຄາດຄະເນຄວາມເສຍຫາຍເບື້ອງຕົ້ນ 2,9 ຕື້ກວ່າກີບ. ຕໍ່ກັບເຫດການຄັ້ງນີ້, ອົງການປົກຄອງບ້ານ ໄດ້ຮຽກຮ້ອງ ແລະ ຂໍຄວາມຊ່ວຍເຫລືອມາຍັງທຸກພາກສ່ວນໃນສັງຄົມ ຈົ່ງພ້ອມກັນປະກອບສ່ວນຊ່ວຍເຫລືອ ວັດຖຸປັດໄຈທີ່ຈໍາເປັນ.
ຂ່າວ-ພາບ: ທະນູສິນ ອິດທິພົນ
