ໃນວັນທີ 25 ກໍລະກົດ 2024, ການນໍາແຂວງໄຊຍະບູລີ ນໍາໂດຍ ສະຫາຍ ດວງຕາ ໄຊວຸດ ຮອງເລຂາພັກແຂວງ ໄດ້ເຂົ້າວາງພວງມະລາ ໄວ້ອາໄລຕໍ່ການຈາກໄປຂອງ ສະຫາຍ ຫງວຽນ ຝູ໋ຈ້ອງ ອະດີດເລຂາທິການໃຫຍ່, ອະດີດຄະນະບໍລິຫານງານສູນກາງພັກຄອມມູນິດຫວຽດນາມ ທີ່ກົງສູນໃຫຍ່ ສສ ຫວຽດນາມ ປະຈໍາພາກເໜືອຂອງ ສປປ ລາວ ທີ່ແຂວງຫລວງພະບາງ ເພື່ອເປັນການສະແດງຄວາມເສົ້າສະຫລົດໃຈ ແລະ ອາໄລອາວອນຢ່າງສຸດຊຶ້ງ ຕໍ່ການຈາກໄປຂອງ ສະຫາຍ ຫງວຽນ ຝູ໋ຈ້ອງ.
ໂອກາດດັ່ງກ່າວ, ສະຫາຍ ດວງຕາ ໄຊວຸດ ຕາງໜ້າໃຫ້ປະຊາຊົນບັນດາເຜົ່າ ແຂວງ ໄຊຍະບູລີ ໄດ້ກ່າວວ່າ: ການຈາກໄປຂອງ ສະຫາຍ ຫງວຽນ ຝູ໋ຈ້ອງ ເປັນການສູນເສຍຜູ້ນໍາປະຕິວັດ ທີ່ອົງອາດກ້າຫານຂອງພັກ-ລັດ ແລະ ປະຊາຊົນຫວຽດນາມອ້າຍນ້ອງ ເຊິ່ງຕະຫລອດຊີວິດແຫ່ງການເຄື່ອນໄຫວປະຕິວັດ ສະຫາຍໄດ້ອຸທິດຊີວິດ, ເຫື່ອແຮງ ແລະ ສະຕິປັນຍາເຂົ້າໃນວຽກງານກໍຄືພາລະກິດປົດປ່ອຍຊາດ, ທ້ອນໂຮມປະເທດຊາດເປັນເອກະພາບ ແລະ ພາລະກິດປ່ຽນແປງໃໝ່ຂອງພັກຄອມມູນິດຫວຽດນາມ ໂດຍສະເພາະ ວຽກງານປັບປຸງກໍ່ສ້າງພັກໃຫ້ເຂັ້ມແຂງ, ປອດໃສ ກໍຄືວຽກງານປ້ອງກັນ ຕ້ານການສໍ້ລາດບັງຫລວງ ແລະ ຕ້ານປະກົດການຫຍໍ້ທໍ້ຕ່າງໆ ອັນເຮັດໃຫ້ປະເທດ ຫວຽດນາມ ມີການພັດທະນາຢ່າງບໍ່ຢຸດຢັ້ງ, ພ້ອມດຽວກັນ ສະຫາຍ ດວງຕາ ໄຊວຸດ ຍັງໄດ້ລົງນາມໃສ່ປຶ້ມບັນທຶກປະຫວັດສາດຂອງກົງສູນໃຫຍ່ ສສ ຫວຽດນາມ ເຊິ່ງເນື້ອໃນໄດ້ຂຽນວ່າ: ຄະນະພັກ, ສະພາປະຊາຊົນແຂວງ, ອົງການຈັດຕັ້ງທຸກຂັ້ນ ແລະ ປະຊາຊົນແຂວງໄຊຍະບູລີ ຂໍຝາກຄວາມເສົ້າສະຫລົດໃຈອັນສຸດຊຶ້ງ, ອາໄລອາວອນ ແລະ ຂໍແບ່ງປັນຄວາມທຸກໂສກມາຍັງກົງສູນໃຫຍ່ ສສ ຫວຽດນາມ ປະຈໍາພາກເໜືອຂອງລາວ ທີ່ແຂວງຫລວງພະບາງ ເຊິ່ງຕາງໜ້າໃຫ້ພັກ-ລັດ ແລະ ປະຊາຊົນ ຫວຽດນາມ ທີ່ມາປະຕິບັດໜ້າທີ່ປະຈໍາຢູ່ພາກເໜືອຂອງ ສປປ ລາວ ແລະ ຜ່ານບັນດາສະຫາຍໃນກົງສູນໃຫຍ່ໄປຍັງປະຊາຊົນ ຫວຽດນາມອ້າຍນ້ອງ ໂດຍສະເພາະແມ່ນຄອບຄົວ, ຍາດພີ່ນ້ອງ ແລະ ເພື່ອນມິດຂອງ ສະຫາຍ ຫງວຽນ ຝູ໋ຈ້ອງ ມາໃນໂອກາດນີ້ດ້ວຍ, ພວກເຮົາຊາວແຂວງໄຊຍະບູລີ ຈະສືບຕໍ່ເສີມສ້າງສາຍພົວພັນລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງທະນົງແກ່ນ, ຈະສືບຕໍ່ເສີມຂະຫຍາຍຄຸນງາມຄວາມດີທີ່ສະຫາຍໄດ້ສ້າງໄວ້ໃຫ້ຍືນຍົງຕະຫລອດໄປ ແລະ ຂໍໃຫ້ດວງວິນຍານຂອງສະຫາຍ ຫງວຽນ ຝູ໋ຈ້ອງ ຈົ່ງໄປສູ່ສຸຄະຕິເທີ້ນ.
ຂ່າວ-ພາບ: ອຸ່ນເຮືອນ ໂພທິລັກ
