ການນໍາແຂວງ ຊຽງຂວາງວາງກະຕ່າດອກໄມ້ ວັນສ້າງຕັ້ງກຳລັງ ປກສ ແຫ່ງຊາດ ຄົບຮອບ 60 ປີ.
ເນື່ອງໃນໂອກາດ ວັນສ້າງຕັ້ງກຳລັງ ປ້ອງ ກັນຄວາມສະຫງົບສຸກ (ປກສ) ແຫ່ງຊາດ ຄົບຮອບ 60 ປີ (5 ເມສາ 1961 – 5 ເມ ສາ 2021) ທີ່ໝູນວຽນມາບັນຈົບຄົບ ຮອບອີກວາລະໜຶ່ງ ມາໃນຕອນເຊົ້າຂອງວັນທີ 2 ເມສາ 20121 ນີ້ ການນໍາແຂວງຊຽງຂວາງ, ນໍາໂດຍ ທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງ ໄດ້ເຂົ້າວາງກະຕ່າດອກໄມ້ ຢູ່ອະນຸສອນສະຖານ ໜ້າຮູບປັ້ນຂອງ ທ່ານ ຕູ້ຢ່າ ໄຊຈູ, ອະດີດຜູ້ນໍາທີ່ແສນເຄົາລົບຮັກ. ການວາງກະຕ່າດອກໄມ້ຄັ້ງນີ້ ກໍເພື່ອສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ ແລະຈາລຶກຄຸນງາມຄວາມດີທີ່ເລີດລໍ້າ ຕໍ່ຄວາມເສຍສະຫຼະຕະຫຼອດຊີວິດຂອງທ່ານ ທີ່ທ່ານໄດ້ສຸມສະຕິປັນຍາ ເຂົ້າໃນການນໍາພາຂະບວນການຕໍ່ສູ້ ຕ້ານການຮຸກຮານຂອງພວກລ່າເມືອງຂຶ້ນແບບເກົ່າ ແລະໃໝ່, ໂດຍມີພັກປະຊາຊົນປະຕິວັດລາວເປັນແກນນໍາ, ຈົນສາມາດຍາດໄດ້ໄຊຊະນະ ນໍາເອົາຄວາມຢູ່ເຢັນເປັນສຸກມາສູ່ປະຊາຊົນລາວບັນດາເຜົ່າ.
ຈາກນັ້ນ, ການນໍາຂອງແຂວງກໍໄດ້ເຂົ້າວາງພວງມາລາທີ່ອະນຸສາວະລີນັກຮົບນິລະນາມ ເພື່ອສະແດງເຖິງຄວາມເຄົາ ລົບຮັກ, ຄວາມກະຕັນຍູຮູ້ບຸນຄຸນ ເຖິງຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະບໍ່ຍອມຈຳນົນຂອງບັນພະບູລຸດ, ກໍຄືນັກຮົບປະຕິວັດຂອງແຂວງ ທີ່ເສຍສະຫຼະຊີວິດເລືອດເນື້ອ ເພື່ອດິນແດນອັນຄົບຖ້ວນຂອງແຂວງ ແລະປະ ຊາຊົນຢ່າງອົງອາດກ້າຫານ, ພາຍໃຕ້ການຊີ້ນໍາ – ນຳພາອັນສະຫຼາດຊ່ອງໃສຂອງພັກປະຊາຊົນປະຕິວັດລາວ ຈົນສາມາດຍາດໄດ້ໄຊຊະນະ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຊຶ່ງຄຸນງາມຄວາມດີອັນໃຫຍ່ຫຼວງນັ້ນ ໄດ້ຖືກຈາລຶກໄວ້ໃນຊີວິດຈິດໃຈຂອງປະຊາຊົນຊາວ ແຂວງຊຽງຂວາງຫຼອດໄປ.
ພາບ-ຂ່າວ: ເບ່ຕ່າ ໄຊປັນຍາ (ແນວລາວສ້າງຊາດແຂວງຊຽງຂວາງ)
Loading...