ເພື່ອເປັນການຕອບໂຕ້ໄພໜາວທີ່ຈະມາເຖິງໃນລະດູນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອຍດ້ວຍພັນລະຍາ ແລະ ການນໍາຂອງແຂວງ ໄດ້ນໍາເອົາເຄື່ອງນຸ່ງຮົ່ມກັນໜາວເປັນຕົ້ນແມ່ນ: ສົ້ງ, ເສື້ອ ຜູ້ໃຫຍ່ ແລະ ເດັກນ້ອຍ ຈໍານວນ 1,500 ຜືນ ມາມອບຊ່ວຍເຫຼືອ ເພື່ອບັນເທົາທຸກໃຫ້ປະຊາຊົນກຸ່ມບ້ານ ກໍ່-ສະປີ ເມືອງ ໄຊສະຖານ ແຂວງ ໄຊຍະບູລີ ໃຫ້ການຕ້ອນຮັບໂດຍ ທ່ານ ກອງສີ ວົງສີ ເຈົ້າເມືອງ ໄຊສະຖານ ພ້ອມດ້ວຍການນໍາຂອງເມືອງ, ພິທີມອບເຄື່ອງຊ່ວຍເຫຼືອໄດ້ຈັດຂຶ້ນໃນຕອນບ່າຍຂອງວັນທີ 22 ຕຸລາ ປີນີ້, ທີ່ຫ້ອງການກໍ່ສ້າງຮາກຖານປະຈໍາກຸ່ມບ້ານ ກໍ່-ສະປີ, ເຄື່ອງຊ່ວຍເຫຼືອດັ່ງກ່າວໂດຍແມ່ນ ບໍລິສັດ ຢາສູບລາວທຽນຫຼົງຈໍາກັດ ໃຫ້ການຊ່ວຍເຫຼືອ ລວມທັງໝົດ 3,000 ຜືນ, ລວມມູນຄ່າ 50 ລ້ານກວ່າກີບ, ໃນຈໍານວນ 3,000 ຜືນການນໍາແຂວງ ແມ່ນໄດ້ແບ່ງເຄິ່ງໜຶ່ງມອບໃຫ້ ປະຊາຊົນກຸ່ມບ້ານກໍ່-ສະປີ ເມືອງ ໄຊສະຖານ ແລະ ອີກເຄິ່ງໜຶ່ງແມ່ນຈະໄດ້ເອົາໄປມອບໃຫ້ປະຊາຊົນທີ່ທຸກຍາກ 4 ເມືອງເໜືອຂອງແຂວງ ໄຊຍະບູລີ, ໂອກາດດັ່ງກ່າວ ທ່ານເຈົ້າແຂວງກໍ່ໄດ້ເນັ້ນໜັກໃຫ້ອໍານາດການປົກຄອງທຸກຂັ້ນຂອງເມືອງຈົ່ງສືບຕໍ່ຊີ້ນໍາ-ນໍາພາປະຊາຊົນເຂດດັ່ງກ່າວປູກພືດເປັນສິນຄ້າເຊັ່ນ: ປູກແຂມ, ໝາກເດືອຍ ແລະ ລ້ຽງສັດຕິດພັນກັບການປູກຫຍ້າ, ຈາກນັ້ນ ທ່ານ ພົງສະຫວັນ ສິດທະວົງ ພ້ອມພັນລະຍາ ແລະ ການນໍາຂອງແຂວງກໍ່ໄດ້ແຈກຢາຍເຄື່ອງນຸ່ງ-ຮົ່ມໃຫ້ກັບປະຊາຊົນ ແລະ ນ້ອງນັກຮຽນ, ພ້ອມດຽວກັນກໍ່ໄດ້ຢ້ຽມຢາມ ແລະ ມອບເຄື່ອງອຸປະໂພກ-ບໍລິໂພກ ລວມມູນຄ່າ 5 ລ້ານກວ່າກີບ ໃຫ້ກອງຮ້ອຍຊາຍແດນ 154 ຕື່ມອີກ.

ຂ່າວ-ພາບ: ອຸ່ນເຮືອນ ໂພທິລັກ

Loading...