ການນໍາໃຊ້ເຕັກໂນໂລຊີທັນສະໄໝ ເຂົ້າໃນການສຶກສາອົບຮົມການເມືອງ-ແນວຄິດ ເປັນບັນຫາທີ່ສໍາຄັນ ແລະ ມີຄວາມຈໍາເປັນອັນຮີບດ່ວນຂອງພັກ ແລະ ລັດ

ການນໍາໃຊ້ເຕັກໂນໂລຊີທັນສະໄໝ ເຂົ້າໃນການສຶກສາອົບຮົມການເມືອງ-ແນວຄິດ ເປັນບັນຫາທີ່ສໍາຄັນ ແລະ ມີຄວາມຈໍາເປັນອັນຮີບດ່ວນຂອງພັກ ແລະ ລັດ ເນື່ອງຈາກປັດຈຸບັນນີ້ ໂລກກໍາລັງກ້າວເຂົ້າສູ່ຍຸກສະໄໝແຫ່ງການປະຕິວັດອຸດສາຫະກໍາ ຄັ້ງທີ 4 ຫຼື ຍຸກ 4.0 ໂດຍນໍາໃຊ້ເຕັກໂນໂລຊີທັນສະ ໄໝ ເຂົ້າໃນທຸກຂົງເຂດວຽກງານຂອງສັງຄົມ.

ໃນໂອກາດປະກອບຄໍາເຫັນຕໍ່ກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ຈັດຂື້ນລະຫວ່າງວັນທີ 17 ຫາ 18 ພະຈິກນີ້, ທີ່ນະຄອນຫລວງວຽງຈັນ ສະຫາຍ ບໍ່ວຽງຄຳ ວົງດາລາ, ກໍາມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ຊີ້ໃຫ້ເຫັນວ່າ: ໄລຍະຜ່ານການສຶກສາອົບຮົມແນວຄິດການເມືອງມີຫຼາຍຮູບແບບ ແລະ ຫຼາຍວິທີການ ເປັນຕົ້ນການສຶກສາຮ່ຳຮຽນຢູ່ໃນໂຮງຮຽນ, ມະຫາວິທະຍາໄລ ຫຼື ສະຖາບັນການສຶກສາຕ່າງໆ, ການຝຶກອົບຮົມໄລຍະສັ້ນ ແລະ ໄລຍະຍາວ, ການຈັດສໍາມະນາ, ປະຖະກະຖາ ແລະ ໂຄສະນາເຜີຍແຜ່ຜ່ານສື່ສິ່ງພິມ, ໜັງສືພິມ ຫຼື ຜ່ານສື່ສັງ ຄົມອອນລາຍຕ່າງໆທັງໝົດນັ້ນ ລ້ວນແຕ່ຕ້ອງນໍຳໃຊ້ເຕັກໂນໂລຊີການຈັດພິມຈໍາໜ່າຍ, ເຕັກໂນໂລຊີການສື່ສານທາງວິທະຍຸ, ໂທລະພາບຕ່າງໆທີ່ເປັນມູນເຊື້ອມາໃນຍຸກ 3.0 ແຕ່ປັດຈຸບັນນີ້ ໃນຍຸກ 4.0 ເກີດມີເຕັກໂນໂລຊີການສື່ສານແບບໃໝ່ທີ່ວ່ອງໄວ, ກວ້າງຂວາງ ແລະ ຄຸ້ມຄອງໄດ້ຍາກ ໂດຍສະເພາະສື່ສັງຄົມອອນລາຍ ພວມມີທ່າອ່ຽງທີ່ໄດ້ຮັບຄວາມນິຍົມເພີ່ມຂຶ້ນຫຼາຍໃນບັນດາປະເທດຕ່າງໆໃນພາກພື້ນ ແລະ ທົ່ວໂລກ. ຕາມສະຖິຕິປີ 2022 ສື່ສັງຄົມອອນລາຍທີ່ຖືກນໍາໃຊ້ຫລາຍກວ່າໝູ່ແມ່ນ Facebook, ເຊິ່ງມີປະມານ 2.936 ລ້ານບັນຊີ, ອັນດັບຮອງລົງມາ ແມ່ນ YouTube 2.476 ລ້ານບັນຊີ, Whats App 2.000 ລ້ານບັນຊີ, Instagram 1.440 ລ້ານບັນຊີ; Wechat 1.288 ລ້ານບັນຊີ ແລະ TikTok 1.023 ລ້ານບັນຊີ. ສໍາລັບຢູ່ ສປປ ລາວ ໄດ້ນໍາໃຊ້ສື່ສັງຄົມອອນລາຍຫຼາຍປະເພດ, ແຕ່ທີ່ໃຊ້ຫຼາຍກວ່າໝູ່ ກໍ່ແມ່ນ Facebook ແລະ WhatsApp. ຈາກສະຖິຕິປີ 2022 ການນໍາໃຊ້ ສື່ສັງຄົມອອນລາຍ ໃນ ສປປ ລາວ ແມ່ນມີເຖິງ 3,8 ລ້ານບັນຊີ ຫຼື 51,1% ຂອງພົນລະເມືອງລາວ, ເຊິ່ງເພິ່ມຂຶ້ນຈາກປີຜ່ານມາ 5,6%. ໂດຍສະເພາະ Facebook ແມ່ນມີຜູ້ໃຊ້ເຖິງ 3,5 ລ້ານບັນຊີ ຫຼື 47,1% ຂອງປະຊາກອນລາວທັງໝົດ, ໃນນັ້ນ 99.5% ແມ່ນນຳໃຊ້ຜ່ານໂທລະສັບມືຖື Smart Phone.

ສະນັ້ນ ເພື່ອນໍາໃຊ້ເຕັກໂນໂລຊີ ທີ່ທັນສະໄໝເຂົ້າໃນການສຶກສາອົບຮົມການເມືອງ-ແນວຄິດຂອງປະເທດເຮົາ ໂດຍຕິດພັນກັບການແກ້ໄຂຜົນກະທົບຈາກສື່ສັງຄົມອອນລາຍໃນປັດຈຸບັນນີ້ ແລະໃນອະນາຄົດ ເຫັນວ່າຈະຕ້ອງເອົາໃຈໃສ່ນໍາໃຊ້ເຕັກໂນໂລຊີສື່ສານທັນສະໄໝ ຕ່າງໆ ເຊັ່ນ: ວິທະຍຸ, ໂທລະພາບ, ສື່ສິ່ງພິມ, ວາລະສານ, ໜັງສືພິມເອເລັກໂຕຼນິກ, ອິນເຕີເນັດ ແລະ ສັງຄົມອອນລາຍ ໂຄສະນາເຜີຍແຜ່ແນວທາງການເມືອງ ແລະ ນະໂຍບາຍຂອງພັກ-ລັດ ໃຫ້ກວ້າງຂວາງໃນທົ່ວສັງຄົມ ດ້ວຍຫຼາຍຮູບ, ຫຼາຍສີ, ຫຼາຍວິທີການເພື່ອເຂົ້າເຖິງທຸກໆຄົນ, ໃນທົ່ວສັງຄົມ ຢ່າງວ່ອງໄວທັນການ ເພື່ອໃຫ້ສັງຄົມໄດ້ຮັບຮູ້ຂໍ້ມູນຄວາມຈິງ ແລະ ຕອບໂຕ້ຂໍ້ມູນປອມໂຄສະນາຊວນເຊື່ອຂອງພວກບໍ່ຫວັງດີ. ສ້າງຫຼັກໝັ້ນການເມືອງອັນໜັກແໜ້ນໃຫ້ແກ່ສະມາຊິກພັກ, ພະນັກງານ, ກໍາລັງປະກອບອາວຸດ, ປກສ-ປກຊ, ຊາວໜຸ່ມ ໄວລຸ້ນ ແລະ ປະຊາຊົນໃນທົ່ວສັງຄົມເພື່ອເປັນ “ ພູມຄຸ້ມກັນ ” ທີ່ເຂັ້ມແຂງຕ້ານກັບສົງຄາມຈິດຕະສາດ ຫັນປ່ຽນໂດຍສັນຕິ ຂອງພວກບໍ່ຫວັງດີ, ສ້າງ, ປັບປຸງ ແລະ ເຜີຍແຜ່ກົດໝາຍ, ດໍາລັດ ກ່ຽວຂ້ອງກັບການຄຸ້ມຄອງເຕັກໂນໂລຊີການສື່ສານ ຂໍ້ມູນຂ່າວສານ, ເຕັກໂນໂລຊີດິຈິຕ໋ອນ, ການຄຸ້ມຄອງ, ການບໍລິຫານ, ການບໍລິການລັດຖະບານດິຈິຕ໋ອນ, ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ, ວຽກງານຄວາມປອດໄພທາງໄຊເບີ ແລະ ການຄຸ້ມຄອງ, ຕິດຕາມກວດກາ ແລະ ຕອບຕ້ານຫາງສຽງທາງສື່ສັງຄົມອອນລາຍ; ຄົ້ນຄວ້າສ້າງຍຸດທະສາດການຄຸ້ມຄອງ ແລະ ພັດທະນາອິນເຕີເນັດ; ສ້າງນິຕິກໍາໃນການຄຸ້ມຄອງ, ພັດທະນາ ແລະ ນໍາໃຊ້ໂຄງລ່າງພື້ນຖານໂທລະຄົມມະນາຄົມ ແລະ ເຕັກໂນໂລຊີດິຈິຕ໋ອນຮ່ວມກັນ ເພື່ອຮັບປະກັນນະໂຍບາຍປະຢັດ ຂອງລັດຖະບານ ຫຼີກເວັ້ນການລົງທຶນຊໍ້າຊ້ອນ; ສ້າງນິຕິກໍາໃນການຄຸ້ມຄ້ອງ ແລະ ສະໜອງຈຸດເຊື່ອມຕໍ່ ຮັບປະກັບວຽກງານ ປກຊ-ປກສ; ສືບຕໍ່ສ້າງນິຕິກໍາຄຸ້ມຄອງການນໍາໃຊ້ລະບົບຕິດຕາມການສື່ສານຜ່ານໂທລະສັບ ວຽກງານຮ່ວມ ປກຊ-ປກສ; ສ້າງ, ປັບປຸງ, ຜັນຂະຫຍາຍນິຕິກໍາທີ່ຍັງບໍ່ພຽງພໍໃຫ້ແທດເໝາະກັບການປ່ຽນແປງໃນແຕ່ລະໄລຍະ; ເລັ່ງສ້າງບັນດານິຕິກໍາທີ່ກ່ຽວຂ້ອງ ເພື່ອຄຸ້ມຄອງ ແລະ ການພັດທະນາວຽກງານການຫັນເປັນດິຈິຕ໋ອນຂອງທຸກຂະແໜງ ການ, ເອົາໃຈໃສ່ເປີດກວ້າງການຮ່ວມມື ກັບຕ່າງປະເທດ ແລະ ສາມກົນ ຕາມແນວທາງການຕ່າງປະເທດຂອງພັກ-ລັດເຮົາ, ເປັນຕົ້ນຕົ້ນແມ່ນຮ່ວມມືກັບບັນດາປະເທດເພື່ອນມິດຍຸດທະສາດເຊັ່ນ: ສສ ຫວຽດນາມ, ສປ ຈີນ ເພື່ອຖອດຖອນບົດຮຽນການຄຸ້ມຄອງສື່ສັງຄົມອອນລາຍ ແລະ ດູດດຶງການຊ່ວຍເຫຼືອທາງດ້ານເຕັກໂນໂລຊີຊອບແວ, ຮາດແວ ແລະ ພັດທະນາຊັບພະຍາກອນມະນຸດ. ພ້ອມກັນນັ້ນກໍ່ຮ່ວມກັບບັນດາປະເທດໃນກອບອາຊຽນຊຶ່ງມີ ໂຄງການຮັກສາຄວາມປອດໄພດ້ານໄຊເບີອາຊຽນ ແລະ ຮ່ວມມືກັບບັນດາປະເທດທີ່ມີເຕັກໂນໂລຊີທັນສະໄໝ ເປັນເປັນມິດທີ່ດີກັບ ສປປ ລາວ, ເອົາໃຈໃສ່ປະສານສົມທົບກັບບັນດາບໍລິສັດ ສື່ສັງຄົມອອນລາຍຂ້າມທະວີບຕ່າງໆເຊັ່ນ: ເຟສບຸກ, ຢູທູບ ແລະ ອື່ນໆ ເພື່ອໃຫ້ຄວາມຮ່ວມມືໃນການສະກັດກັ້ນ ອາດສະຍາກໍາໄຊເບີ ແລະ ການເຄື່ອນໄຫວສື່ສັງຄົມອອນລາຍທີ່ລະເມີດກົດໝາຍ ແລະ ປັ່ນປ່ວນທຳລາຍຄວາມໝັ້ນຄົງຂອງລາວ.