ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ຮ່ວມກັບ ສະຖານເອກອັກຄະລັດຖະທູດຈີນ ປະຈໍາ ສປປ ລາວ ແລະ ສູນວັດທະນະທໍາຈີນ ປະຈໍາ ສປປ ລາວ ໄດ້ຈັດການແຂ່ງຂັນປະກວດອອກແບບໂລໂກ້ (Logo) ປີມິດຕະພາບລາວ-ຈີນ ປີ 2021 ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 60 ປີ (25 ເມສາ 1961- 25 ເມສາ 2021).
ການແຂ່ງຂັນປະກວດອອກແບບໂລໂກ້ ປີມິດຕະພາບລາວ-ຈີນ 2021 ໄດ້ເປີດໃຫ້ມວນຊົນລາວ ແລະ ຈີນ ລວມທັງຊາວຕ່າງຊາດທີ່ສົນໃຈ ສົ່ງຜົນງານການອອກແບບ ຂອງຕົນ ເຂົ້າມາແຂ່ງຂັນ ເລີ່ມແຕ່ວັນທີ 11 ກຸມພາ ຈົນເຖິງ 15 ມີນາ 2021 ຊຶ່ງໃນນັ້ນ ໄດ້ມີຜູ້ທີ່ສົນໃຈສົ່ງຜົນງານເຂົ້າແຂ່ງຂັນ ຈໍານວນ 284 ຜົນງານ ປະກອບມີ 46 ຜົນງານຈາກ ສປປ ລາວ, 235 ຜົນງານ ຈາກ ສປ ຈີນ, 1 ຜົນງານຈາກ ສ. ເກົາຫຼີ, 1 ຜົນງານຈາກປະເທດໄທ ແລະ 1 ຜົນງານຈາກປະເທດນໍເວ.
ຜ່ານການຄັດເລືອກທັງໝົດຜົນງານການອອກແບບໂລໂກ້ປີມິດຕະພາບລາວ-ຈີນ ປີ 2021 ໂດຍຄະນະກໍາມະການຮ່ວມ ຂອງ ສປປ ລາວ ແລະ ສປ ຈີນ ໄດ້ເຫັນດີເປັນເອກະພາບກັນ ຄັດເລືອກເອົາທັງໝົດ 11 ຜົນງານ ແລະໃຫ້ລາງວັນ ຄື: ທ້າວ ວິລະສັກ ສຸດທິສານ ເປັນໜຶ່ງໃນຜູ້ເຂົ້າຮ່ວມຈາກ ສປປ ລາວ ໄດ້ຮັບລາງວັນຊະນະເລີດ ອັນດັບ 1, ສ່ວນອັນດັບ 2 ມີສອງລາງວັນ ໄດ້ແກ່ນາງ ຈ່າງເຊິ່ນເຈັຍ ແລະ ທ້າວ ຈ່າງຈື້ກົວະ ຈາກ ສປ ຈີນ, ນອກຈາກນີ້ ຍັງມີອີກ 8 ລາງວັນຄື: ລາງວັນອັນດັບ 3 ມີ 3 ລາງວັນ ແລະ ລາງວັນຊົມເຊີຍ 5 ລາງວັນ.
ໂລໂກ້ທີ່ໄດ້ຮັບລາງວັນຊະນະເລີດຄັ້ງນີ້ ແມ່ນໄດ້ຖືກຮັບຮອງ ແລະ ປະກາດນໍາໃຊ້ຢ່າງເປັນທາງການໃນກິດຈະກໍາຕ່າງໆ ເພື່ອປະກອບສ່ວນສະເຫຼີມສະຫຼອງ 60 ປີ ແຫ່ງການສ້າງຕັ້ງສາຍພົວພັນການທູດ ແລະ ປີມິດຕະ ພາບລາວ-ຈີນ 2021 ຢູ່ທີ່ ສປປ ລາວ ແລະ ສປ ຈີນ ຈົນເຖິງທ້າຍປີ 2021.
ສໍາລັບພິທີການມອບ-ຮັບລາງວັນໃຫ້ແກ່ຜູ້ຖືກຄັດເລືອກ ຈໍານວນ 11 ຜົນງານນັ້ນ ຈະຈັດຂຶ້ນຢ່າງເປັນທາງການ ພາຍຫຼັງທີ່ມີແຈ້ງການມາດຕະການຜ່ອນຜັນການແຜ່ລະບາດ ຂອງພະຍາດໂຄວິດ 19.
Loading...