ໂດຍປະຕິບັດຕາມຄຳສັ່ງແນະນຳເລກທີ 04 / ຄປລຊ, ລົງວັນທີ່ 11 ພະຈິກ 2020 ກ່ຽວກັບການປ່ອນບັດເລືອກຕັ້ງສາມຊິກສະພາແຫ່ງຊາດ ຊຸດທີ IX ແລະສະມາຊິກສະພາປະຊາຊົນແຂວງ ຊຸດທີ II ມາໃນຕອນເຊົ້າຂອງວັນທີ່ 13 ກຸມພາ 2021 ນີ້ ກອງບັນຊາການທະຫານແຂວງອຸດົມໄຊ ໄດ້ຈັດພິທີ ປ່ອນບັດບັດເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງຊຸດທີ II, ໂດຍການເປັນກຽດເຂົ້າຮ່ວມຂອງ ສະຫາຍ ພັນເອກ ຄຳຢີນ ແສງສຸລີ ກຳມະການພັກແຂວງ ເລຂາພັກ ຫົວໜ້າການເມືອງກອງບັນຊາການທະຫານແຂວງອຸດົມໄຊ, ມີສະຫາຍ ບຸນລອດ ອ່ອນພະຈັນ ປະທານສະພາປະຊາຊົນແຂວງອຸດົມໄຊ ຄະນະພັກ-ຄະນະກອງບັນຊາການ, ຄະນະຫ້ອງ, ຄະນະພັກ-ຄະນະບັນຊາກົມກອງ, ຄະນະຮັບຜິດຊອບ, ພະນັກງານ-ນັກຮົບທີ່ມີສິດປ່ອນບັດທົ່ວທະຫານແຂວງເຂົ້າຮ່ວມຢ່າງຫຼວງຫຼາຍ.

ການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງຊຸດທີ II ຢູ່ກອງບັນຊາການທະຫານແຂວງອຸດົມໄຊ ໃນຄັ້ງນີ້ດໍາເນີນໄປດ້ວຍບັນຍາກາດເບີກບານມ່ວນຊື່ນ ແລະຟົດຟື້ນດີ, ພະນັກງານ-ນັກຮົບຜູ້ທີ່ມີສິດປ່ອນບັດເລືອກຕັ້ງ ຕ່າງກໍ່ທະຍ່ອຍກັນໄປໃຊ້ສິດເລືອກຕັ້ງເອົາຜູ້ແທນໃນຈຸດປ່ອນບັດຂອງຕົນດ້ວຍຄວາມຍິ້ມແຍ້ມແຈ່ມໃສ, ຮັບປະກັນໄດ້ຄວາມເປັນລະບຽບຮຽບຮ້ອຍ ແລະມີຄວາມສະຫງົບປອດໄພເປັນຢ່າງດີ, ສຳຫຼັບຂອບເຂດເລືອກຕັ້ງຢູ່ກອງບັນຊາການທະຫານແຂວງອຸດົມໄຊ ມີໜ່ວຍປ່ອນບັດທັງໝົດ 24 ໜ່ວຍ, ໜ່ວຍປ່ອນບັດຄົງທີ 6 ໜ່ວຍ, ໜ່ວຍປ່ອນບັດເຄື່ອນທີ່ 18 ໜ່ວຍ, ມີຜູ້ໃຊ້ສິດລົງຄະແນນສຽງທັງໝົດ 1.774 ສະຫາຍ, ຍິງ 175 ສະຫາຍ ແລະການລົງຄະແນນສຽງຄັ້ງນີ້ແມ່ນຮັບປະກັນ 100%.

ຂ່າວ-ພາບ: ທະນູວັນ

Loading...