ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການຝຶກຊ້ອມເທິງແຜນທີ່ – ແຜນຮ່າງທາງໄກ ໃນຂອບກອງປະຊຸມລັດຖະມົນຕີ ປ້ອງກັນປະເທດອາຊຽນ ກ່ຽວກັບການປ້ອງກັນ ແລະ ສະກັດກັ້ນການລະບາດຂອງພະຍາດ ໂຄວິດ-19

ໃນວັນທີ 27 ພຶດສະພາ 2020, ທ່ານ ພັ.ອ ດຣ ສຸລິພັນ ເພັດຈັນທະລາ, ຫົວ​ໜ້າອໍານວຍການໂຮງໝໍສູນກາງ 103 ພ້ອມດ້ວຍຄະ​ນະໄດ້ເຂົ້າຮ່ວມການຝຶກຊ້ອມເທິງແຜນທີ່ – ແຜນຮ່າງທາງໄກກ່ຽວກັບການປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ທີ່​ກົມ​ພົວ​ພັນ​ຕ່າງ​ປະ​ເທດ, ຫ້ອງວ່າ​ການ​ກະ​ຊວງ​ປ້ອງ​ກັນ​ປະ​ເທດ, ເຊິ່ງການຝຶກຊ້ອມໃນ​ຄັ້ງ​ນີ້ ແມ່ນ​ໄດ້​ດຳ​ເນີນພາຍໃຕ້ການເປັນປະທານຮ່ວມ ​ຂອງກົມເສນາຮັກ, ກະຊວງປ້ອງກັນປະເທດ ສສ ຫວຽດນາມ ແລະ ສູນແພດທະຫານອາຊຽນ ເພື່ອກຽມຄວາມພ້ອມ ແລະ ສົ່ງເສີມການຮ່ວມມືລະດັບພາກພື້ນໃນການຮັບມືກັບພະຍາດລະບາດໂຄວິດ-19 ໂດຍຜ່ານການຮ່ວມມືໃນຂອບກອງປະຊຸມລັດຖະມົນຕີປ້ອງກັນປະເທດອາຊຽນ (ADMM).  ໃນ​ການ​​ຝຶກ​ຊ້ອມ​​ຄັ້ງ​ນີ້ ມີໜ່ວຍງານແພດທະຫານຈາກບັນ​ດາ​ປະເທດສະມາຊິກອາຊຽນ, ອາຊຽນ-ບວກ, ຜູ້ແທນຈາກກະຊວງສາທາລະສຸກ, ອົງການອະນາໄມໂລກ, ສູນປະສານງານໃຫ້ການຊ່ວຍເຫຼືອມະນຸດສະທໍາ ແລະ ຄຸ້ມຄອງໄພພິບັດອາຊຽນ (AHA Center) ແລະ ກອງເລຂາອາຊຽນ ເຂົ້າຮ່ວມການຝຶກຊ້ອມ ແລະ ທັງເຂົ້າຮ່ວມສັງເກດການ. ພິເສດທາງກະຊວງສາທາລະນະສຸກ ເຊິ່ງນໍາໂດຍ ທ່ານ ດຣ. ລັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່ ແລະ ທ່ານ ປອ. ດຣ. ພອນປະດິດ ສັງໄຊຍະລາດ, ຫົວໜ້າສູນວິເຄາະ ແລະ ລະບາດວິທະຍາແຫ່ງຊາດ ພ້ອມດ້ວຍພະນັກງານກອງເລຂາໄພພິບັດ, ກະຊວງສາທາລະນະສຸກ ກໍ່ໄດ້ເຂົ້າຮ່ວມໃນການຝຶກຊ້ອມກັບໜ່ວຍງານແພດທະຫານຂອງກອງທັບໃນຄັ້ງນີ້ດ້ວຍ.

ການຝຶກຊ້ອມໃນຄັ້ງນີ້ ໄດ້ຈໍາລອງສະຖານະການ ກ່ຽວ​ກັບ​ການ​ແຜ່​ລະ​ບາດ​ຂອງ​ພະ​ຍາດໂຄວິດ-19 ແລະ ໃຫ້ແຕ່ລະປະເທດປະເມີນວິເຄາະຫາແນວທາງຮັບມື ແລະ ແຜນການປະຕິບັດຕໍ່ກັບສະຖານະການທີ່ເກີດຂຶ້ນ, ໃນຂະນະດຽວກັນ ໃນການຝຶກຊ້ອມ ຍັງມີການແລກປ່ຽນຂໍ້ມູນ ຫຼື ແນວທາງການປະຕິບັດຂອງແຕ່ລະປະເທດໃນສະຖານະການວິກິດໂຄວິດ-19 ທີ່ຜ່ານມາ. ໄດ້ຮັບຟັງການສະຫຼຸບລາຍງານຈາກຜູ້ບໍລິຫານຄວບຄຸມການຝຶກ ເຫັນວ່າໂດຍລວມແຕ່ລະປະເທດໄດ້ເອົາໃຈໃສ່ຕໍ່ມາດຕະການການສະກັດກັ້ນ ແລະ ຮັບມືກັບພະຍາດລະບາດໂຄວິດ-19 ໃນການເຝົ້າລະວັງຕິດຕາມສະຖານະການ, ອັບເດດຂໍ້ມູນຂ່າວສານຕໍ່ກັບມາດຕະການວິທີປ້ອງກັນ ແລະ ການຮັກສາໄລຍະຫ່າງທາງສັງຄົມໃຫ້ແກ່ປະຊາຊົນ.

ຫຼັງຈາກນັ້ນ, ບັນດາປະເທດສະມາຊິກອາຊຽນ ແລະ ຜູ້ເຂົ້າຮ່ວມຝຶກຈາກ ຝ່າຍ​ພົນ​ລະ​ເຮືອນ ຍັງໄດ້ແລກປ່ຽນທັດສະນະກ່ຽວ​ກັບ ປັດໃຈສໍາຄັນທີ່ໄດ້ຮັບຜົນສໍາເລັດ ກໍ​ຄື ບົດຮຽນທີ່ດີທີ່ສຸດໃນການຮັບມືກັບພະຍາດໂຄວິດ-19. ຕໍ່​ກັບ​ບັນ​ຫາ​ດັ່ງ​ກ່າວ, ການຝຶກຊ້ອມ ສັງ​ເກດ​ເຫັນ​ວ່າ ໃນແຕ່ລະປະເທດໄດ້ຈັດຕັ້ງຄະນະສະເພາະກິດແຫ່ງຊາດຂອງຕົນ ເພື່ອຕໍ່ສູ້ກັບພະຍາດລະບາດໂຄວິດ-19 ພາຍໃຕ້ການຊີ້ນໍາຂອງລັດຖະບານ ໂດຍມີໜ່ວຍງານອົງການທີ່ກ່ຽວຂ້ອງທັງພາກລັດ ແລະ ເອກະຊົນ ເຂົ້າມາມີສ່ວນຮ່ວມຕໍ່ກັບແຜນປະຕິບັດການຮັບມືກັບພະຍາດນີ້, ສິ່ງສໍາຄັນແມ່ນ​ການສ້າງຄວາມເຂັ້ມແຂງໃນການສື່ສານໃນເວທີຕ່າງໆໂດຍຜ່ານກົນໄກການປະສານງານທີ່ກ່ຽວຂ້ອງ (ແຕ່ສູນກາງຈົນເຖິງທ້ອງຖິ່ນ), ການຕິດຕາມ ແລະ ເຝົ້າລະວັງສະຖານະການຢ່າງໃກ້ຊິດ, ເສີມສ້າງຄວາມເຂັ້ມແຂງທາງດ້ານປະສິດທິພາບໃນຫ້ອງທົດລອງ, ການບໍລິການທາງດ້ານ ການແພດ ແລະ ການນໍາໃຊ້ເຕັກໂນໂລຊີຕິດຕາມກຸ່ມສ່ຽງ.

ນອກ​ຈາກນີ້, ທາງໜ່ວຍງານແພດທະຫານ ຈາກບັນດາປະເທດສະມາຊິກອາຊຽນ ກໍ່ຍັງໄດ້ແລກປ່ຽນທັດສະນະ ຕໍ່ກັບໜ້າທີ່ ແລະ ຄວາມຮັບຜິດຊອບຂອງການບໍລິການ​ທາງດ້ານການແພດ ໃນການແກ້ໄຂບັນຫາໂຄວິດ-19 ແລະ ຂົງເຂດກົນໄກການຮ່ວມມືລະຫວ່າງໜ່ວຍງານທີ່ກ່ຽວຂ້ອງ ກັບ​ວຽກ​ງານປ້ອງກັນຊາດອາຊຽນ. ໜ່ວຍງານແພດທະຫານໄດ້ປະສານສົມ​ທົບຢ່າງໃກ້ຊິດ ກັບໜ່ວຍງານທີ່ກ່ຽວຂ້ອງຂອງພາກລັດໃນການແລກປ່ຽນຂໍ້ມູນຂ່າວສານ ແລະ ແລກປ່ຽນວິຊາການ.

ສະ​ເພາະ​ທິດທາງແຜນ​ການໃນຕໍ່ໜ້າ, ແຕ່ລະປະເທດມີທັດສະນະທີ່ຄ້າຍຄືກັນເປັນ​ຕົ້ນ:

  1. ຄວນສ້າງສູນຂໍ້ມູນຂ່າວສານສະເພາະໃນການແລກປ່ຽນຂໍ້ມູນຂ່າວສານອາຊຽນ.
  2. ຄວນເພີ່ມທະວີໃນການປະສານສົມທົບກັບບັນດາກະຊວງ ແລະ ສະຖາບັນທີ່ກ່ຽວຂ້ອງໃນການຈັດການກັບພະຍາດລະບາດໂຄວິດ-19.
  3. ຄວນມີການແລກປ່ຽນທາງດ້ານວິຊາການ ລວມທັງແນວທາງວິຊາການ.
  4. ຄວນມີການແລກປ່ຽນຖອດຖອນບົດຮຽນ ຫຼື ແບ່ງປັນແຜນປະຕິບັດງານທີ່ດີທີ່ສຸດໃນອາຊຽນດ້ວຍກັນ.
  5. ທົບທວນຄືນການປະເມີນຜົນຢ່າງເປັນປົກກະຕິ ເພື່ອປະຕິບັດຕາມນະໂຍບາຍຂອງມາດຕະຖານໃນການປະຕິບັດງານຕ່າງໆ.