ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ໃຫ້ສໍາພາດຕໍ່ສື່ມວນຊົນ ເມື່່ອບໍ່ດົນມານີ້ວ່າ: ການພັດທະນາທາງດ້ານເຕັກໂລຊີ ຂໍ້ມູນຂ່າວສານຫຼາຍຢ່າງຂອງສປ ຈີນ ໄດ້ກາຍເປັນບົດຮຽນທີ່ດີໃຫ້ແກ່ການພັດທະນາການທ່ອງທ່ຽວ ຂອງ ສປປ ລາວ ໂດຍສະເພາະບົດຮຽນໃນການພັດທະນາມາດຕະຖານຂອງສະຖານທີ່ທ່ອງທ່ຽວ ຂອງ ສປປ ລາວ ແມ່ນຮຽນມາຈາກ ສປ ຈີນ.
ທ່ານຮອງລັດຖະມົນຕີກະຊວງ ຖວທ ກ່າວວ່າ, ໃນຊຸມປີມໍ່ໆມານີ້, ຈີນມີການພັດທະນາແບບກ້າວກະໂດດ ໂດຍສະເພາະພັດ ທະນາທາງດ້ານພື້ນຖານໂຄງລ່າງ ສິ່ງອໍານວຍຄວາມສະດວກຕ່າງໆ ຖ້າທຽບໃສ່ໄລຍະກ່ອນ ຂ້າພະເຈົ້າເຫັນວ່າ, ມີການພັດທະ ນາໄວຫຼາຍ ແຕ່ລະຄັ້ງທີ່ໄປຈີນຈະເຫັນຄວາມແຕກຕ່າງໃນການພັດທະນາຂອງຈີນ ໂດຍສະເພາະແມ່ນການພັດທະນາທາງດ້ານເຕັກໂນໂລຊີ ຂໍ້ມູນຂ່າວສານຖືວ່າພັດທະນາໄປໄດ້ໄວແບບກ້າວກະໂດດ ແລະ ໄລຍະຜ່ານມາ ສປ ຈີນ ໄດ້ໃຫ້ການສະໜັບສະໜູນຊຸກຍູ້ໃຫ້ບຸກຄະລາກອນຂອງ ສປປ ລາວ ໄປຝຶກອົບຮົມຈໍານວນຫຼາຍ ຈາກບົດຮຽນ ແລະ ປະສົບການ ທີ່ໄດ້ຮັບຈາກ ສປ ຈີນ ໄດ້ນໍາມາຜັນຂະຫຍາຍຢູ່ໃນ ສປປ ລາວ ເຮັດໃຫ້ການພັດທະນາການທ່ອງທ່ຽວຂອງ ສປປ ລາວ ແລະ ສປ ຈີນ ມີການພັດທະນາໄປຄຽງຄູ່ກັນ ແລະ ການຮ່ວມມືລະຫວ່າງສອງປະເທດຈະສືບຕໍ່ໃຫ້ມີຄວາມຍືນຍົງຕະຫຼອດໄປ.
ທ່ານ ຮອງລັດຖະມົນຕີ ຖວທ ກ່າວຕື່ມວ່າ: ປະຈຸບັນ, ລັດຖະບານລາວໄດ້ມີນະໂຍບາຍຍົກເວັ້ນວີຊາໃຫ້ນັກທ່ອງທ່ຽວຈີນ ທີ່ມາທ່ຽວສປປ ລາວ ໂດຍຜ່ານການບໍລິການຂອງບໍລິສັດນໍາທ່ຽວ. ຈຸດປະສົງນີ້ແມ່ນເພື່ອດຶງດູດເອົານັກທ່ອງທ່ຽວ ຈາກ ສປ ຈີນ ເປັນການອໍານວຍຄວາມສະດວກ ແລະ ຊຸກຍູ້ໃຫ້ນັກທ່ອງທ່ຽວຈີນ ມາທ່ຽວລາວຫຼາຍຂຶ້ນປະກອບສ່ວນທາງດ້ານເສດຖະກິດ ສ້າງລາຍຮັບໃຫ້ແກ່ປະຊາຊົນລາວ ແລະ ເປັນການສ້າງຂະບວນການປີທ່ອງທ່ຽວລາວ ໃຫ້ເປັນຂະບວນຟົດຟື້ນຂຶ້ນ. ນອກນີ້, ຍັງມີນະໂຍບາຍວີຊາສໍາລັບບັນດາປະເທດອື່ນໆນໍາອີກໃນໂອກາດປີທ່ອງທ່ຽວລາວ.
ທີ່ມາ: CMG FM93
