ການພັດທະນາວຽກງານສື່ມວນຊົນຂອງລາວ ໃນໄລຍະ 5 ປີຜ່ານມາ ຍັງມີຈຸດອ່ອນ ແລະ ຂໍ້ຄົງຄ້າງຈໍານວນໜຶ່ງທີ່ຕ້ອງເປັນເຈົ້າການສຸມໃສ່ແກ້ໄຂໃຫ້ໄດ້ ໂດຍສະ ເພາະ ການສ້າງກົດໝາຍ ແລະ ນິຕິກໍາລຸ່ມກົດໝາຍ ຍັງບໍ່ພຽງພໍໃນດ້ານຈໍານວນ ແລະ ຄຸນນະພາບບໍ່ສູງ, ການປະຕິ ບັດກົດໝາຍ, ລະບຽບການຄຸ້ມຄອງທີ່ມີແລ້ວ ກໍຄືມະຕິຄໍາສັ່ງບໍ່ເຂັ້ມງວດ, ການຫັນໄປສູ່ການກຸ້ມຕົນເອງດ້ານລາຍຮັບວິຊາການເທື່ອລະກ້າວ ຂອງຂະແໜງຖະແຫລງຂ່າວ-ສື່ມວນຊົນ ບໍ່ບັນລຸໄດ້ຕາມຄາດໝາຍທີ່ໄດ້ວາງໄວ້, ພື້ນຖານໂຄ່ງລ່າງ, ວັດຖຸ-ເຕັກນິກຊຸດໂຊມຫລ້າຫລັງ ຍັງບໍ່ທັນເປັນລະ ບົບຄົບຊຸດ ແລະທັນສະໄໝ, ການຫັນປ່ຽນຈາກລະບົບອານາລັອກໄປສູ່ ດີຈີຕອນຍັງບໍ່ທັນສຳເລັດ, ເນື້ອໃນ ແລະ ຮູບການໂຄສະນາຍັງບໍ່ຕອບສະໜອງໄດ້ຕາມຄວາມຕ້ອງການຂອງສັງຄົມ.
ໃນໂອກາດລາຍງານຕໍ່ກອງປະຊຸມໃຫຍ່ອົງຄະນະພັກກະຊວງ ຖວທ ຄັ້ງທີ V ຈັດຂຶ້ນໃນວັນທີ 10 ທັນວາ 2020 ທີ່ນະຄອນຫລວງວຽງຈັນ ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໃຫ້ຮູ້ວ່າ: ເພື່ອເຮັດໃຫ້ຂົງເຂດວຽກງານງານສື່ມວນຊົນມີຄວາມເຂັ້ມແຂງ ແລະ ໄດ້ຮັບການພັດທະນາ ໃນຊຸມປີຕໍ່ໜ້າ ກະຊວງ ຖວທ ໄດ້ວາງຄາດໝາຍສູ້ຊົນໃນດ້ານຕ່າງໆເປັນຕົ້ນ: ຫັນການເຄື່ອນໄຫວຂອງຂະແໜງການຖະແຫລງຂ່າວ-ສື່ມວນຊົນ ໄປຕາມທິດຂ່າວສານທັນສະໄໝ, ວ່ອງໄວທັນການ ກາຍເປັນກະບອກສຽງທີ່ແຫລມຄົມຂອງພັກ, ເປັນເວທີແຫ່ງການສະແດງອອກຄຳເຫັນທີ່ສ້າງສັນຂອງສັງຄົມ, ສ້າງພື້ນຖານນິຕິກຳໃຫ້ມີການຄຸ້ມຄອງທີ່ເຂັ້ມງວດຕາມກົດໝາຍ. ພ້ອມກັນນີ້, ຕ້ອງສ້າງລະບົບສື່ທີ່ຢູ່ໃນການຄຸ້ມຄອງຂອງລັດໃຫ້ມີຄວາມເຂັ້ມແຂງ, ສາມາດປະຕິບັດບົດບາດນຳສະ ເໜີ ການຕົກລົງບັນຫາສຳຄັນຕ່າງໆ ຂອງລັດ ໄດ້ຮັບການສື່ສານຢ່າງເປັນລະບົບຕໍ່ເນື່ອງ, ວ່ອງໄວທັນການ, ຊັດເຈນ ໄປເຖິງທຸກເປົ້າໝາຍໃນສັງຄົມ, ສ້າງສື່ໃຫ້ກາຍ ເປັນຊ່ອງທາງແຫ່ງການສະແດງຄວາມຄິດເຫັນ ທີ່ສ້າງສັນຂອງສັງຄົມຕໍ່ການບໍລິຫານຕ່າງໆຂອງລັດ ເພື່ອເສີມຂະຫຍາຍບົດບາດຕັ້ງໜ້າຂອງສື່ມວນຊົນ ແລະ ສິດເປັນເຈົ້າຂອງປະຊາຊົນບັນດາເຜົ່າ, ຍົກລະດັບຂ່າວສານເປັນທັນສະໄໝ ຕາມທິດ ທາງຂອງການພັດທະນາສື່ມວນຊົນລາວ ກ້າວສູ່ຄຸນນະພາບຕາມລັກສະນະ ແລະ ຈັນຍາບັນວິຊາຊີບ, ເປັນກະບອກສຽງອັນແຫລມຄົມຂອງພັກ-ລັດ ທັງລວງເລິກ ແລະ ລວງກວ້າງ, ເປັນເຄື່ອງມືຮັບໃຊ້ການຄຸ້ມຄອງ ແລະ ກວດກາລັດ ຕາມກົດ ໝາຍ.
ທ່ານ ກິແກ້ວ ໄຂຄໍາພິທູນ ກ່າວຕື່ມວ່າ: ສິ່ງທີ່ຈະຕ້ອງເອົາໃຈໃສ່ຕໍ່ສື່ມວນຊົນໃນຕໍ່ໜ້າ ຕ້ອງປັບປຸງສ້ອມແປງພື້ນ ຖານໂຄງລ່າງ, ວັດຖຸເຕັກນິກທີ່ມີຢູ່ແລ້ວ ໃຫ້ສາ ມາດໃຊ້ການໄດ້ປົກກະຕິ ພ້ອມທັງຂະຫຍາຍເຄືອຂ່າຍໄປສູ່ລະບົບດີຈີຕອນໃຫ້ກວມທຸກພື້ນທີ່ພາຍໃນປະເທດ ແລະ ກວ້າງໄກເຊື່ອມຈອດສາກົນໃຫ້ເປັນຮູບປະທໍາຫລາຍຂຶ້ນ, ເປັນແຫລ່ງກະຈາຍຂໍ້ມູນຂ່າວສານທີ່ເຊື່ອຖືໄດ້, ວ່ອງໄວ, ຊັດເຈນ ແລະ ລົງເຖິງຮາກຖານທົ່ວປະເທດ ພ້ອມທັງໃຫ້ສາລະຄວາມຮູ້ຢ່າງຮອບດ້ານ, ສ້າງຜະລິດຕະພັນສື່ມວນຊົນໃຫ້ມີຫລາຍຮູບຫລາຍແບບ, ເນື້ອໃນ ແລະ ຮູບການດູດດຶງຫລາຍຂຶ້ນໄດ້ຕາມມາດຕະຖານ, ເປັນເວທີສະແດງຄວາມຄິດເຫັນຂອງສັງຄົມຢ່າງສ້າງສັນ ແລະ ຮັບໃຊ້ໂຄສະນາປະຊາສໍາພັນ, ສ້າງຄວາມເຂົ້າໃຈຕໍ່ທຸກເຫດການສໍາຄັນທີ່ເກີດຂຶ້ນຢູ່ທັງພາຍໃນ ແລະ ຕ່າງປະເທດໃຫ້ທົ່ວສັງຄົມ.
ນອກຈາກນີ້ ສິ່ງສໍາຄັນຕ້ອງເພີ່ມທະວີການຄຸ້ມຄອງສື່ສັງຄົມອອນລາຍ ໃຫ້ໄດ້ ດ້ວຍການຂຶ້ນທະບຽນ ແລະ ຕິດຕາມເນື້ອໃນ, ທັງສຶກສາອົບຮົມຄວາມຮູ້ກ່ຽວກັບການນໍາໃຊ້ສື່ແບບດີຈີຕອນ ໃນຍຸກອຸດສາຫະກໍາ 4.0 ໃຫ້ເຂົ້າໃຈເລິກເຊິ່ງໃນທົ່ວສັງ ຄົມ, ສ້າງສູນບໍລິການຂໍ້ມູນຂ່າວສານຮ່ວມກັບເອກະຊົນ ເພື່ອໂຄສະນາເຜີຍແຜ່ຂໍ້ ມູນການພັດທະນາທຸກດ້ານ, ລວມທັງວັດທະນະທໍາ ແລະ ການທ່ອງທ່ຽວຕິດພັນກັບການເກັບລາຍຮັບການບໍລິການຕາມລະ ບຽບການ, ປະສານສົມທົບກັບທຸກພາກ ສ່ວນກ່ຽວຂ້ອງໂຄສະນາເຜີຍແຜ່ຄ່ານິຍົມ, ຄວາມຮັກຊາດ, ຮັກລະບອບໃໝ່ ໃຊ້ຂອງລາວຜະລິດຄ່ານິຍົມກ້າວໜ້າ, ເຜິຍແຜ່ວັດທະນະທໍາລາວທີ່ດີງາມ ແລະ ໂຄສະນາການທ່ອງທ່ຽວ ໂດຍຍູ້ແຮງລາວທ່ຽວລາວ ແລະ ທ່ອງທ່ຽວກະສິກໍາ, ຂະຫຍາຍຕາ ໜ່າງໂທລະໂຄ່ງທີ່ເປັນເຄື່ອງມືໃຫ້ກວມເອົາຫລາຍບ້ານກວ່າເກົ່າໝູ່ ແລະ ອື່ນຯ.
Cr: ບຸນຕຽງ ຈັນທະວົງ
Loading...