ສໍານັກຂ່າວຊິນຮວາຂອງທາງການຈີນ ລາຍງານໃນວັນ ທີ 16 ກໍລະກົດ 2022 ວ່າ: ອ້າງຕາມການຖະແຫລງຂ່າວຂອງສໍານັກງານສະຖິຕິແຫ່ງຊາດຈີນ, ເຖີງວ່າປະສົບກັບຄວາມຫຍຸ້ງຍາກຍ້ອນການແຜ່ລະບາດຂອງພະຍາດໂຄວິດ-19 ທີ່ສົ່ງຜົນກະທົບຕໍ່ເສດຖະກິດໂລກ ແລະ ເສດຖະ ກິດຂອງຈີນມາດົນສົມຄວນ, ລວມທັງສິ່ງທ້າທາຍຕ່າງໆ, ແຕ່ເສດ ຖະກິດຂອງຈີນໃນໄຕມາດທີ 2 ຂອງປີ 2022 ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ. ນອກຈາກນີ້ ໃນໄລຍະ 6 ເດືອນຕົ້ນປີ 2022 ມູນຄ່າຜົນຜະລິດດ້ານອຸດສາຫະກໍາຂອງຈີນ ເພີ່ມຂຶ້ນ 3,4%, ມູນຄ່າການລົງທຶນຊັບສິນຄົງທີ່ ເພີ່ມຂຶ້ນ 6,1% ແລະ ມູນຄ່າການຄ້າສິນຄ້າຕ່າງປະເທດ ເພີ່ມຂຶ້ນ 9,4%.
ຢ່າງໃດກໍຕາມ ກ່ອນໜ້າທີ່ຈະມີການເຜີຍແຜ່ຕົວເລກສະຖິຕິດັ່ງກ່າວ, ມີສື່ໃນປະເທດຕາເວັນຕົກບາງສໍານັກໄດ້ນໍາສະເໜີຂ່າວເກີນຄວາມເປັນຈິງກ່ຽວກັບເສດຖະກິດຂອງຈີນທີ່ພວມປະສົບຢູ່ ແລະ ວິເຄາະໄປໃນທາງທີ່ບໍ່ສ້າງ ສັນກ່ຽວກັບການພັດທະນາເສດຖະກິດຂອງຈີນໃນອະນາ ຄົດ. ປັດຈຸບັນ ເສດຖະກິດຂອງຈີນ ກໍາລັງຟື້ນຕົວຄືນເຊີ່ງເປັນການພິສູດໃຫ້ປະເທດຕາເວັນຕົກຮູ້ເຖີງຄວາມສາມາດຂອງຈີນໃນການແກ້ໄຂສະພາບຄວາມຫຍຸ້ງຍາກທີ່ເກີດຂຶ້ນແບບບໍ່ຄາດຄິດມາກ່ອນ.
ການຟື້ນຕົວຢ່າງຫມັ້ນຄົງທາງດ້ານເສດຖະກິດຂອງຈີນ ເຊີ່ງເປັນປະເທດເສດຖະກິດໃຫຍ່ອັນດັບສອງຂອງ ໂລກ ໃນຍຸກທີ່ບໍ່ມີຄວາມແນ່ນອນ ຫລື ຍຸກແຫ່ງຄວາມຫຍຸ້ງ ຍາກ ຖືເປັນສິ່ງຄວນສະແດງຄວາມຍິນດີ ແລະ ຊົມເຊີຍນໍາເປັນຢ່າງຍິ່ງ. ຢ່າງໃດກໍ່ຕາມ ຍັງເປັນເລື່ອງທີ່ຍາກທີ່ຈະຄາດ ຄະເນສະພາບແວດລ້ອມຂອງສາກົນທີ່ຜັນແປໄປຢ່າງສະ ຫຼັບຊັບຊ້ອນ ແລະ ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ທີ່ເກີດຂຶ້ນພາຍໃນປະເທດ ແລະ ປັດໄຈອື່ນໆ.
ໃນຂະນະດຽວກັນ, ຈີນ ໄດ້ປັບປຸງຄຸນນະພາບຂອງການເຕີບໂຕທາງເສດຖະກິດ ໂດຍການໃຫ້ຄວາມສໍາຄັນຕໍ່ ການພັດທະນາທີ່ມີຄຸນນະພາບສູງ. ຕົວຢ່າງ: ການຂະຫຍາຍຕົວໃນຂະແຫນງການຜະລິດເຕັກໂນໂລຊີສູງ ເພີ່ມຂຶ້ນ 9,6%, ມູນຄ່າເພີ່ມຜົນຜະລິດຂອງການຖ່າຍທອດຂໍ້ມູນຂ່າວສານ, ຊອບແວ ແລະ ບໍລິການເຕັກໂນໂລຊີຂໍ້ມູນຂ່າວສານ ເພີ່ມ ຂຶ້ນ 9,2% ແລະ ການບໍລິການດ້ານການເງິນ ເພີ່ມຂຶ້ນ 5,5%.
ຈີນ ພັດທະນາເສດຖະກິດໄດ້ເປັນຢ່າງດີ ເມື່ອທຽບໃສ່ປະເທດເສດຖະກິດໃຫຍ່ອື່ນໆ. ອີງຕາມດັດຊະນີລາຄາຜູ້ບໍລິໂພກ (CPI) ໃນເດືອນມິຖຸນາ ສໍາລັບສະຫະລັດອາເມລິ ກາ ຖືເປັນການເພີ່ມຂຶ້ນໃນໄລຍະ 12 ເດືອນທີ່ໃຫຍ່ທີ່ສຸດ ນັບແຕ່ເດືອນພະຈິກປີ 1981 ເປັນຕົ້ນມາ ແລະ ເງິນເຟີ້ສໍາລັບເຂດເອີຣົບ ມາຮອດເດືອນມິຖຸານປີ 2022 ຢູ່ໃນລະດັບສູງເຖິງ 8,6%.
ລັດຖະບານຈີນ ໄດ້ນໍາໃຊ້ 33 ມາດຕະການໃນເດືອນພຶດ ສະພາຜ່ານມາ ເພື່ອເຮັດໃຫ້ເສດຖະກິດຂອງປະເທດມີຄວາມຫມັ້ນຄົງ, ໃນນັ້ນ ກວມເອົານະໂຍບາຍກ່ຽວກັບການລົງທຶນ, ການບໍລິໂພກ, ຄວາມປອດໄພດ້ານອາຫານ ແລະ ໝັ້ນຄົງທາງດ້ານພະລັງງານ, ອຸດສາຫະກໍາ ແລະ ການສະຫນອງ ແລະ ການປັບປຸງຊີວິດການເປັນຢູ່ຂອງປະຊາຊົນ ໂດຍຢຶດຫມັ້ນ ແລະ ຖືເອົາປະຊາຊົນເປັນໃຈໃນການພັດ ທະນາ.
ຈີນ ໄດ້ປະຕິບັດນະໂຍບາຍເພື່ອເຮັດໃຫ້ພະຍາດໂຄວິດ-19 ຫລຸດລົງເປັນສູນ ໂດຍໄດ້ຈັດຕັ້ງປະຕິບັດຫລາຍມາດຕະການສໍາຄັນເພື່ອຊ່ວຍເຫລືອປະຊາຊົນ ແລະ ເຮັດໃຫ້ປະຊາຊົນໄດ້ຮັບຜົນກະທົບຈາກການລະບາດຂອງພະຍາດດັ່ງກ່າວໜ້ອຍທີ່ສຸດ, ໃນນີ້ ສະເພາະເພື່ອຊ່ວຍ ເຫຼືອບັນດາວິສາຫະກິດ, ເຈົ້າຂອງທຸລະກິດ ກໍຄື ວິສາຫະ ກິດຂະຫນາດນ້ອຍ ແລະ ຂະຫນາດກາງທີ່ປະສົບກັບການລະບາດຂອງພະຍາດດັ່ງກ່າວຢ່າງຫນັກ ໂດຍສະເພາະຢູ່ນະຄອນຫລວງປັກກິ່ງ ໄດ້ນໍາໃຊ້ມາດຕະການລະອຽດເພື່ອເຮັດໃຫ້ຮັກສາສະຖຽນລະພາບຄວາມຫມັ້ນຄົງຂອງດ້ານຕະຫຼາດ, ຮັກສາເງິນເດືອນໃຫ້ມີຄວາມຫມັ້ນຄົງ ແລະ ສົ່ງ ເສີມການສ້າງວຽກເຮັດງານທໍາ ເຮັດໃຫ້ສາມາດສ້າງວຽກເຮັດງານທໍາໃຫມ່ໃນເມືອງໄດ້ທັງຫມົດ 6,54 ລ້ານຄົນໃນ 6 ເດືອນຕົ້ນປີ 2022.
ທ່ານ Agustin Carstens ຜູ້ຈັດການທົ່ວໄປຂອງສະ ຖາບັນການເງິນສາກົນ ເຊີ່ງເປັນສະຖາບັນການເງິນທີ່ເກົ່າ ແກ່ທີ່ສຸດ ກ່າວວ່າ: ເສດຖະກິດຂອງຈີນ ຍັງສືບຕໍ່ເປັນເຄື່ອງຈັກສໍາຄັນໃນການຂະຫຍາຍຕົວຂອງເສດຖະກິດທົ່ວໂລກ, ເມື່ອເບິ່ງໄປໃນອະນາຄົດ ຕ້ອງຍອມຮັບວ່າພື້ນຖານສໍາລັບການຟື້ນຟູເສດຖະກິດຂອງຈີນຕໍ່ໄປຍັງບໍ່ທັນໄດ້ສັງ ລວມເຂົ້າກັນ ແລະ ຄວາມສ່ຽງໃນການຂະຫຍາຍຕົວຊ້າລົງຂອງເສດຖະກິດໂລກຍັງສືບຕໍ່ເພີ່ມຂຶ້ນ. ຢ່າງໃດກໍ ຕາມ ດ້ວຍຄວາມສາມາດອັນຍິ່ງໃຫຍ່ທີ່ໄດ້ຜ່ານການພິສູດໃຫ້ເຫັນມາແລ້ວ, ຈີນຍັງມີອະນາຄົດທີ່ສົດໃສຂອງການຂະຫຍາຍ ຕົວທາງດ້ານເສດຖະກິດໃນໄລຍະຍາວ, ເຮັດໃຫ້ແທນທີ່ຈະຢຶດຕິດກັບອະຄະຕິແບບເກົ່າທີ່ເຄີຍມີມາ ບັນດາປະເທດໃນຕາເວັນຕົກຄວນນໍາເອົາບົດຮຽນທີ່ສໍາຄັນຂອງຈີນໄປນໍາໃຊ້ເຂົ້າໃນການພັດທະນາເສດຖະກິດປະເທດຂອງຕົນ.
ສໍາລັບການຂະຫຍາຍຕົວທາງດ້ານເສດຖະກິດຂອງຈີນ, ອີງຕາມການຖະແຫລງຂອງ ທ່ານຟູລິງຫຸ່ຍໂຄສົກ ສໍານັກງານສະຖິຕິແຫ່ງຊາດຈີນ ໃຫ້ຮູ້ວ່າ: ໃນ 6 ເດືອນຕົ້ນປີ 2022 ນີ້, ລວມຍອດຜະລິດຕະພັນພາຍໃນ ຫຼື GDP ຂອງຈີນ ບັນລຸ 56.264,2 ຕື້ຢວນ ໄດ້ເພີ່ມຂຶ້ນ 2,5% ເມື່ອທຽບໃສ່ໄລຍະດຽວກັນຂອງປີ 2021. ໃນນີ້ ຂະແໜງການກະສິກຳ ບັນລຸ 2.913,7 ຕື້ຢວນ, ເພີ່ມຂຶ້ນ 5% ເມື່ອທຽບໃສ່ໄລຍະດຽວກັນຂອງປີ 2021; ຂະແໜງການອຸດສາຫະ ກຳ ບັນລຸ 22.863,6 ຕື້ຢວນ, ເພີ່ມຂຶ້ນ 3,2% ແລະ ຂະແໜງການບໍລິການ ບັນລຸ 30.486,8 ຕື້ຢວນ, ເພີ່ມຂຶ້ນ 1,8%. ສ່ວນດັດສະນີລາຄາຜູ້ບໍລິໂພກໃນທົ່ວປະເທດຈີນ ຫຼື CPI ເພີ່ມຂຶ້ນ 1,7% ເມື່ອທຽບໃສ່ໄລຍະດຽວກັນຂອງປີ 2021.
Loading...