ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ຮ່ວມມືຮອບດ້ານ ຫວຽດນາມ-ລາວ ໄດ້ຂະຫຍາຍຕົວຢ່າງບໍ່ຢຸດຢັ້ງ ສາມາດບັນລຸໄດ້ຫລາຍໝາກຜົນທີ່ສຳຄັນ ແລະ ສືບຕໍ່ໄດ້ຮັບການພິສູດວ່າ ແມ່ນສາຍພົວພັນພິເສດທີ່ເປັນເອກະລັກສະເພາະຂອງໂລກ.
ສະຫາຍ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳລາວ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 9 ກໍລະກົດ 2024 ໂດຍສະຫາຍໄດ້ຍົກໃຫ້ເຫັນບາງເນື້ອໃນສຳຄັນວ່າ: 6 ເດືອນຕົ້ນປີ 2024 ນອກຈາກການສຸມໃສ່ ປະຕິບັດມະຕິກອງປະຊຸມໃຫຍ່ຂອງພັກຂອງແຕ່ລະປະເທດແລ້ວ, ສອງປະເທດຫວຽດນາມ-ລາວ ກໍໄດ້ສົມທົບກັນຢ່າງແໜ້ນແຟ້ນໃນການປະຕິບັດບັນດາຂໍ້ຕົກລົງ, ສັນຍາຮ່ວມມືສອງຝ່າຍ ຫວຽດນາມ-ລາວ ໄລຍະ 20212025 ແລະ ໄລຍະຍາວແມ່ນຍຸດທະສາດ ການຮ່ວມມືໄລຍະ 2021-2030 ເຊິ່ງການພົວພັນດ້ານການເມືອງ ນັບມື້ນັບແໜ້ນແຟ້ນ ເປັນເຂັມທິດເຍືອງທາງໃຫ້ການຮ່ວມມື ລະຫວ່າງສອງປະເທດ; ດ້ານການປ້ອງ ກັນຊາດ-ປ້ອງກັນຄວາມສະຫງົບ, ວຽກງານຊາຍແດນສືບຕໍ່ໄດ້ຮັບການຮ່ວມມືຢ່າງແໜ້ນແຟ້ນ ໃນທຸກຂົງເຂດ, ໄດ້ປະກອບສ່ວນຮັກສາຄວາມສະຖຽນລະພາບ ແລະ ຄວາມໝັ້ນຄົງດ້ານການເມືອງຢູ່ແຕ່ລະປະເທດ; ການຮ່ວມມືດ້ານເສດຖະກິດ, ການລົງທຶນ, ການຄ້າ, ວັດທະນະທຳ, ວິທະຍາສາດເຕັກໂນໂລຊີ ລະຫວ່າງສອງປະເທດ ພວມໄດ້ຜັນຂະຫຍາຍຢ່າງບໍ່ຢຸດຢັ້ງ, ເຂົ້າສູ່ລວງເລິກ, ຕັ້ງໜ້າປະຕິບັດໝາກຜົນຂອງກອງປະຊຸມຄັ້ງທີ 46 ຂອງຄະນະກຳມະການຮ່ວມມືລະຫວ່າງລັດຖະບານ ຫວຽດນາມ-ລາວ; ດ້ານການສຶກສາ ແລະ ການກໍ່ສ້າງຊັບພະຍາກອນມະນຸດສືບຕໍ່ໄດ້ຮັບຄວາມເອົາໃຈ; ການພົວພັນລະຫວ່າງບັນດາແຂວງຕ່າງໆ ຂອງສອງປະເທດໄດ້ຮັບການພັດທະນາຢ່າງຕັ້ງໜ້າ, ບໍ່ພຽງແຕ່ລະຫວ່າງບັນດາແຂວງທີ່ມີຊາຍແດນຕິດຈອດກັນ ຫລື ລະຫວ່າງບັນດາແຂວງແຮກສ່ຽວຂອງສອງປະເທດເທົ່ານັ້ນ, ຫາກຍັງໄດ້ຮັບການເປີດກວ້າງ ໄປຮອດບັນດາແຂວງຂອງລາວກັບບັນດາແຂວງ, ນະຄອນຂອງຫວຽດນາມ ອີກດ້ວຍ, ເຮັດໃຫ້ການຮ່ວມມື ແລະ ການຊ່ວຍເຫລືອເຊິ່ງກັນ ແລະ ກັນນັບມື້ນັບມີປະສິດທິຜົນສູງຂຶ້ນ.
ເຖິງຢ່າງໃດກໍຕາມ ສາຍພົວພັນແບບພິເສດ ລະຫວ່າງ ຫວຽດນາມ-ລາວ ຍັງປະສົບກັບຄວາມຫຍຸ້ງຍາກ ແລະ ສິ່ງທ້າທາຍຢ່າງເຄັ່ງຕຶງຈາກສະພາບແວດລ້ອມສາກົນ, ພາກພື້ນ. ແຕ່ດ້ວຍຄວາມຕັດສິນໃຈ ແລະ ຄວາມມານະພະຍາຍາມຢ່າງສູງສຸດຂອງທັງສອງພັກ, ສອງລັດຖະບານ ແລະ ປະຊາຊົນສອງປະເທດ, ພວກເຮົາເຊື່ອໝັ້ນຢ່າງໜັ້ກແໜ້ນວ່າ, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ-ລາວ ຈະໄດ້ຮັບການຮັກສາ ແລະ ເພີ່ມພູມຄຸນສ້າງຕະຫລອດໄປ ຄືດັ່ງຄວາມຫວັງຂອງປະທານ ໄກສອນ ພົມວິຫານ ທີ່ວ່າ: “ເຖິງວ່າພູຈະຖືກເຊາະເຈື່ອນ, ແມ່ນໍ້າລໍາເຊຈະເຫືອດແຫ້ງ, ແຕ່ສາຍພົວພັນມິດຕະພາບ ລາວ-ຫວຽດນາມ ຈະໝັ້ນຄົງຂະໜົງແກ່ນຊົ່ວກາລະນານ” ແລະ ສາຍພົວພັນດັ່ງກ່າວຈະໄດ້ຮັບການພັດທະນາ ຈະເລີນງອກງາມຢ່າງບໍ່ຢຸດຢັ້ງ ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.
ສະຫາຍ ຫງວຽນ ບ໋າ ຮຸ່ງ ກ່າວອີກວ່າ: ເພື່ອຮັກສາໄວ້ ແລະ ພັດທະນາສາຍພົວພັນພິເສດຫວຽດນາມ-ລາວ ໃຫ້ນັບມື້ນັບເຂົ້າສູ່ລວງເລິກ, ມີປະສິດທິຜົນຫລາຍກວ່າ ແລະ ນຳເອົາຜົນປະໂຫຍດແທ້ຈິງໃຫ້ແກ່ສອງປະເທດ, ພິເສດ, ບໍ່ມີອິດທິກຳລັງໃດໆ ສາມາດແບ່ງແຍກສາຍພົວພັນສອງປະເທດ ຄືດັ່ງຄຳເວົ້າຂອງ ສະຫາຍເລຂາທິການໃຫຍ່, ປະທານປະເທດ ທອງລຸນ ສີສຸລິດ, ຂ້າພະເຈົ້າຄິດວ່າສອງປະເທດພວກເຮົາ ຕ້ອງການສືບຕໍ່ຄຽງບ່າຄຽງໄຫລ່ກັນ, ເພີ່ມທະວີປະສິດທິຜົນການຮ່ວມມື; ໃນຕໍ່ໜ້າ, ສອງປະເທດຄວນສຸມໃສ່ເຂົ້າໃນບັນດາບຸລິມະສິດຄື: ສືບຕໍ່ຂະຫຍາຍສາຍພົວພັນເຂົ້າສູ່ລວງເລິກ, ປະຕິບັດບັນດາຂໍ້ຕົກລົງຂັ້ນສູງຢ່າງດີ, ພິເສດ, ຕ້ອງການສືບຕໍ່ຮັກສາໄວ້ ແລະ ຍົກສູງປະສິດທິຜົນບັນດາກົນໄກຮ່ວມມືລະຫວ່າງການນຳຂັ້ນສູງສອງປະເທດ; ເຊື່ອມຊຶມ ແລະ ຍົກສູງຄວາມຮັບຮູ້ກ່ຽວກັບຄວາມສຳຄັນຂອງສາຍພົວພັນພິເສດຫວຽດນາມ-ລາວ ໃຫ້ທົ່ວປວງຊົນ; ຍົກລະດັບການຮ່ວມມືດ້ານເສດຖະກິດ ຂອງສອງປະເທດດ້ວຍການເປີດກວ້າງ, ຍົກລະດັບການເຊື່ອມຕໍ່ຄົມມະນາຄົມຕາເວັນອອກ-ຕາເວັນຕົກ; ສ້າງກົນໄກຮ່ວມມືຄົບຊຸດ, ນະໂຍບາຍພິເສດເພື່ອປົດປ່ອຍຊັບພະຍາກອນມະນຸດ, ອຳນວຍຄວາມສະດວກທີ່ສຸດໃຫ້ແກ່ວິສາຫະກິດ, ປະຊາຊົນສອງຊາດລົງທຶນ ແລະ ເຮັດທຸລະກິດ; ແກ້ໄຂຂໍ້ຄົງຄ້າງດ້ວຍບັນດາວິທີການບຸກທະລຸ; ເສີມຂະຫຍາຍບັນດາຮູບແບບຮ່ວມມືໃໝ່ (ຮ່ວມມືຫວຽດນາມ-ລາວບວກ 1) ເພື່ອນຳໃຊ້ຄວາມສາມາດບົ່ມຊ້ອນ, ທ່າແຮງຂອງສອງປະເທດແລະຍາດແຍ່ງກຳລັງບົ່ມຊ້ອນກ່ຽວກັບທຶນຮອນ, ບົດຮຽນ, ເຕັກໂນໂລຊີຂອງຄູ່ຮ່ວມມື; ນຳໃຊ້ບັນດາສົນທິສັນຍາການຄ້າເສລີເພື່ອເພີ່ມທະວີປະສິດທິຜົນການຄ້າ, ເປີດກວ້າງຕະຫລາດ ແລະ ດຶງດູດການລົງທຶນ; ສຸມໃສ່ຄຸນນະພາບ, ປະສິດທິຜົນໃນການພັດທະນາຊັບພະຍາກອນມະນຸດ ເພື່ອຕອບສະໜອງບັນດາຄວາມຕ້ອງການຂອງການພັດທະນາຂອງແຕ່ລະປະເທດ, ພ້ອມທັງປະກອບສ່ວນເຂົ້າໃນການຮັດ ແໜ້ນຄວາມຮັກແພງສະໜິດສະໜົມ, ຄວາມສາມັກຄີ ລະຫວ່າງປະຊາຊົນສອງຊາດ.
