ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການລະບາດຂອງພະຍາດ ໂຄວິດ-19 ຈະເຮັດໃຫ້ແຂວງ ຫລວງພະບາງ ເກັບລາຍຮັບ ໄດ້ປະມານ 50% ຂອງແຜນການທີ່ວາງໄວ້

ໃນໄລຍະ 3 ເດືອນຕົ້ນປີ ຫລື ໄຕມາດທໍາອິດຂອງປີ 2020 ແຂວງ ຫລວງພະບາງ ສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 78 ຕື້ກີບ ຈາກທີ່ວາງຄາດໝາຍໃນໄຕມາດທໍາອິດຢູ່ທີ່ 95 ຕື້ກີບ. ຂະນະທີ່ ອົງການປົກຄອງແຂວງ ຄາດວ່າປີນີ້ແຂວງ ຫລວງພະບາງ ຈະສາມາດເກັບລາຍຮັບໄດ້ປະມານ 55% ຂອງແຜນການປີເທົ່ານັ້ນ.

ທ່ານ ສຸກັນ ບຸນຍົງ  ຮອງເຈົ້າແຂວງ  ຫລວງພະບາງ ໃຫ້ສໍາພາດວ່າ: ການລະບາດຂອງພະຍາດໂຄວິດ-19 ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງແຂວງ ຫລວງພະບາງ ຢ່າງໜັກໜ່ວງ, ໃນນີ້ ໜັກໜ່ວງກ່ວາໝູ່ແມ່ນຂະແໜງການທ່ອງທ່ຽວ ເພາະໃນໄລຍະຕົ້ນປີນີ້ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປທ່ອງທ່ຽວຢູ່ຫລວງພະບາງຫລຸດລົງ, ແຕ່ພາຍຫລັງລັດຖະບານອອກຄໍາສັ່ງເລກທີ 06 ລົງວັນທີ 29 ມີນາ 2020 ເຮັດໃຫ້ບໍ່ມີນັກທ່ອງທ່ຽວເຂົ້າໄປທ່ອງທ່ຽວຢູ່ຫລວງພະບາງ ຕື່ມອີກ ຈິ່ງເຮັດໃຫ້ສົ່ງຜົນກະທົບຕໍ່ຫົວໜ່ວຍທຸລະກິດບໍລິການທ່ອງທ່ຽວພາຍໃນແຂວງຢ່າງຫລີກຫລ່ຽງບໍ່ໄດ້. ນອກຈາກນີ້ ຂະແໜງການອື່ນຯ ໄດ້ຮັບຜົນກະທົບເຊັ່ນດຽວກັນ. ທັງໝົດນີ້ ໄດ້ເຮັດໃຫ້ການຈັດເກັບລາຍຮັບເຂົ້າງົບປະມານລວມຂອງແຂວງໃນໄຕມາດທໍາອິດຂອງປີນີ້ຫລຸດຄາດໝາຍທີ່ວາງໄວ້ ແລະ ນັບແຕ່ເດືອນ ເມສາ ເປັນຕົ້ນມາ ການເກັບລາຍຮັບເຂົ້າງົບປະມານຢູ່ແຂວງຫລວງພະບາງ ຍັງບໍ່ດີຂຶ້ນ.

ຮອງເຈົ້າແຂວງຫລວງພະບາງ ໃຫ້ຮູ້ຕື່ມວ່າ: ແຂວງ ຫລວງພະບາງ ວາງຄາດໝາຍຈັດເກັບລາຍຮັບເຂົ້າງົບ ປະມານໃນ ປີ 2020 ໃຫ້ໄດ້ 383 ຕື້ກີບ, ແຕ່ຜ່ານການປະເມີນຕົວຈິງຈາກບັນດາຂະແໜງການທີ່ກ່ຽວຂ້ອງຂອງແຂວງແລ້ວເຫັນວ່າ ເຖີງວ່າພະຍາດໂຄວິດ-19 ຢຸດຕິການລະບາດ  ແລະ ເຮັດໃຫ້ສະພາບພາຍໃນແຂວງ ກໍ່ຄື ທົ່ວປະເທດກັບມາເປັນປົກກະຕິເລີ່ມແຕ່ ເດືອນ ມິຖຸນາ ຫລື ເດືອນ ກໍລະກົດ ປີນີ້ ແຕ່ການເກັບລາຍຮັບເຂົ້າງົບປະມານລວມທັງໝົດຂອງແຂວງ ຫລວງພະບາງ ຈະບັນລຸພຽງ 55 % ເທົ່ານັ້ນ, ແຕ່ຖ້າການລະບາດຂອງພະຍາດຊະນິດນີ້ສືບຕໍ່ຮ້າຍແຮງແກ່ຍາວກ່ວານີ້ ຈະເຮັດໃຫ້ການເກັບລາຍຮັບເຂົ້າງົບປະມານຢູ່ແຂວງ ຫລວງພະບາງ ປີ 2020 ຫລຸດລົງກ່ວານີ້ອີກ.

 

ໂດຍ: ມົດແດງນ້ອຍ, ວສລ