ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

   ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ

ການສະເຫຼີມສະຫຼອງວັນຟຣັງໂກໂຟນີສາກົນ 20 ມີນາ ປະຈໍາປີ 2021 ໄດ້ຈັດຂຶ້ນຢ່າງເປັນທາງການ ທີ່ ແຂວງສະຫວັນນະເຂດ

ໃນວັນທີ 06 ເມສາ 2021, ທີ່ ແຂວງສະຫວັນນະເຂດ, ກະຊວງການຕ່າງປະເທດ ໂດຍຮ່ວມມືກັບພາກສ່ວນຕ່າງໆທີ່ກ່ຽວຂ້ອງ ໄດ້ຈັດພິທີທາງການ ສະເຫຼີມສະຫຼອງວັນຟຣັງໂກໂຟນີສາກົນ 20 ມີນາ ຂຶ້ນຢ່າງເປັນທາງການທີ່ຫ້ອງປະຊຸມໃຫຍ່ ຂອງມະຫາວິທະຍາໄລສະຫວັນນະເຂດ ​ໂດຍ​ພາຍ​ໃຕ້​ຫົວ​ຂໍ້: “ແມ່ຍິງຟຣັງໂກໂຟນີ ແມ່ຍິງທີ່ມີຄວາມເຂັ້ມແຂງ”, ຊຶ່ງການສະເຫຼີມສະຫຼອງໃນປີນີ້ແມ່ນເປັນປີຄົບຮອບ 51 ປີ ຂອງການສ້າງຕັ້ງອົງການຟຣັງໂກໂຟນີສາກົນ ແລະ ເປັນປີຄົບຮອບ 30 ປີ ແຫ່ງການເຂົ້າເປັນສະມາຊິກອົງການຟຣັງໂກໂຟນີສາກົນ ຂອງ ສປປ ລາວ. ພິທີ​ທາງ​ການດັ່ງກ່າວ​​​ແມ່ນ​ດຳ​ເນີນ​ໄປໂດຍ​ການ​ເປັນ​ປະທານ​ຂອງ ທ່ານ ຮສ. ປອ. ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ,​ ແລະ ມີ​ການ​ເຂົ້າຮ່ວມ​​ເປັນກຽດຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ ແລະ ທ່ານນາງ ຫຼິງທອງ ແສງຕາວັນ, ຮອງເຈົ້າ​ແຂວງ ​ແຂວງ​ສະຫວັນນະເຂດ. ພ້ອມດຽວກັນນັ້ນ, ກໍມີການເຂົ້າຮ່ວມຈາກທູຕານຸທູດບັນດາປະເທດທີ່​ນຳໃຊ້​ພາສາ​ຝຣັ່ງ ປະຈຳ ສປປ ລາວ, ທ່ານ ຫົວໜ້າຫ້ອງການມະຫາວິທະຍາໄລຟຣັງໂກໂຟນີ (AUF) ປະຈໍາ ສປປ ລາວ, ບັນດາພະແນກການຕ່າງໆອ້ອມຂ້າງແຂວງ, ພ້ອມດ້ວຍຄູອາຈານ ແລະ ນັກຮຽນ-ນັກສຶກສາທີ່ຮຽນພາສາຝຣັ່ງ ພາຍໃນແຂວງສະຫວັນນະເຂດ ເຂົ້າຮ່ວມ200ກ່ວາທ່ານ.

​ໃນ​ໂອກາດດັ່ງກ່າວ, ທ່ານ ນາງ ຫຼິງທອງ ແສງຕາວັນ, ຮອງເຈົ້າແຂວງ ແຂວງສະຫວັນນະເຂດ,​ ໄດ້​ໃຫ້ກຽດກ່າວ​ຕ້ອນຮັບ ແລະ ສະແດງຄວາມດີໃຈຕໍ່ການມາຈັດພິທີທາງການສະເຫຼີມສະຫຼອງວັນຟຣັງໂກໂຟນີ ໃນປີນີ້ ຢູ່ແຂວງສະຫວັນນະເຂດ, ຊຶ່ງທ່ານໄດ້ລາຍງານ ແລະ ຍົກໃຫ້ເຫັນສະພາບຂອງການສຶກສາ ຢູ່ ພາຍໃນແຂວງສະຫວັນນະເຂດ ໂດຍສະເພາະຫຼັກສູດການຮຽນ-ການສອນພາສາຝຣັ່ງ ໃນບັນດາໂຮງຮຽນຕ່າງໆທີ່ມີຫຼັກສູດຫ້ອງຮຽນສອງພາສາ ລາວ-ຝຣັ່ງ. ໃນພິທີທາງການໃນຄັ້ງນີ້ ທ່ານ ລັດຖະມົນຕີກະຊວງສຶກສາທິການ ແລະ ກິລາ, ​ປະທານໃນພິທີໄດ້​ໃຫ້ກຽດກ່າວ​ຄຳ​ເຫັນ ​ໂດຍ​ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງວັນຟຣັງ​ໂກ​ໂຟນີສາກົນ ແລະ ການຍົກສູງບົດບາດຂອງແມ່ຍິງຟຣັງໂກໂຟນີ ກໍຄືແມ່ຍິງລາວ ໃນການປະກອບສ່ວນເຂົ້າໃນວຽງານຕ່າງໆ ໂດຍສະເພາະໃນຂົງເຂດເສດຖະກິດ-ສັງຄົມ ແລະ ການສຶກສາ ແນໃສ່ເພື່ອສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ຮັບປະກັນຄວາມສະເໝີພາບ ຍິງ-ຊາຍ ຢູ່ໃນສັງຄົມ, ຊຶ່ງເປັນໜຶ່ງໃນວຽກງານບູລິມະສິດ ຂອງ ອົງການຟຣັງໂກໂຟນີສາກົນ ໃນໄລຍະປັດຈຸບັນ. ນອກຈາກນີ້, ທ່ານ ຍັງໄດ້ຍົກໃຫ້ເຫັນເຖິງຄວາມພະຍາຍາມ ແລະ ຄວາມເອົາໃຈໃສ່ ຂອງ ສປປ ລາວ ໃນການປະກອບສ່ວນສົ່ງເສີມການນຳໃຊ້ພາສາຝຣັ່ງ ກໍຄືການສົ່ງເສີມການສຶກສາຫຼັກສູດຫ້ອງຮຽນສອງພາສາ ລາວ-ຝຣັ່ງ ທີ່ມີຢູ່ໃນ 04 ແຂວງ ຂອງ ສປປ ລາວ ຄື: ນະຄອນຫຼວງວຽງຈັນ, ແຂວງຫຼວງພະບາງ, ແຂວງສະຫວັນນະເຂດ ແລະ ແຂວງຈຳປາສັກ.

ໃນໂອກາດດຽວກັນນີ້, ບັນດາຜູ້ເຂົ້າຮ່ວມໃນພິທີ ຍັງໄດ້ຮັບຊົມວີດີໂອການປະກອບຄຳເຫັນຂອງ ທ່ານ ເອກອັກຄະລັດຖະທູດຝຣັ່ງ ປະຈໍາ ສປປ ລາວ ແລະ ເລຂາທິການໃຫຍ່ອົງການຟຣັງໂກໂຟນີສາກົນຕໍ່ກັບຫົວຂໍ້ຂອງການສະເຫຼີມສະຫຼອງວັນຟຣັງໂກໂຟນີສາກົນ ປະຈຳປີ 2021 ນີ້.

​ໃນ​ຕອນ​ທ້າຍ​ຂອງ​ພິທີ​ດັ່ງກ່າວ, ບັນດາຜູ້ເຂົ້າຮ່ວມ ໄດ້ຮ່ວມຊົມການສະແດງສິລະປະວັນນະຄະດີຂອງນ້ອງນັກຮຽນ-ນັກສຶກສາພາສາຝຣັ່ງ, ຕະຫຼອດເຖິງໄດ້ຢ້ຽມຊົມການວາງສະແດງຮູບພາບ ແລະ ຂໍ້ມູນຂ່າວສານກ່ຽວກັບການເຄື່ອນໄຫວກິດຈະກຳຕ່າງໆຂອງຄູອາຈານ ແລະ ນັກຮຽນ-ນັກສຶກສາພາສາຝຣັ່ງ ຂອງ​ແຂວງ​ສະຫວັນນະເຂດ ໃນຂອບວຽກງານຟຣັງໂກໂຟນີ. ພິທີທາງການ​ດັ່ງກ່າວ ​ໄດ້​ດຳ​ເນີນ​ໄປ ​ແລະ ອັດ​ລົງ​ດ້ວຍ​ຜົນສຳ​ເລັດ​ຢ່າງ​ຈົບງາມ.

   

ຂ່າວ: ກົມການຂ່າວ, ກະຊວງການຕ່າງປະເທດ