ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ການສ້ອມແປງເສັ້ນທາງຫລວງແຫ່ງຊາດ ເລກທີ 13 ໃຕ້ ທີ່ມີໄລຍະທາງຜ່ານເມືອງປາກງື່ມ, ນະຄອນຫລວງວຽງຈັນ ຈະໃຫ້ສໍາເລັດພາຍໃນເດືອນມີນາ ປີ 2024 ນີ້, ຫລັງຈາກລັດຖະບານອະນຸມັດງົບປະມານສ້ອມແປງ 14 ຕື້ກີບ.
ໃນໂອກາດໃຫ້ສໍາພາດຕໍ່ນັກຂ່າວໜັງສືພິມວຽງຈັນໃໝ່ ເມື່ອບໍ່ດົນມານີ້, ທ່ານ ພູວຽງ ບຸດມີໄຊ, ຫົວໜ້າຫ້ອງ ການໂຍທາທິການ ແລະ ຂົນສົ່ງເມືອງປາກງື່ມ ໃຫ້ຮູ້ວ່າ: ເສັ້ນທາງຫລວງແຫ່ງຊາດ ເລກທີ 13 ໃຕ້ ທີ່ຜ່ານເມືອງປາກງື່ມ ເລີ່ມແຕ່ກິໂລແມັດທີ 37 ຈົນຮອດກິໂລແມັດທີ 66 ແມ່ນຢູ່ໃນສະພາບທີ່ເປ່ເພຫລາຍ ເນື່ອງຈາກຫລາຍສາເຫດ ເຊັ່ນ: ເສັ້ນທາງດັ່ງກ່າວໄດ້ຮັບການກໍ່ສ້າງມາແຕ່ປີ 1996 ເຮັດໃຫ້ເສັ້ນທາງເປ່ເພໄປຕາມອາຍຸການ ເນື່ອງຈາກຕາມມາດຕະຖານເຕັກນິກແລ້ວທາງປູຢາງມີອາຍຸພຽງ 15-20 ປີ ເທົ່ານັ້ນ.
ໃນໄລຍະຜ່ານມາ, ເຖີງວ່າກະຊວງໂຍທາທິການ ແລະ ຂົນສົ່ງ ໄດ້ເອົາໃຈໃສ່ສ້ອມແປງເສັ້ນທາງດັ່ງກ່າວເປັນປົກກະຕິ, ແຕ່ຍ້ອນຈໍານວນພາຫະນະໂດຍສະເພາະລົດໜັກເພີ່ມຂຶ້ນຫລາຍ, ບວກກັບສະພາບດິນຟ້າອາກາດ ເຮັດໃຫ້ມາດຕະຖານຂອງທາງບໍ່ສາມາດຮອງຮັັບນໍ້າໜັກໄດ້. ຂະນະທີ່ອົງການປົກຄອງເມືອງໄດ້ປົກລະດົມປະຊາຊົນ 9 ບ້ານທີ່ ຢູ່ລຽມຕາມເສັ້ນທາງດັ່ງກ່າວຊ່ວຍກັນປົກປັກຮັກສາເສັ້ນທາງສາຍນີ້ ໂດຍນໍາໃຊ້ທຶນຮອນຂອງບ້ານເພື່ອຊື້ດິນແດງ ແລະ ຊີມັງມາຖົມ ແຕ່ບໍ່ກຸ້ມດົນເພາະທາງຊຸດໂຊມຫລາຍ, ຂະນະທີ່ງົບປະມານຂອງລັດຖະບານເພື່ອຮັບໃຊ້ໃນການສ້ອງແປງມີຈໍາກັດ.
ຢ່າງໃດກໍຕາມ, ກະຊວງໂຍທາທິການ ແລະ ຂົນສົ່ງ ກໍຄື ລັດຖະບານ ໄດ້ອະນຸມັດງົບປະມານເພື່ອສ້ອມແປງ ເສັ້ນທາງດັ່ງກ່າວຈໍານວນ 14 ຕື້ກີບ. ປັດຈຸບັນ ບໍລິສັດຮັບເໝົາພວມເລັ່ງສ້ອມແປງຢ່າງຮີບດ່ວນ, ຄາດວ່າການສ້ອມ ແປງຈະສໍາເລັດສົມບູນພາຍໃນເດືອນມີນາປີນີ້.
ທ່ານ ພູວຽງ ບຸດມີໄຊ ໃຫ້ຮູ້ຕື່ມວ່າ: ເມືອງປາກງື່ມ ມີເສັ້ນທາງລວມຄວາມຍາວທັງໝົດ 340 ກວ່າກິໂລແມັດ, ໃນນັ້ນ ມີທາງຫລວງແຫ່ງຊາດ, ທາງຫລວງຂອງແຂວງ, ທາງຫລວງຂອງເມືອງ ແລະ ທາງໃນຊົນນະບົດ ຊຶ່ງມີການແບ່ງຂັ້ນຄຸ້ມຄອງຢ່າງຈະແຈ້ງ, ແຕ່ບັນຫາທີ່ພົບແມ່ນມີງົບປະມານຈໍາກັດ ຈິ່ງເຮັດໃຫ້ການສ້ອມແປງເສັ້ນທາງທີ່ເປ່ເພພາຍໃນເມືອງຫລາຍຈຸດພົບຄວາມຫຍຸ້ງ.
Cr: ຂ່າວອອນລາຍ, ວສລ