ທ່ານ ນາງ ອໍລະໄທ ສັນຕິຄົງຄາ, ສະມາຊິກສະພາປະຊາຊົນນະຄອນຫລວງວຽງຈັນ ປະຈໍາເມືອງໄຊທານີ ໃຫ້ສໍາພາດຕໍ່ສື່ມວນຊົນໃນໂອກາດເຂົ້າຮ່ວມກອງປະຊຸມ ສະຫຼຸບການເຄື່ອນໄຫວວຽກງານປະຈໍາປີ 2023 ແລະ ທິດທາງແຜນການປີ 2024 ຂອງສະພາປະຊາຊົນປະຈຳເຂດເລືອກຕັ້ງ ເມືອງໄຊທານີ ຈັດຂຶ້ນໃນວັນທີ 10 ພຶດສະພາ 2024 ນີ້ວ່າ: ຜ່ານການເຄື່ອນໄຫວພົບປະກັບປະຊາຊົນພາຍໃນ ເມືອງໄຊທານີ ໃນໄລຍະ 1 ປີຜ່ານມາເຫັນວ່າ ປະຊາຊົນສະເໜີຫລາຍບັນຫາເພື່ອໃຫ້ສະມາຊິກສະພາປະຊາຊົນພາຍໃນເຂດເລືອກຕັ້ງຂອງຕົນ ໄປສະເໜີຕໍ່ພາກສ່ວນກ່ຽວຂ້ອງຂອງພາກລັດຊ່ວຍແກ້ໄຂໃຫ້ໄດ້ໂດຍໄວ, ໃນນັ້ນ ພົ້ນເດັ່ນກວ່າໝູ່ແມ່ນບັນຫາການກໍ່ສ້າງ ແລະ ສ້ອມແປງເສັ້ນທາງ ເນື່ອງຈາກມີຫລາຍເສັ້ນເປ່ເພ, ຖັດມາແມ່ນບັນຫາກ່ຽວກັບໄຟຟ້າ, ທີ່ດິນ ແລະ ອື່ນໆ.
ທ່ານໃຫ້ຮູ້ຕື່ມວ່າ: ສໍາລັບຄໍາສະເໜີຂອງປະຊາຊົນທັງໝົດ ສະມາຊິກສະພາແຫ່ງຊາດນະຄອນຫລວງວຽງຈັນ ປະຈໍາເມືອງໄຊທານີ ໄດ້ນໍາໄປສະເໜີຕໍ່ພາກສ່ວນກ່ຽວຂ້ອງຂອງພາກລັດ ເພື່ອຊອກຫາວິທີແກ້ໄຂຕາມຄວາມເໝາະສົມ, ພ້ອມນີ້ ໄດ້ຕິດຕາມກວດກາການແກ້ໄຂຄໍາສະເໜີດັ່ງກ່າວ ຂອງພາກສ່ວນກ່ຽວຂ້ອງແລ້ວສະເໜີໃຫ້ປະຊາຊົນຮັບຮູ້ ໃນເວລາທີ່ໄດ້ເຄື່ອນໄຫວພົບປະກັບປະຊາຊົນ.
ອີງຕາມຂໍ້ມູນຈາກກອງປະຊຸມຄັ້ງນີ້ ໃຫ້ຮູ້ວ່າ: 1 ປີຜ່ານມາ ຄະນະສະມາຊິກສະພາປະຊາຊົນປະຊາຊົນ ເມືອງໄຊທານີ ໄດ້ຮັບຄຳສະເໜີຮ້ອງທຸກຈາກພໍ່ແມ່ປະຊາຊົນ 18 ເລື່ອງ, ໃນນີ້ ແກ້ໄຂສໍາເລັດ 11 ເລື່ອງ ກຳລັງແກ້ໄຂ 7 ເລື່ອງ ພົວພັນຫາຂໍ້ຂັດແຍ່ງທີ່ດິນໄດ້ 8 ຄໍາສະເໜີ, ພ້ອມນີ້ ໄດ້ຕິດຕາມກວດກາການຈັດຕັ້ງປະຕິບັດແຜນການລົງທຶນຂອງລັດ ແລະ ແຜນຈັດເກັບງົບປະມານ ທີ່ນະຄອນຫຼວງວຽງຈັນມອບໃຫ້ເມືອງຈັດຕັ້ງປະຕິບັດມີ 47 ໂຄງການ ມູນຄ່າ 183 ຕື້ກວ່າກີບ ແຜນຊໍາລະໜີ້ສິນໂຄງ ການລົງທຶນຂອງລັດ 41 ໂຄງການ ມູນຄ່າ 172 ຕື້ກວ່າກີບ, ໃນນີ້ ມີໂຄງການສືບຕໍ່ 6 ໂຄງການ ມູນຄ່າ 10 ຕື້ກວ່າກີບ ຕິດຕາມການຈັດເກັບລາຍຮັບເຂົ້າງົບປະມານປະຈຳປີ 2023 ຜ່ານການຈັດຕັ້ງປະຕິບັດລາຍຮັບໄດ້ 63,88 ຕື້ກີບ ເທົ່າກັບ 123,69% ໃນນີ້ ຮັບຈາກສ່ວຍສາອາກອນ 61,98 ຕື້ກີບ ເທົ່າ ກັບ 122,25% ຂອງແຜນການປີ ຮັບຈາກຊັບສິນຂອງລັດ 1,906 ຕື້ກີບ ເທົ່າກັບ 200,66% ຂອງແຜນການປີ.
