ເມື່ອບໍ່ດົນມານີ້, ທ່ານ ອາໂນສັກ ແພງທິມມະວົງ ຮອງຫົວໜ້າກົມພັດທະຊາຊົນນະບົດກະຊວງກະສິກຳ ແລະ ປ່າໄມ້ ໄດ້ກ່າວຕໍ່ສື່ມວນຊົນ CMG ວ່າ, ການພັດທະ ນາຊົນນະບົດໃຫ້ຫຼຸດພົ້ນອອກຈາກຄວາມທຸກຍາກຢ່າງມີຈຸດສຸມຂອງສປ ຈີນ ໄດ້ເປັນຮຽນອັນປະເສີດໃຫ້ແກ່ສປປ ລາວ, ເຊິ່ງພັກ ແລະ ລັດຖະບານສປປ ລາວ ກໍໄດ້ຖືເອົາວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກເປັນວຽກບູລິມະສິດທໍາອິດ ພ້ອມທັງກໍານົດວຽກຈຸດສຸມໃນການຫຼຸດພົ້ນອອກຈາກຄວາມທຸກຍາກຢູ່ສປປ ລາວ.
ທ່ານ ຮອງຫົວໜ້າກົມພັດທະນາຊົນນະບົດ ໃຫ້ຮູ້ວ່າ: ປະຈຸບັນ, ລັດຖະບານໄດ້ອອກຂໍ້ຕົກເລກທີ 72/ນຍ ເຊິ່ງໄດ້ກໍານົດເອົາທັງໝົດ 45 ຈຸດສຸມ ເພື່ອເປັນບ່ອນພັດທະນາຕົວແບບ ແລະ ຈະຂະຫຍາຍໄປໃສ່ຈຸດອື່ນໆໃນຂອບເຂດທົ່ວປະເທດ. ນີ້ແມ່ນບົດຮຽນທີ່ຖອດຖອນໄດ້ຈາກສປ ຈີນ.ໃນນັ້ນ,ເລັ່ງໃສ່ພັດທະນາເຂດທີ່ພັກ ແລະ ລັດຖະບານໃຫ້ຄວາມສົນໃຈ ຖືເປັນບູລິມະສິດແມ່ນເຂດທີ່ໝັ້ນຂອງການປະຕິວັດທີ່ມີຜົນງານໃນການຕໍ່ສູ້ກູ້ຊາດໃນເມື່ອກ່ອນ.
ທ່ານ ຮອງຫົວໜ້ກົມພັດທະນາຊົນນະບົດ ໃຫ້ຮູ້ອີກວ່າ: ປະເທດລາວ ມີຊາວກະສິກອນເກືອບ 70 % ທີ່ເປັນກະດູກສັນຫຼັງຂອງປະເທດຊາດ.ໃນນັ້ນ, ປະຊາຊົນທີ່ຢູ່ເຂດຊົນນະບົດເຂດຫ່າງໄກສອກຫຼີກສວ່ນຫຼາຍຍັງຍຶດອາຊີບເປັນຊາວກະສິກອນ ຍ້ອນແນວນັ້ນ, ພວກເຮົາຈິ່ງສຸມໃສ່ວຽກງານກະສິກໍາ ຕາມແຜນຍຸດດທະສາດໃນການພັດທະນາກະສິກໍາຄືຄໍ້າປະກັນດ້ານສະບຽງອາຫານ, ນໍາໃຊ້ກົນຈັກເຂົ້າໃນວຽກງານກະສິກໍາ ແລະ ແປຮູບ ຜະລິດຕະພັນກະສິກໍາ ສ້າງມູນຄ່າເພີ່ມໃຫ້ຜະລິດຕະພັນກະສິກໍາສູງຂຶ້ນ ເພື່ອເຮັດໃຫ້ຊາວກະສິກອນມີອາຊີບທີ່ ໝັ້ນຄົງ ແລະ ມີລາຍຮັບເພີ່ມຂຶ້ນ, ເຊິ່ງປະຈຸບັນການປູກເຂົ້າເປັນສິນຄ້າຢູ່ທົ່ງຮາບແຂວງສະຫວັນນະເຂດແມ່ນມີລັກສະນະຄົບວົງຈອນຄືນໍາໃຊ້ກົນຈັກທີ່ທັນສະໄໝ,ແນວພັນທີ່ດີໃຫ້ຜົນຜະ ລິດສູງ ໃນການເກັບກ່ຽວກໍເປັນລະບົບ,ມີໂຮງສີເຂົ້າທີ່ທັນສະໄໝ ແລະ ສົ່ງໄປຂາຍທີ່ຕະຫຼາດຈີນ ແລະ ບັນດາປະເທດອາຊຽນ.
ທ່ານ ອາໂນສັກ ແພງທິມມະວົງ ໃຫ້ຮູ້ຕື່ມວ່າ: ໃນ ປີ 2023 ສາມາດແກ້ໄຂຄວາມທຸກຍາກໃຫ້ພໍ່ແມ່ປະຊາຊົນໄດ້ປະມານ 1 ລ້ານກວ່າຄອບຄົວ, ກວມປະມານ 83% ເຊິ່ງຍັງເຫຼືອຄອບຄົວທຸກຍາກ ປະມານ 16 ກວ່າສ່ວນຮ້ອຍ ທີ່ພວກເຮົາຈະຕ້ອງສຸມທຶນຮອນໃສ່ ເພື່ອແກ້ໄຂຄວາມທຸກຍາກໃຫ້ຫຼຸດລົງ.
ຂ່າວ: CMG FM93
