ການອະນຸລັກສິ່ງແວດລ້ອມທາງລະບົບນິເວດວິທະຍາຂອງຈີນ ໄດ້ຮັບຜົນສໍາເລັດທີ່ໂດດເດັ່ນ

ໃນຫລາຍປີຜ່ານມານີ້, ພາຍໃຕ້ແນວຄວາມຄິດວ່າດ້ວຍອາລິຍະທໍາທາງລະບົບນິເວດວິທະຍາຂອງ ທ່ານ ສີ ຈິ້ງຜິງ, ປະທານປະເທດຈີນ, ພື້ນທີ່ຕ່າງໆ ໃນທົ່ວປະເທດຈີນ ໄດ້ຮັບການພັດທະນາແບບສີຂຽວ ແລະ ການອະນຸລັກສິ່ງ ແວດລ້ອມທາງນິເວດວິທະຍາໄດ້ຮັບຜົນສໍາເລັດຢ່າງຕໍ່ເນື່ອງ. ສິ່ງທີ່ປະກົດໃຫ້ເຫັນຢ່າງໂດດເດັ່ນແມ່ນການເປັນເຈົ້າພາບຈັດງານກິລາໂອແລັມປິກປັກກິ່ງລະດູໜາວ ຄັ້ງທີ 24 ເຊີ່ງຈັດຂຶ້ນໃນເດືອນກຸມພາ ປີ 2022  ຜ່ານມານີ້ ຄຸນນະພາບອາ ກາດຢູ່ນະຄອນຫລວງປັກກິ່ງແມ່ນຢູ່ໃນເກນມາດຕະຖານທີ່ດີທີ່ສຸດ ແລະ ໄດ້ຮັບການຍ້ອງຍໍຊົມເຊີຍຈາກສັງຄົມທັງພາຍໃນ ແລະ ຕ່າງປະເທດເປັນຢ່າງດີ.

         ງານກິລາໂອແລັມປິກລະດູໜາວປັກກິ່ງ 2022 ເປັນສິ່ງທີ່ສະທ້ອນໃຫ້ເຫັນເຖີງຄວາມພະຍາຍາມຢ່າງຕໍ່ເນື່ອງຂອງຈີນໃນການແກ້ໄຂບັນຫາມົນລະພິດໃນໄລຍະລະດູໃບໄມ້ຫລົ່ນ ແລະ ລະດູໜາວຢູ່ພາກເໜືອຂອງຈີນທີ່ເຄີຍເກີດໝອກຄວັນຫລາຍຄັ້ງ. ນັບແຕ່ປີ 2012 ເປັນຕົ້ນມາ ລັດຖະບານຈີນ ໄດ້ນໍາໃຊ້ງົບປະມານຢ່າງຫລວງຫລາຍເຂົ້າໃນການແກ້ໄຂບັນຫາທາງລະບົບນິເວດວິທະຍາ ເພື່ອດໍາເນີນມາດຕະການຕ່າງໆ ໃນການແກ້ໄຂບັນຫາມົນລະພິດໃຫ້ໄດ້ດ້ວຍດີຕະຫລອດໄປ.

ເພື່ອແລກມາໃຫ້ໄດ້ເຊີ່ງທ້ອງຟ້າສີຄາມ ຢູ່ພາກເໜືອຂອງຈີນມີຫລາຍກວ່າ 20 ລ້ານຄົວເຮືອນໃນຊົນນະບົດໄດ້ຢຸດຕິວິທີການເຮັດຄວາມຮ້ອນດ້ວຍການຈູດໄຟ, ໃຊ້ໄຟຟ້າ ຫລື ແກັສທໍາມະຊາດແທນຖ່ານຫີນ, ຫລຸດການປ່ອຍສານ ພິດເຮືອນແກ້ວຈາກອຸດສາຫະກໍາ, ການຜະລິດໄຟຟ້າຖ່ານຫີນ, ການຫລອມເຫລັກ ແລະ ອຸດສາຫະກໍາອື່ນໆ,  ດໍາເນີນການປັບປຸງເພື່ອໃຫ້ປ່ອຍສານພິດຢູ່ໃນລະດັບຕໍ່າເປັນພິເສດ, ສັ່ງປິດບັນດາວິສາຫະກິດທີ່ເຮັດໃຫ້ເກີດມົນລະພິດ ແລະ ການຄວບຄຸມມົນລະພິດທີ່ບໍ່ໄດ້ມາດຕະຖານຕາມນະໂຍບາຍທ້ອງຖິ່ນ, ດໍາເນີນການຫລຸດຜ່ອນມົນລະພິດທາງລົດຍົນ, ຍົກລະດັບຄຸນນະພາບນໍ້າມັນ ແລະ ການປ່ອຍຄວັນ, ຫັນມານໍາໃຊ້ລົດພະລັງງານໃໝ່ໃຫ້ຫລາຍຂຶ້ນ ເຊີ່ງມາຮອດປັດຈຸ ບັນ ການນໍາໃຊ້ລົດພະລັງງານໃໝ່ຂອງຈີນຈັດຢູ່ອັນດັບຕົ້ນໆ ຂອງໂລກ.

ຜ່ານການແກ້ໄຂບັນຫາດ້ານສິ່ງແວດລ້ອມມາເປັນເວລາຫລາຍປີ ຈົນມາຮອດປີ 2021 ຜ່ານມາ ຄຸນນະພາບອາກາດຢູ່ນະຄອນຫລວງປັກກິ່ງ ໄດ້ມາດຕະຖານຢ່າງຮອບດ້ານເປັນຄັ້ງທໍາອິດ ເຊີ່ງຖືເປັນການບັນລຸເປົ້າໝາຍຢ່າງໂດດເດັ່ນ  ແລະ ເຮັດໃຫ້ທ້ອງຟ້າສີຄາມທີ່ມີເມກສີຂາວຄ່ອຍໆ ກາຍເປັນເປັນເລື່ອງປົກກະຕິແລ້ວ. ການປ່ຽນແປງນີ້ ບໍ່ພຽງແຕ່ເກີດຂຶ້ນຢູ່ນະຄອນຫລວງປັກກິ່ງເທົ່ານັ້ນ ແຕ່ຍັງລວມເຖີງທຸກພື້ນທີ່ໃນທົ່ວປະເທດ.

ອີງຕາມຂໍ້ມູນຈາກ ກະຊວງ ນິເວດວິທະຍາ ແລະ ສິ່ງແວດລ້ອມຂອງຈີນ ໃຫ້ຮູ້ວ່າ: ນັບແຕ່ປີ 2017 ຫາ ປີ 2021 ຄວາມເຂັ້ມຂຸ້ນຂອງຝຸ່ນລະອອງຂະໜາດນ້ອຍໃນເມືອງຕ່າງໆ ໄດ້ຫລຸດລົງ 25%,ອັດຕາສ່ວນຂອງວັນທີ່ຄຸນນະພາບອາກາດດີຫລາຍເພີ່ມຂຶ້ນ 4.9% ແລະ ຈໍານວນວັນມົນລະພິດໜັກຫລຸດລົງ 40%.

ໃນປີ 2021 ຄຸນນະພາບນໍ້າໂດຍລວມໃນເຂດທະເລສາບໄປ໋ຫຍາງຕ້ຽນ ທີ່ຂຶ້ນຊື່ເປັນ “ໄຂ່ມຸກແຫ່ງພາກເໜືອຂອງຈີນ” ຢູ່ໃນລະດັບ III ແລະ ດັດສະນີສານພິດທີ່ສໍາຄັນຫລຸດລົງຢ່າງຫລວງຫລາຍ ເຮັດໃຫ້ທະເລດັ່ງກ່າວໄດ້ຍົກລະດັບຂຶ້ນເປັນໜຶ່ງໃນທະເລສາບທີ່ດີລະດັບຊາດແລ້ວ.

ຫລັງຈາກການຈັດຕັ້ງເຂດໃໝ່ສົງອັນໃນປີ 2017, ໄປ໋ຫຍາງຕ້ຽນ ໄດ້ຮັບການບໍລິຫານຈັດການດ້ານລະບົບນິ ເວດວິທະຍາ ໂດຍການຍົກລະດັບຂີດຄວາມສາມາດໃນການບໍາບັດນໍ້າເປື້ອນ, ຫລຸດຜ່ອນມົນລະພິດທາງດ້ານກະສິກໍາ, ດໍາເນີນການທາງດ້ານລະບົບນິເວດວິທະຍາທີ່ມີບົດບາດເປັນໝາກໄຂ່ຫລັງຂອງພາກເໜືອ ໄດ້ຮັບການເລັ່ງຟື້ນຟູ ແລະ ຈັດຕັ້ງປະຕິບັດ ເຮັດໃຫ້ຄຸນນະພາບນໍ້າດີຂຶ້ນຢ່າງຕໍ່ເນື່ອງ ແລະ ຄວາມຫລາກຫລາຍທາງດ້ານຊີວະນາໆ ພັນເພີ່ມຂຶ້ນຢ່າງຊັດເຈນ.

ໃນວັນທີ  22 ກຸມພາ ປີ 2022 ເຮືອບັນທຸສິນຄ້າພະລັງງານໄຟຟ້າຂະໜາດ 3.000 ໂຕນລໍາທໍາອິດໃນເຂດລຸ່ມແມ່ນໍ້າແຢງຊີໄດ້ອອກເດີນທາງເປັນຄັ້ງທໍາອິດໃນເມືອງໜານຈິງ ເຊີ່ງເປັນເຮືອທີ່ໄດ້ດັດແປງຈາກເຮືອບັນທຸກສິນຄ້າພະລັງງານນໍ້າມັນ ໂດຍໃຊ້ພະລັງງານໄຟຟ້າເປັນແຫລ່ງພະລັງງານນດຽວຂອງເຮືອທີ່ບັນລຸການປ່ອຍກາກບອນເປັນສູນ, ສຽງລົບກວນຕໍ່າ ແລະ ບໍ່ມີມົນລະພິດ.

ກະຊວງນິເວດວິທະຍາ ແລະ ສິ່ງແວດລ້ອມຂອງຈີນ ຍັງລະບຸຕື່ມວ່າ: ໃນປີ 2021 ຜ່ານມາ ຄຸນນະພາບສິ່ງ ແວດລ້ອມທາງນິເວດວິທະຍາດ້ານນໍ້າທົ່ວປະເທດຈີນສືບຕໍ່ຮັກສາທ່າອ່ຽງທີ່ດີຂຶ້ນ ຫລື ໄດ້ຮັບການປັບປຸງດີຂຶ້ນຢ່າງຕໍ່ເນື່ອງ ເຊີ່ງຄຸນນະພາບນໍ້າໃນແມ່ນໍ້າສາຍຫລັກຂອງລຸ່ມແມ່ນໍ້າແຢງຊີເຖີງລະດັບ II ຕິດຕໍ່ກັນເປັນເວລາ 2 ປີແລ້ວ.

ຈີນ ໃຫ້ຄວາມສໍາຄັນເປັນພິເສດຕໍ່ການປູກຕົ້ນໄມ້ ແລະ ເພີ່ມພື້ນທີ່ສີຂຽວ ເຮັດໃຫ້ອັດຕາການປົກຄຸມຂອງປ່າໄມ້ໃນປະເທດຈີນເພີ່ມຂຶ້ນຈາກ 12% ໃນຊຸມປີ 1980 ມາເປັນ 23.04% ໃນປັດຈຸບັນນີ້, ຊັບພະຍາກອນປ່າໄມ້ໄດ້ເພີ່ມຂຶ້ນຢ່າງຕໍ່ເນື່ອງ ເຮັດໃຫ້ສະພາບແວດລ້ອມທີ່ຢູ່ອາໃສໃນຕົວເມືອງ ແລະ ຊົນນະບົດໄດ້ຮັບການປັບປຸງດີຂຶ້ນຢ່າງຕໍ່ເນື່ອງ ເຮັດໃຫ້ສາມາດເວົ້າໄດ້ວ່າ ຈີນ ໄດ້ບັນລຸການປ່ຽນແປງຈາກສີເຫລືອງສູ່ສີຂຽວ ແລະ ຈາກສີຂຽວສູ່ຄວາມງົດງາມ.

ບໍ່ພຽງແຕ່ເທົ່ານີ້, ໃນໄລຍະບໍ່ເທົ່າໃດປີມານີ້ ຈີນຍັງໄດ້ຍົກລະດັບການຄຸ້ມຄອງລະບົບນິເວດຢ່າງຕໍ່ເນື່ຶອງ ດ້ວຍການສ້າງຕັ້ງອຸທິຍານແຫ່ງຊາດ ເຊັ່ນ: ອຸທິຍານແຫ່ງຊາດຊານຈຽງຢວນ, ອຸທິຍານແຫ່ງຊາດໝີແພນດ້າ, ອຸທິຍານແຫ່ງຊາດເສືອດາວພາກຕາເວັນອອກສ່ຽງເໜືອ, ອຸທິຍານແຫ່ງຊາດປ່າຝົນເຂດຮ້ອນໄຫຫລໍາ ແລະ ອຸທິຍານແຫ່ງຊາດພູເຂົາອູ່ອີ ມີເນື້ອທີ່ລວມກັນເຖີງ 230.000 ກິໂລລຕາແມັດ, ກວມເອົາ 30% ຂອງພັນພືດ ແລະ ສັດປ່າທີ່ປະເທດເທີງບົກໃຫ້ການອະນຸລັກ. ພື້ນທີ່ເສັ້ນສີແດງໃນການຄຸ້ມຄອງລະບົບນິເວດວິທະຍາທີ່ຈີນກໍານົດໃນເບື້ອງຕົ້ນມີອັດຕາສ່ວນກວມເອົາຢ່າງໜ້ອຍ 25% ຂອງພື້ນທີ່ທາງບົກໃນທົ່ວປະເທດ ແລະ ຈັດຕັ້ງພື້ນທີ່ອະນຸລັກທໍາມະຊາດຕ່າງໆ ເກືອບ 10.000 ແຫ່ງໃນທົ່ວປະເທດ.