ເວລາ 10:22 ໂມງວັນທີ 18 ມິຖຸນາ, ຂະບວນລົດໄຟຂົນສົ່ງສິນຄ້າສາກົນ “ສາຍດ່ວນແມ່ນ້ຳລ້ານຊ້າງ-ແມ່ນ້ຳຂອງ” ທີ່ອອກເດີນທາງຈາກນະຄອນຫຼວງວຽງຈັນລາວ, ເຊິ່ງຂົນສົ່ງໝາກຖົ່ວລຽນໄທ, ໝາກມັງຄຸດ ແລະ ໝາກໄມ້ອື່ນໆ ໄດ້ມາຮອດດ່ານທາງລົດໄຟບໍ່ຫານ.
ໃນຕອນບ່າຍວັນດຽວກັນ, ພາຍຫຼັງສຳເລັດຂະບວນການຜ່ານພາສີແລ້ວ, ລົດໄຟນີ້ໄດ້ເດີນທາງໄປຕາມທາງລົດໄຟ ລາວ -ຈີນ ແລະ ໄປຮອດສະຖານີສູນຕູ້ຄອນເທນເນີ ວັງໂຈ່ວຢິງຕາເວັນຕົກຄຸນໝິງ. ຢູ່ທີ່ນີ້, ໝາກໄມ້ຈາກອາຊີຕາເວັນອອກສຽງໃຕ້ ຊຸດນີ້ຈະຖືກເກັບ ແລະ ຈຳໜ່າຍຢູ່ນະຄອນຄຸນໝິງ,ຫຼື ມັນຈະຖືກແຈກຢາຍ ແລະ ຂົນສົ່ງໄປຕະຫຼາດໝາກໄມ້ໃຫຍ່ໃນປະເທດຈີນໂດຍສາຍການຂົນສົ່ງສິນຄ້າເຊັ່ນ: ເສັ້ນທາງລົດໄຟ “ສາຍລ້ານ ຊ້າງ-ແມ່ນ້ຳຂອງ·ຊຽງໄຮ-ຢຸນນານ” ແລະ “ສາຍດ່ວນແມ່ນ້ຳລ້ານ ຊ້າງ-ແມ່ນ້ຳຂອງເຊີນຕູ-ເອີຣົບ”.
“ນັບຕັ້ງແຕ່ການເປີດນຳໃຊ້ຂອງທາງລົດໄຟລາວ-ຈີນ, ໝາກໄມ້ສົດຈາກບັນດາປະເທດອາຊີຕາເວັນອອກສຽງໃຕ້ເຊັ່ນ, ລາວ ແລະ ໄທ ໄດ້ໃຊ້ປະໂຫຍດຈາກຄວາມສະດວກສະບາຍໃນການຜ່ານພາສີ, ການຂົນສົ່ງສິນຄ້າສາກົນຂະໜາດໃຫຍ່ຂອງທາງລົດໄຟລາວ -ຈີນ, ແລະ “ສາຍດ່ວນແມ່ນ້ຳລ້ານຊ້າງ-ແມ່ນ້ຳຂອງ” ໃຫ້ຕະຫຼາດພາຍໃນປະເທດຂອງຈີນໄດ້ຮັບໝາກໄມ້ຂອງອາຊີຕາເວັນອອກສຽງໃຕ້ ຈຳນວນຫຼວງຫຼາຍທີ່ມີຄຸນນະພາບສູງ, ລາຄາຕໍ່າ.” ກ່າວໂດຍ ທ່ານ ໂຈວໝີງໂປ ຜູ້ອຳນວຍການສະຖານີບໍ່ຫານ ຂະບວນພູເອີຂອງກຸ່ມບໍລິສັດລົດໄຟຈີນຄຸນໝິງ.
ຕາມສະຖິຕິ, ນັບແຕ່ຕົ້ນເດືອນມັງກອນຫາທ້າຍເດືອນພຶດສະພາ ປິ 2024, ການນຳເຂົ້າ ແລະ ສົ່ງອອກໝາກໄມ້, ຜັກ, ດອກໄມ້ສົດ ແລະ ສິນຄ້າອື່ນໆ ຜ່ານທາງລົດໄຟລາວ-ຈີນຢູ່ພາຍໃຕ້ການກວດກາຂອງດ່ານພາສີຈີນ ໄດ້ບັນລຸ 64.800 ໂຕນ. ເພີ່ມຂຶ້ນ 3,1 ເທົ່າເມື່ອທຽບໃສ່ໃນໄລຍະປີກາຍ. ໃນນັ້ນ, ນຳເຂົ້າໝາກໄມ້ມີ 58.900 ໂຕນ, ເພີ່ມຂຶ້ນ 2,9 ເທົ່າເມື່ອທຽບໃສ່ໃນໄລຍະປີກາຍ, ນຳເຂົ້າໝາກໄມ້ສົດມີ 41.300 ໂຕນ, ເພີ່ມຂຶ້ນ 2,4 ເທົ່າເມື່ອທຽບໃສ່ໄລຍະດຽວກັນຂອງປີກາຍ.
ທີ່ມາ: ວາລະສານຈໍາປາ
