ການຮ່ວມມືດ້ານການທ່ອງທ່ຽວລາວ-ອົງການທ່ອງທ່ຽວໂລກ

ວັນທີ 24 ມັງກອນ 2024, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດຖະນະທຳ ແລະ ທ່ອງທ່ຽວ ພົບປະກັບ ທ່ານ ແຮລີຫວັງ ຫົວໜ້າປະຈຳພາກ ພື້ນອາຊີປາ ຊຊີຟິກ, ອົງການທ່ອງທ່ຽວໂລກ ກ່ຽວກັບການຮ່ວມມືດ້ານການທ່ອງທ່ຽວ ລາວ ແລະ ອົງການທ່ອງທ່ຽວໂລກ ໃນໂອກາດເຂົ້າຮ່ວມກອງປະຊຸມ ລັດຖະມົນຕີທ່ອງທ່ຽວອາ ຊຽນ 2024 ທີ່ນະຄອນຫລວງວຽງຈັນ ລະຫວ່າງ ວັນທີ 22-27 ມັງ ກອນ 2024 ນີ້.

ທ່ານ ນາງ ສວນສະຫວັນ ວິຍະເກດ ກ່າວວ່າ: ສປປ ລາວ ໄດ້ເປັນເຈົ້າການຮ່ວມກັບ ອົງການທ່ອງທ່ຽວ ໂລກ ຈັດສໍາມະນາ ສຳລັບບັນດາປະເທດ ອະນຸພາກພື້ນລຸ່ມແມ່ນໍ້າຂອງ ຢູ່ແຂວງຈຳປາສັກ ໃນລະຫວ່າງວັນທີ 19-21 ກຸມພາ 2019 ພາຍໃຕ້ຫົວຂໍ້: “ການພັດທະນາການທ່ອງທ່ຽວແບບຍືນຍົງ ແລະ ການປົກປັກຮັກສາຊິວະ ນາໆພັນ” ຊຶ່ງມີຜູ້ເຂົ້ຮ່ວມ ຈາກປະເທດ ກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ຈີນ. ໃນປີ 2020 ອົງການທ່ອງ ທ່ຽວໂລກ ກໍໄດ້ສືບຕໍ່ໃຫ້ການສະໜັບສະໜູນບັນດາປະເທດ ສະມາຊິກ ພາກພື້ນອາຊຽນ ແລະ ສາກົນ ຈັດຕັ້ງກອງປະຊຸມ, ສໍາມະນາ, ຝຶກອົບຮົມ ແລະ ແລກປ່ຽນບົດຮຽນ ພາຍໃຕ້ຫົວຂໍ້ຕ່າງໆ ເຊັ່ນ: ນະໂຍບາຍດ້ານການທ່ອງທ່ຽວ; ການພັດທະນາ

ການທ່ອງທ່ຽວໃນເຂດຊົນນະບົດ; ການທ່ອງທ່ຽວແບບອະນຸລັກ ແລະ ການທ່ອງ ທ່ຽວໃນເຂດຊົນນະບົດ; ການທ່ອງທ່ຽວ ແລະ ເສດຖະກິດຂອງໂລກ ແນໃສ່ການປະກອບສ່ວນເຂົ້າໃນການພັດທະ ນາວຽກງານການທ່ອງທ່ຽວແບບຍືນຍົງ ຂອງອົງການສະຫະປະຊາຊາດ ທີ່ມີເປົ້າໝາຍຄື: ສົ່ງເສີມການຂະຫຍາຍຕົວທາງດ້ານເສດຖະກິດ ທີ່ຕໍ່ເນື່ອງ ທົ່ວເຖິງ ແລະ ຍືນຍົງ, ການມີວຽກເຮັດງານທຳທີ່ມີປະສິດທິຜົນ ແລະ ເຕັມສ່ວນ ແລະ ວຽກ ງານທີ່ມີກຽດສຳລັບໝົດທຸກຄົນ, ຮັບປະກັນຮູບແບບການອຸປະໂພກ-ບໍລິໂພກ ແລະ ການຜະລິດໃຫ້ມີຄວາມຍືນຍົງ, ອະນຸລັກ ແລະ ຊົມໃຊ້ມະຫາສະໝຸດ, ທະເລ ແລະ ຊັບພະຍາກອນທາງທະເລຢ່າງຍືນຍົງ ເພື່ອການພັດທະນາແບບຍືນຍົງ.

ພ້ອມນີ້, ກອງເລຂາອາຊຽນສະເໜີໃຫ້ ສປປ ລາວ ໃນນາມເປັນປະທານກອງປະຊຸມ ລັດຖະມົນຕີທ່ອງທ່ຽວອາຊຽນ ໃນຄັ້ງນີ້, ເພື່ອຂົນຂວາຍການຮ່ວມມືຈາກອົງການທ່ອງທ່ຽວໂລກ ຄື: ຂໍຝຶກອົບຮົມການເກັບກຳຂໍ້ມູນສະຖິຕິນັກທ່ອງທ່ຽວພາຍໃນ ໃຫ້ແກ່ບັນດາປະເທດ ສະມາຊິກ UNWTO ສໍາລັບປະເທດ CLMV ຫລື ASEAN, ຝຶກອົບຮົມກ່ຽວກັບການພັດທະນາການທ່ອງ ທ່ຽວ ແລະ ການຫັນເປັນທັນສະໄໝ ເພື່ອການທ່ອງທ່ຽວທີ່ຍືນຍົງ ໃນໄລຍະ ສປປ ລາວ ເປັນປະທານອາຊຽນ ແລະ ເປີດປີທ່ອງທ່ຽວລາວ 2024.

ອິງຕາມສະຖິຕິ, ນັກທ່ອງທ່ຽວສາກົນ ເຂົ້າມາທ່ອງທ່ຽວ ສປປ ລາວ ໃນ 11 ເດືອນ ປີ 2023 ມີ 3.088.323 ເທື່ອຄົນ. ໃນນັ້ນ, ພາກພື້ນອາຊຽນມີ 2.036.805 ເທື່ອຄົນ, ພາກພື້ນອາຊີປາຊີຟິກ 784.80 ເທື່ອຄົນ, ພາກພື້ນເອີຣົບ 179.137 ເທື່ອຄົນ, ພາກພື້ນອາເມລິກາ 76.780 ເທື່ອຄົນ, ພາກພື້ນອາຝຣິກາ ແລະ ຕາເວັນອອກກາງມີ 10.797 ເທື່ອຄົນ.

ພາບ: ອ່າຍຄຳ