ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະຖາບັນການເມືອງການປົກຄອງແຫ່ງຊາດລາວ(ສມປຊ) ຮ່ວມກັບວິທະຍຸໂທລະພາບສູນກາງຈີນ CMG ປະຈໍາລາວ ໄດ້ຈັດສາຍຮູບເງົາດີເດັ່ນລາວ-ຈີນ ຂຶ້ນໃນວັນທີ 2 ພຶດສະພານີ້, ທີ່ ສມປຊ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຈີນ ຄົບຮອບ 62 ປີ ( 25 ເມສາ 1961 – 25 ເມສາ 2023 ) ໂດຍການເຂົ້າຮ່ວມຂອງທ່ານ ນາງ ຄໍາຫຼ້າ ແກ້ວອຸ່ນຄໍາ ຮອງຫົວໜ້າສະຖາບັນ ສມປຊ, ທ່ານ ນາງ ແສງແກ້ວ ຫົວໜ້າວິທະຍຸໂທລະພາບສູນກາງຈີນ ປະຈໍາລາວ ພ້ອມດ້ວຍຄູອາຈານ, ນັກສຶກສາຈໍານວນ 300 ກວ່າທ່ານເຂົ້າຮ່ວມຊົມ.
ໃນໂອກາດນີ້, ທ່ານ ນາງ ແສງແກ້ວ ຫົວໜ້າວິທະຍຸໂທລະພາບສູນກາງຈີນປະຈໍາລາວ ໄດ້ກ່າວວ່າ: ຮູບເງົາທີ່ນຳມາສາຍໃນມື້ນີ້ມີ 2 ເລື່ອງທີ່ພາກເປັນພາສາລາວ ເຊິ່ງຜະລິດໂດຍວິທະຍຸໂທລະພາບສູນກາງຈີນຫຼື CMG ເລື່ອງທຳອິດມີຊື່ວ່າ “ຄຽງຂ້າງກັນ” ເປັນຮູບເງົາສາລະຄະດີເລື່ອງສັ້ນທີ່ເລົ່າເຖິງຄວາມຮັກແພງ ແລະໄມຕີຈິດມິດຕະພາບອັນດີງາມລະຫວ່າງສອງອ້າຍນ້ອງທີ່ເປັນຄູສອນກັບລູກສິດໃນການກໍ່ສ້າງເສັ້ນທາງລົດໄຟລາວ-ຈີນສາຍທາງແຫ່ງມິດຕະພາບ ແລະຮູບເງົາທີສອງເລື່ອງ: “ຂ້າມແມ່ນ້ຳຢ່າລູ້ໄປ” ເຊິ່ງແມ່ນຮູບເງົາທີ່ສະທ້ອນໃຫ້ເຫັນເຖິງນໍ້າໃຈສາກົນກໍາມະຊີບຂອງກອງທັບ ແລະປະຊາຊົນຈີນ ເພື່ອຊ່ວຍເຫຼືອ ສປປ ເກົາຫຼີ ໃນການຕໍ່ສູ້ປົດປ່ອຍຊາດ, ສະແດງໃຫ້ເຫັນທະຫານຈີນເພື່ອປົກປ້ອງສັນຕິພາບ ຄວາມຍຸຕິທຳ ປົກປ້ອງບ້ານເກີດເມືອງນອນ ແລະປະເທດຊາດ ບໍ່ຢ້ານນອງເລືອດ ແລະການເສຍສະຫຼະຊີວິດຂອງຕົນ, ທັງສະແດງໃຫ້ເຫັນລັດທິສາກົນກຳມະຊີບຂອງຄົນຈີນທີ່ບໍ່ຢ້ານມະຫາອຳນາດ, ຮ່ວມມືກັບຜູ້ທີ່ຮູ້ໃຈກັນແລະເດີນຕາມເສັ້ນທາງດຽວກັນໄປຕໍ່ຕ້ານກັບຜູ້ຮຸກຮານ. ຮູບເງົາສອງເລື່ອງນີ້ເປັນການສ່ອງແສງໃຫ້ເຫັນຮູບປະທຳຂອງມິດຕະພາບລາວ-ຈີນ, ຈີນ-ລາວ.
ພາຍຫລັງຊົມຮູບເງົາ, ທ່ານ ນາງ ຄໍາຫຼ້າ ແກ້ວອຸ່ນຄໍາ ຮອງຫົວໜ້າສະຖາບັນ ສມປຊ ກໍໄດ້ຕີລາຄາສູງການພົວພັນມິດຕະພາບລະຫວ່າງສອງຊາດລາວ-ຈີນ ວ່າແມ່ນການພົວພັນທີຢູ່ໃນໄລຍະດີທີ່ສຸດ ແລະ ຂອບໃຈມາຍັງ CMG ທີ່ໄດ້ນໍາເອົາຮູບເງົາທັງ 2 ເລື່ອງມາສາຍໃຫ້ຄູອາຈານ ແລະນັກສຶກສາໄດ້ຮັບຊົມ ເຊິ່ງເປັນຮູບເງົາທີ່ມີຄຸນຄ່າ ແລະສະທ້ອນໃຫ້ເຫັນວັດທະນະທໍາຈີນ ເພື່ອໃຫ້ປະຊາຊົນລາວເຂົ້າໃຈປະເທດຈີນຫຼາຍຂຶ້ນ ເຊິ່ງເປັນການປະກອບສ່ວນເຂົ້າໃນວຽກງານການຮ່ວມມືລາວ-ຈີນ ແລະການເປັນຄູ່ຮ່ວມຊະຕາກໍາລາວ-ຈີນຢ່າງແທ້ຈິງ.