ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ຕ້ອນ ຮັບ ທ່ານ ນາງ ຟລໍຣັອງສ ຊັອງບລັອງ-ຣິສແລກ (Florene Jeanblan-Risler) ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງຝຣັ່ງ ປະຈໍາ ສປປ ລາວ ທີ່ເຂົ້າຢ້ຽມຊົມເຊີຍ ເນື່ອງໃນໂອກາດທີ່ທ່ານ ໄດ້ຮັບໜ້າທີ່ໃໝ່ເປັນລັດຖະມົນຕີ ກະຊວງອຸດສາຫະກຳ ແລະ ການຄ້າ ເມື່ອວັນທີ 14 ພຶດສະພານີ້ ທີ່ຫ້ອງຮັບແຂກກະຊວງອຸດສາຫະກຳ ແລະ ການຄ້າ.
ໃນໂອກາດດັ່ງກ່າວ ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ສະແດງຄວາມ ຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ທ່ານ ນາງ ຟລໍຣັອງສ ຊັອງບລັອງ-ຣິສແລກ ທີ່ໄດ້ມາປະຕິບັດໜ້າທີ່ການທູດ ປະຈຳ ສປປ ລາວ ໃນຄັ້ງນີ້ ຊຶ່ງຕະຫຼອດໃນການປະຕິບັດໜ້າທີ່ ທ່ານທູດ ໄດ້ເອົາໃຈໃສ້ຢ່າງຕັ້ງໜ້າເຂົ້າໃນການປະກອບສ່ວນ ເສີມສ້າງສາຍພົວພັນຮ່ວມມື ແລະ ຊ່ວຍເຫຼືອ ຊຶ່ງກັນ ແລະ ກັນ ເວົ້າລວມ ເວົ້າສະເພາະ ໃນຂົງເຂດອຸດສາຫະກຳ ແລະ ການຄ້າ ລາວ-ຝຣັ່ງ ທີ່ມີມາແລ້ວນັ້ນ ໃຫ້ນັບມື້ດີຂຶ້ນເປັນກ້າວໆ, ໃນນັ້ນທ່ານລັດຖະມົນຕີ ແລະ ທ່ານທູດຍັງໄດ້ທົບທວນຄືນວຽກງານການ ຮ່ວມມື ໂດຍສະເພາະການພົວພັນການຄ້າ ແລະ ການລົງທຶນລະຫວ່າງລາວ-ຝຣັ່ງໃນໄລຍະຜ່ານມາ.
ໃນໄລຍະ 5 ປີຜ່ານມາຝຣັ່ງເປັນຄູ່ຄ້າອັນດັບ 24 ຂອງລາວ (ດ້ານການສົ່ງອອກ) ແລະ ອັນດັບ 19 (ດ້ານການນຳເຂົ້າ), ບັນດາສິນຄ້າຫຼັກທີ່ລາວສົ່ງອອກ ແລະ ນຳເຂົ້າປະກອບມີສິນຄ້າຫຼັກທີ່ ສົ່ງອອກໄປຝຣັ່ງມີ ເຄື່ອງນຸ່ງຫົ່ມ, ກາເຟ (ບໍ່ທັນໄດ້ປຸງແຕ່ງ), ເກີບ, ເຂົ້າ, ເຄມີ ແລະ ສານປະກອບອະນິນຊີ, ຂີ້ຄັ່ງ, ຍານຂີ້ຊີ, ນໍ້າຕານ, ຢາສູບ, ເມັດພືດ, ໝາກໄມ້ທີ່ມີນໍ້າມັນ, ເຟືອງ ແລະ ຫຍ້າ, ເຫຼົ້າ-ເບຍ, ຊາ (ບໍ່ທັນໄດ້ປຸງແຕ່ງ) ແລະ ອື່ນໆ.
ສ່ວນສິນຄ້າຫຼັກທີ່ນຳເຂົ້າຈາກຝຣັ່ງມີ ພາຫະນະອາກາດ ແລະ ຊິ້ນສ່ວນອາໄຫຼ່, ເຫຼົ້າ-ເບຍ-ວາຍ, ອຸປະກອນກົນຈັກ, ເຄື່ອງມື ແລະ ອຸປະກອນທັດສະນະສາດ, ຊິ້ນສ່ວນອາໄຫຼ່ລົດ, ນໍ້າຫອມ-ເຄື່ອງສຳ ອາງ, ຜະລິດຕະພັນການຢາ, ເຄື່ອງໄຟ້ຟ້າ ແລະ ອຸປະກອນໄຟຟ້າ, ສິ່ງປຸງແຕ່ງອື່ນໆທີ່ບໍລິໂພກໄດ້, ອຸປະກອນການແພດ, ເຈ້ຍ, ເຄື່ອງໃຊ້ທີ່ເຮັດດ້ວຍເຍື່ອເຈ້ຍ ແລະ ອື່ນໆ ແລະ ການຮ່ວມມືໃນ ດ້ານອື່ນໆ.
ໄລຍະຜ່ານມາການຮ່ວມມື ແລະ ຊ່ວຍເຫຼືອສອງຝ່າຍແມ່ນສຸມໃສ່ 5 ຂົງເຂດຫຼັກຄື: ດ້ານສາທາລະນະສຸກ, ກະສິກຳ, ການພັດທະນາຕົວເມືອງ, ການປົກຄອງ ແລະ ພາສາສາດ.
ທ່ານ ນາງ ຟລໍຣັອງສ ຊັອງບລັອງ-ຣິສແລກ ໄດ້ສະແດງຄວາມຂອບໃຈຕໍ່ ທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຂອບ ໃຈຕໍ່ການນຳພັກ-ລັດຖະບານລາວ ທີ່ໄດ້ອຳນວຍຄວາມສະດວກຕະຫຼອດໃນໄລຍະປະຕິບັດໜ້າທີ່ການທູດ ໃນໄລຍະຜ່ານມາທີ່ໄດ້ຮັບຜົນສຳເລັດ, ໂອກາດດັ່ງກ່າວທ່ານທູດຍັງໄດ້ສະແດງຄວາມຍິນດີ ແລະ ຊົມເຊີຍຕໍ່ ທ່ານ ຄຳ ແພງ ໄຊສົມແພງ ທີ່ໄດ້ຮັບໜ້າທີ່ເປັນລັດຖະມົນຕີ ກະຊວງອຸດສາຫະກຳ ແລະ ການຄ້າຜູ້ໃໝ່ອີກດ້ວຍ.
Loading...