ຕອນບ່າຍວັນທີ 31 ຕຸລາ 2022, ຢູ່ນະຄອນຫຼວງປັກ ກິ່ງ ແຫ່ງ ສປ ຈີນ, ສະຫາຍ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ, ປະທານປະ ເທດຈີນ ໄດ້ຈັດພິທີຕ້ອນຮັບ ສະຫາຍ ຫງວຽນ ຝູຈ້ອງ ເລ ຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ ທີ່ໄປເຄື່ອນໄຫວຢ້ຽມຢາມ ສປ ຈີນ ຢ່າງເປັນທາງການ.
ພາຍຫຼັງສໍາເລັດພິທີຕ້ອນຮັບຢ່າງເປັນທາງການ, ສະຫາຍ ສີຈິ້ນຜິງ ໄດ້ພົບປະກັບ ສະຫາຍ ຫງວຽນ ຝູຈ້ອງ. ສອງຝ່າຍໄດ້ເປັນເອກະພາບກັນຫລາຍບັນຫາຢ່າງເລິກເຊິ່ງ ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈເຊີ່ງກຫນແລະກັນ, ເສີມຂະຫຍາຍມິດຕະພາບອັນເປັນມູນເຊື້ອລະຫວ່າງສອງປະເທດ, ຍົກສູງປະສິດທິຜົນການຮ່ວມມືຢ່າງແທດຈິງໃນທຸກຂົງເຂດ, ຮັກສາສັນຕິພາບ, ສະຖຽນລະພາບຢູ່ທະເລ, ນຳເອົາການພົວພັນຂອງສອງຝ່າຍສືບຕໍ່ພັດທະນາຢ່າງປອດໃສ, ມີສະຖຽນລະພາບ ແລະ ໝັ້ນຄົງໜັກແໜ້ນ. ສອງຝ່າຍເຫັນດີສືບຕໍ່ຮັກສາການແລກປ່ຽນ, ພົບປະຂັ້ນສູງລະຫວ່າງການນຳຂອງສອງພັກ-ສອງລັດຢ່າງເປັນປົກກະຕິ ເພື່ອເພີ່ມທະວີຄວາມເຂົ້າໃຈເຊິ່ງກັນ ແລະ ກັນ, ແລກ ປ່ຽນ, ແກ້ໄຂບັນດາບັນຫາທີ່ເກີດຂຶ້ນໃໝ່ໃນການພົວພັນສອງຝ່າຍຢ່າງທັນການ ແລະ ຮັກສາທ່ວງທ່າພັດທະນາຢ່າງປອດໃສ, ມີສະຖຽນລະພາບໃນການພົວພັນລະຫວ່າງສອງປະເທດ ເພື່ອແນໃສ່ເພື່ອຊຸກຍູ້ໃຫ້ການພົວພັນຄູ່ຮ່ວມມືຍຸດ ທະສາດຮອບດ້ານລະຫວ່າງສອງປະເທດກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.
ພາຍຫຼັງສໍາເລັດການພົບປະສອງຝ່າຍ, ສະຫາຍ ສີ ຈິ້ນ ຜິງ ແລະ ສະຫາຍ ຫງວຽນ ຝູຈ້ອງ ຍັງໄດ້ເຂົ້າຮ່ວມເປັນສັກຂີພິຍານໃນການເຊັນເອກະສານຮ່ວມມືຈໍານວນໜຶ່ງຂອງສອງຝ່າຍກ່ຽວກັບດ້ານການເມືອງ, ເສດຖະກິດ ແລະ ການຄ້າ, ການຄຸ້ມຄອງສິ່ງແວດລ້ອມ, ວັດທະນະທໍາ ແລະ ທ່ອງທ່ຽວ, ຍຸຕິທໍາ, ພາສີ ແລະ ວຽກງານທ້ອງຖິ່ນ.
ນອກຈາກນີ້, ໃນຕອນບ່າຍວັນດຽວກັນນີ້ ສະຫາຍ ສີ ຈິ້ນຜິງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ໄດ້ມອບຫຼຽນໄຊມິດ ຕະພາບໃຫ້ແກ່ ສະຫາຍ ຫງວຽນ ຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດ ນາມ.
ສໍາລັບການເດີນທາງຢ້ຽມຢາມ ສປ ຈີນ ຂອງ ສະຫາຍ ຫງວຽນ ຝູຈ້ອງ ແລະ ຄະນະ ໃນຄັ້ງນີ້ ແມ່ນເປັນການນໍາຂັ້ນສູງຂອງຕ່າງປະເທດຄະນະທໍາອິດທີ່ຢ້ຽມຢາມຈີນ ພາຍຫລັງສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ທີ່ຈັດຂຶ້ນໃນລະຫວ່າງວັນທີ 16-22 ຕຸລາ 2022 ແລະ ນີ້ເປັນການເດີນທາງຢ້ຽມຢາມຕ່າງປະເທດຄັ້ງທໍາອິດຂອງ ສະຫາຍ ຫງວຽນ ຝູຈ້ອງ ພາຍຫລັງທີ່ຖືກຄັດເລືອກໃຫ້ດໍາລົງຕໍາແໜ່ງເປັນເລຂາ ທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດຫວຽດນາມ ທີ່ຈັດຂຶ້ນໃນເດືອນມັງກອນປີ 2021 ຜ່ານມາ. ຂະນະດຽວກັນ ໃນ 5 ປີກ່ອນ ຫລັງຈາກທີ່ ສະຫາຍ ສີ ຈິ້ນຜິງ ໄດ້ຮັບການຄັດເລືອກໃຫ້ດໍາລົງຕໍາແໜ່ງເປັນເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ ໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIX ຂອງພັກກອມມູນິດຈີນ, ສະຫາຍ ສີ ຈິ້ນຜິງ ໄດ້ຢ້ຽມຢາມ ສສ ຫວຽດນາມ ເປັນປະເທດທໍາອິດຂອງການເດີນທາງຢ້ຽມຢາມຕ່າງປະເທດຂອງສະຫາຍ.
ພາບ: Xinhua
