ໃນວັນທີ 6 ສິງຫາ 2024 ຜ່ານມາ, ຢູ່ສໍານັກງານໃຫຍ່ ລັດວິສາຫະກິດໄຟຟ້າລາວ (ຟຟລ) ໄດ້ມິພິທີ ມອບ-ຮັບ ອຸປະກອນ Digital Fault Recorder ທີ່ໄດ້ຮັບການຊ່ວຍເຫຼືອ ຈາກອົງການ JICA ຂອງປະເທດຢີ່ປຸ່ນ ປະຈໍາລາວ ໂດຍການລົງນາມຂອງ ທ່ານ ໂນຣິຢູກິ ອີໂຕະ ຜູ້ແທນອາວຸໂສ JICA, ທ່ານ ມາຊະຮາຣຸ ໂຢໂກະ ຊ່ຽວຊານ JICA ແລະ ທ່ານ ສຸລິວັນ ທໍາມະວົງ ຫົວໜ້າຝ່າຍວາງແຜນ ແລະ ບັນຊາລະບົບໄຟຟ້າ ຕາງໜ້າ ຟຟລ ມີ ທ່ານ ຊິນ ອິນທະວົງ ຮອງຜູ້ອໍານວຍການໃຫຍ່ ຟຟລ ແລະ ແຂກຈາກກະຊວງພະລັງງານ ແລະ ບໍ່ແຮ່ ກໍ່ໄດ້ໃຫ້ກຽດເຂົ້າຮ່ວມເປັນສັກຂີພະຍານ.
ຈຸດປະສົງການຊ່ວຍເຫຼືອໃນຄັ້ງນີ້ ເພື່ອເສີມສ້າງຄວາມສາມາດໃນການວາງແຜນລະບົບຈໍາໜ່າຍພະລັງງານໄຟຟ້າ ແລະ ການດໍາເນີນວຽກງານວິຊາສະເພາະຂອງ ຟຟລ ໂດຍການສ້າງຕັ້ງລະບົບ Grid Codes, ການວາງແຜນ ແລະ ປະຕິບັດລະບົບເຊື່ອມຕໍ່ໄຟຟ້າຫາກັນຢ່າງເໝາະສົມ ດັ່ງນັ້ນຈະເປັນການປະກອບສ່ວນເຂົ້າໃນການເຮັດໃຫ້ລະບົບເຊື່ອມຕໍ່ລະບົບໄຟຟ້າຈາກສະຖານີໄຟຟ້າ ຫາ ສະຖານີໄຟຟ້າດີຂຶ້ນ ຄາດວ່າການຕິດຕັ້ງ oscilloscopes ຈະປະກອບສ່ວນເຂົ້າໃນການສະຫນອງພະລັງງານໃຫ້ມີຄວາມປອດໄພ ແລະ ໝັ້ນຄົງ ສໍາລັບເຄື່ອງທີ່ໄດ້ຮັບໃນຄັ້ງນີ້ແມ່ນໄດ້ຕິດຕັ້ງຢູ່ 3 ສະຖານີຫຼັກຄື: ສະຖານີໄຟຟ້ານາຊາຍທອງ, ສະຖານີໄຟຟ້າໂຄກສະອາດ ແລະ ສະຖານີໄຟຟ້າດົງໂພສີ
ທີ່ມາ: ລັດວິສາຫະກິດໄຟຟ້າລາວ
