ການມີສ່ວນຮ່ວມຂອງສະມາຊີກໃນຄອບຄົວແມ່ນມີຄວາມສຳຄັນຫຼາຍໃນການເບິ່ງແຍງດູແລແມ່ຍິງຖືພາ ແລະ ແມ່ລູກອ່ອນເພື່ອເຮັດໃຫ້ແມ່ມີສຸຂະພາບແຂງແຮງສາມາດລ້ຽງລູກໄດ້ຢ່າງມີປະສິດທິພາບແລະພັດທະນາການທີ່ດີ.
ທ້າວ ນ້ອຍ ໄຊປັນຍາ ອາຊີບ ພະນັກງານ ບ້ານ ສະຫ່ວາງ ເມືອງວັງວຽງ ແຂວງວຽງຈັນ ໃຫ້ສຳພາດວ່າ ” ໃນໄລຍະເມຍຖືພາຕົນເອງແມ່ນໄດ້ເບີ່ງແຍງດູແລເມຍເປັນຢ່າງດີ ເປັນຕົ້ນ: ໄດ້ພາເມຍໄປຝາກທ້ອງຕາມການນັດຂອງທ່ານໝໍ ແລະ ໄດ້ຮ່ວມຮັບຟັງຄຳແນະນຳຈາກທ່ານໝໍ, ເວລາຢູ່ເຮືອນຕົນເອງແມ່ນໄດ້ເຮັດວຽກໜັກທຸກຢ່າງແທນເມຍ ເປັນຕົ້ນການຍົກສິ່ງຂອງທີ່ໜັກຕ່າງໆແລະຍັງໄດ້ເຮັດສວນຄົວ, ລ້ຽງສັດນ້ອຍ ເພື່ອເປັນອາຫານໃຫ້ທຸກຄົນພາຍໃນຄອບຄົວແບບນີ້ຂ້ອຍກໍ່ໝັ້ນໃຈວ່າເມຍ ແລະ ລູກນ້ອຍທີ່ຈະເກີດອອກມາໄດ້ຮັບອາຫານທີ່ມີປະໂຫຍດຢ່າງພຽງພໍ”.
ພ້ອມນີ້ ທ່ານໝໍ ນາງ ວຽງນິດດາ ໄຊຍະວົງ ໃຫ້ສໍາພາດວ່າ ” ການລ້ຽງລູກດ້ວຍນໍ້ານົມແມ່ແມ່ນມີຄວາມສຳຄັນຫຼາຍໂດຍສະເພາະນໍ້ານົມຢອດທຳອິດຂອງແມ່ຫຼືນໍ້ານົມເຫຼືອງຖ້າລູກກິນແມ່ນສາມາດຕ້ານທານເຊື້ອພະຍາດຕ່າງໆໄດ້ ແລະ ນົມແມ່ມີສານອາຫານຄົບຖ້ວນ ສະນັ້ນ ເພື່ອເຮັດໃຫ້ແມ່ທີ່ເກີດລູກໃຫມ່ມີນໍ້ານົມທີ່ມີສານອາຫານຄົບຖ້ວນ ຈຶ່ງຮຽກຮ້ອງມາຍັງຜູ້ເປັນຜົວ ຫຼື ສະມາຊີກໃນຄອບຄົວຄວນໃຫ້ການເບິ່ງແຍງດູແລແມ່ໃຫ້ດີໃນໄລຍະຖືພາແລະ ພາຍຫຼັງເກີດລູກ ເປັນຕັ້ນແມ່ນໃຫ້ກິນອາຫານທີ່ມີປະໂຫຍດຕໍ່ຮ່າງກາຍ ຫຼີກລ່ຽງການເຮັດວຽກໜັກ ແລະ ອື່ນໆ ”
ຂໍ້ມູນຂອງທີມຂ່າວ ລົງເຄື່ອນໄຫວເກັບກຳຂ່າວ ໄລຍະເຂົ້າຮ່ວມກອງປະຊຸມສື່ມວນຊົນທົ່ວປະເທດ ເພື່ອປຶກສາຫາລືການສົ່ງເສີມວຽກງານໂພຊະນາການຂອງແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ ທີ່ຈັດຂື້ນໃນລະຫວ່າງວັນທີ 5-6 ກັນຍາ 2023 ທີ່ເມືອງວັງວຽງ ແຂວງວຽງຈັນ