ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການເປີດກອງປະຊຸມໃຫຍ່ຂອງໜ່ວຍພັກສະຖານທູດລາວ ທີ່ພະນົມເປັນຄັ້ງທີ III ແລະ ພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ I ປະຈໍາສົກປີ 2018-2019 ໃນວັນທີ 14 ມີນາ 2020

ໃນວັນທີ 14 ມີນາ 2020, ໜ່ວຍພັກສະຖານເອກອັກຄະລັດຖະທູດລາວ ປະຈໍາຣາຊະອານາຈັກກຳປູເຈຍ, ທີ່ພະນົມເປັນ ໄດ້ເປີດກອງປະຊຸມໃຫຍ່ຄັ້ງທີ III ຂອງໜ່ວຍພັກຂື້ນໃນທ່າມກາງທີ່ທົ່ວພັກ-ລັດ ແລະ ທົ່ວປວງຊົນ ຕັ້ງໜ້າສ້າງຜົນງານເພື່ອຂໍ່ານັບຮັບຕ້ອນ ວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີ, ວັນສະຖາປະນາ ສປປ ລາວ ຄົບຮອບ 45 ປີ ແລະ ວັນການທູດລາວຄົບຮອບ 75 ປີ ພາຍໃຕ້ການເປັນປະທານຂອງສະຫາຍ ອໍາໄພ ກິນດາວົງ, ເລຂາໜ່ວຍພັກ. ເປັນກຽດເຂົ້າຮ່ວມກອງປະຊຸມໃຫຍ່ຄັ້ງນີ້ໂດຍສະຫາຍ ບົວພັດ ພຸດທະວົງ,ກຳມະການຄະນະພັກກະຊວງ ທັງເປັນຮອງຫົວໜ້າກົມຈັດຕັ້ງ ແລະ ພະນັກງານ ຕາງໜ້າໃຫ້ຄະນະພັກກະຊວງການຕ່າງປະເທດ ແລະ ຄະນະຕິດຕາມຈໍານວນໜຶ່ງ, ພ້ອມດຽວກັນນີ້ ກໍ່ມີຕາງໜ້າໜ່ວຍພັກກົງສູນໃຫຍ່ ແຫ່ງ ສປປ ລາວ ທີ່ຊຽງແຕງ, ຕາງໜ້າ 3 ອົງການຈັດຕັ້ງມະຫາຊົນ ແລະ ສະມາຊິກພັກທີ່ຂື້ນກັບໜ່ວຍພັກສະຖານທູດລາວທີ່ພະນົມເປັນຈໍານວນ 24 ສະຫາຍ, ໃນນັ້ນມີຍິງ 04 ສະຫາຍ, ຊຶ່ງມາຈາກສີ່ພາກສ່ວນຄື: ສະຖານທູດ, ຕາງໜ້າບໍລິສັດວິສາຫະກິດການບິນລາວສາຂາພະນົມເປັນ, ນັກສຶກສາປ້ອງກັນຊາດ ແລະ ນັກສຶກສາພົນລະເຮືອນ.

ສະຫາຍ ອໍາໄພ ກິນດາວົງ, ເລຂາໜ່ວຍພັກ ໄດ້ກ່າວວ່າ: ກອງປະຊຸມໃຫຍ່ຄັ້ງນີ້ມີຄວາມໝາຍສໍາຄັນຫລາຍ ໃນຊີວິດການເມືອງຂອງໜ່ວຍພັກສະຖານລາວທີ່ພະນົມເປັພວກເຮົາ, ທັງເປັນຂີດໝາຍແຫ່ງວິວັດທະນາການ ໃນການເຕີບໃຫຍ່ຂະຫຍາຍຕົວຂອງໜ່ວຍພັກ, ເຊິ່ງກອງປະຊຸມຄັ້ງນີ້ ຜູ້ເຂົ້າຮ່ວມຍັງໄດ້ພ້ອມກັນຕີລາຄາ ການປະຕິບັດໜ້າທີ່ຂອງຄະນະພັກສະຖານທູດໃນໄລຍະຜ່ານມາ ເພື່ອຜັນຂະຫຍາຍນະໂຍບານການຕ່າງປະເທດຂອງພັກສະໄໝທີ X ແລະ ມະຕິກອງປະຊຸມໃຫຍ່ຂອງອົງຄະນະພັກກະຊວງການຕ່າງປະເທດຄັ້ງທີ III, ເລັ່ງໃສ່ຂະຫຍາຍຈຸດດີ ແລະ ສືບຕໍ່ປັບປຸງແກ້ໄຂຂໍ້ຄົງຄ້າງ ເພື່ອເປັນພື້ນຖານໃຫ້ແກ່ການຄົ້ນຄ້ວາ ແລະ ກຳນົດທິດທາງໃນຊຸມປີຕໍ່ໜ້າ. ພ້ອມນີ້; ກອງປະຊຸມ ຍັງໄດ້ດໍາເນີນການປ່ອນບັດເລືອກຕັ້ງເອົາຄະນະພັກສະຖານທູດຊຸດໃໝ່ ເພື່ອສືບຕໍ່ຊີ້ນໍາ ນໍາພາໜ່ວຍພັກສະຖານທູດໃຫ້ຮັກສາມູນຊື້ອໜ່ວຍພັກປອດໃສ,ເຂັ້ມແຂງ, ໜັກແໜ້ນ ສືບຕໍ່ປະຕິບັດເນື້ອໃນຈິດໃຈ ຂອງກອງປະຊຸມວຽກງານການຕ່າງປະເທດຄັ້ງທີ 14 ຂອງກະຊວງການຕ່າງປະເທດ ໃຫ້ປາກົດຜົນເປັນຈິງ ຕາມພາລະບົດບາດ ຂອງສະຖານເອກອັກຄະລັດຖະທູດ ທີ່ໄດ້ຮັບການມອບໝາຍຈາກຂັ້ນເທິງ.

ພາຍຫລັງສໍາເລັດກອງປະຊຸມໃຫຍ່ໜ່ວຍພັກຄັ້ງທີ III ແລ້ວກໍ່ໄດ້ສືບຕໍ່ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ I ປະຈໍາສົກປີ 2018-2019 ໂດຍແມ່ນ ສະຫາຍ ບົວພັດ ພຸດທະວົງ, ຕາງໜ້າຄະນະພັກກະຊວງການຕ່າງປະເທດ ເປັນຜູ້ຂຶ້ນມອບ, ຜູ້ຮັບແມ່ນສະຫາຍ ອໍາໄພ ກິນດາວົງ, ເລຂາໜ່ວຍພັກສະຖານທູດ ຊໍ້ໜ້າບັນດາສະມາຊິກພັກ, ຕາງໜ້າໜ່ວຍພັກກົງສູນໃຫຍ່ ສປປ ລາວ ທີ່ຊຽງແຕງ ແລະ ຕາງໜ້າ 3 ອົງການຈັດຕັ້ງມະຫາຊົນ. ຫລັງຈາກນັ້ນ ສະຫາຍ ບົວພັດ ພຸດທະວົງ, ຕາງໜ້າຄະນະພັກ ແລະ ຄະນະນໍາກະຊວງການຕ່າງປະເທດ ກໍ່ໄດ້ຂື້ນໃຫ້ຄໍາໂອວາດຕັກເຕືອນ ແລະ ຍ້ອງຍໍຊົມເຊີຍຄະນະພັກສະຖານທູດ ກໍ່ຄືພະນັກງານສະມາຊິກພັກ ທີ່ໄດ້ຍົກສູງຄວາມຮັບຜິດຊອບຂອງຕົນໃນການປະຕິບັດໜ້າທີ່ ທີ່ຂັ້ນເທິງມອບໝາຍໃຫ້ ມີຜົນສໍາເລັດເປັນກ້າວໆມາ ສາມາດເປັນເສນາໃຫ້ແກ່ຂັ້ນເທິງ, ​ໜ່ວຍພັກມີຄວາມເຂັ້ມແຂງທາງດ້ານປະລິມານ ແລະ ຄຸນນະພາບ ແລະ ສືບຕໍ່ຮັກສາມູນເຊື້ອອັນດີນີ້ໃຫ້ເຕີບໂຕຍິ່ງໆຂື້ນ. ຈາກນັ້ນ; ສະຫາຍ ອໍາໄພ ກິນດາວົງ, ເລຂາໜ່ວຍພັກສະຖານທູດ ກໍ່ຂຶ້ນກ່າວຮັບເອົາຄໍາໂອວາດຕັກເຕືອນວ່າ: ຈະເປັນເຈົ້າການໃນການນໍາເອົາທິດຊີ້ນໍາຂອງຄະນະພັກກະຊວງ ໄປຜັນຂະຫຍາຍໃຫ້ເກີດດອກອອກຜົນຍິ່ງໆຂຶ້ນໃນອະນາຄົດ ແລະ ຕັ້ງໜ້າຮັກສາມູນເຊື້ອໜ່ວຍພັກປອດໃສ, ເຂັ້ມແຂງ,  ໜັກແໜ້ນ ໃຫ້ໝັ້ນຄົງຍາວນານໃນຊຸມປີຕໍ່ໜ້າຕໍ່ໄປ.