ຍັງອີກບໍ່ພໍເທົ່າໃດມື້ຂ້າງໜ້ານີ້ ກໍຈະຮອດວັນເລືອກຕັ້ງ ສະມາຊິກສະພາແຫ່ງ ຊາດ ຊຸດທີ IX ແລະ ສະມາຊິກສະພາປະ ຊາຊົນຂັ້ນແຂວງ ແລະ ນະຄອນຫລວງວຽງຈັນ ຊຸດທີ II, ເຊິ່ງຈະຈັດຂຶ້ນພ້ອມ ກັນທົ່ວປະເທດ ໃນວັນທີ 21 ກຸມພາ 2021. ດັ່ງນັ້ນ, ບັນຍາກາດຂອງການຫ້າງຫາກະກຽມໃຫ້ແກ່ການເລືອກຕັ້ງ ແມ່ນພວມເປັນຂະບວນກວ້າງຂວາງຟົດຟື້ນ, ໂດຍສະເພາະຢູ່ຕາມຖະໜົນຫົນທາງສາຍຫລັກຕ່າງໆ ຖືກປະດັບປະດາດ້ວຍປ້າຍຄຳຂວັນຊົມເຊີຍ ແລະ ເຊີນຊວນ ຜູ້ມີສິດເລືອກຕັ້ງໄປເລືອກຕັ້ງໃຫ້ໄດ້ຮ້ອຍສ່ວນ ຮ້ອຍ ຕາມລະດັບຄາດໝາຍວາງໄວ້.
ໃນໂອກາດກະກຽມ ໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະ ຊາຊົນຂັ້ນແຂວງ ເທື່ອນີ້, ນັກຂ່າວສໍານັກຂ່າວສານປະເທດລາວ ໄດ້ສໍາພາດຄວາມຮູ້ສຶກ ທ່ານ ວິຣະພົງສ໌ ພົມດວງສີ ພະນັກງງານ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວວ່າ: ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງເທື່ອນີ້, ແມ່ນເຫດການການເມືອງສໍາຄັນຂອງຊາດ ກໍຄື ລະບອບປະຊາທິປະໄຕປະຊາຊົນ. ເພາະວ່າອໍານາດປະຊາທິປະໄຕ ແມ່ນມາຈາກປະຊາຊົນ ໂດຍປະຊາຊົນເພື່ອປະຊາຊົນ ແມ່ນການມອບຄວາມຕັດສີນໃຈຕໍ່ສະຕາກໍາ, ຕໍ່ທິດທາງເດີນຂອງປະເທດຊາດ ໃຫ້ປະຊາຊົນເປັນຜູ້ເລືອກ ວ່າຈະໄປໃນທິດທາງໃດ. ສະນັ້ນ, ຊາດຈະເຮືອງ, ເມືອງຈະຮຸ່ງ ທັນຍຸກສະໄໝ ແລະ ສີວິໄລ ແມ່ນຂຶ້ນກັບການຕັດສີນໃຈຂອງປະຊາຊົນລາວບັນດາເຜົ່າທົ່ວປະເທດ ທີ່ຈະພ້ອມໃຈກັນອອກມາໃຊ້ສິດປະຊາທິປະໄຕ ຂອງຕົນໃນບັ້ນເລືອກຕັ້ງຄັ້ງນີ້.
ທ່ານພັນຕີ ອໍາພອນ ອິທະລາດ ເຈົ້າໜ້າທີ່ ປກສ ເມືອງຈັນທະບູລີ ໄດ້ໃຫ້ທັດສະນະວ່າ: ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ທີ່ຈະມາເຖິງນີ້, ແມ່ນເຫດການທາງການເມືອງສໍາຄັນຂອງປະເທດເຮົາ, ເພາະວ່າເປັນການຄັດເລືອກເອົາຕົວແທນຂອງປະຊາ ຊົນ ເຂົ້າໄປນັ່ງໃນສະພາແຫ່ງຊາດ. ສະນັ້ນ, ຂໍໃຫ້ປະຊາຊົນຜູ້ທີ່ມີສິດເລືອກຕັ້ງ ຫລື ມີອາຍຸແຕ່ 18 ປີຂຶ້ນໄປ ໃຫ້ອອກມາປະຕິບັດຕາມສິດ ແລະ ພັນທະຂອງຕົນເອງ ຕາມທີ່ລັດຖະນູນກໍານົດໄວ້.
ການເລືອກຕັ້ງໃນຄັ້ງນີ້, ແມ່ນມີຄວາມໝາຍສຳຄັນຫລາຍ ຖືເປັນປາງບຸນໃຫຍ່ຂອງປວງຊົນລາວທັງຊາດ. ດັ່ງນັ້ນ, ເພື່ອໃຫ້ການເລືອກຕັ້ງບັນລຸຕາມລະດັບຄາດໝາຍທີ່ວາງໄວ້ ຂໍເຊີນຊວນໃຫ້ປະຊາຊົນລາວບັນດາເຜົ່າໃນທົ່ວປະເທດ ທີ່ມີອາຍຸນັບແຕ່ 18 ປີຂຶ້ນໄປ ຈົ່ງພ້ອມພຽງຮຽງກັນ ໄປໃຊ້ສິດຂອງຕົນປ່ອນບັດເອົາຜູ້ແທນທີ່ໄດ້ມາດຖານ ແລະ ເງື່ອນໄຂຄົບຖ້ວນ ເພື່ອໄປເຮັດໜ້າທີ່ໃນການປົກປ້ອງສິດ ແລະ ຜົນປະໂຫຍດຂອງປະຊາຊົນຢູ່ໃນສະພາ ແລະ ຫວັງຢ່າງຍິ່ງວ່າ ການເລືອກຕັ້ງໃນຄັ້ງນີ້ຈະບັນລຸຄາດໝາຍຮ້ອຍສ່ວນຮ້ອຍ ແລະ ມີຜົນສຳເລັດຢ່າງຈົບງາມ.
ຂ່າວ: ສຸພາສະຫວັນ ສີຊະນະມຸງຄຸນ.
Loading...